ខេត្តបន្ទាយមានជ័យ ៖ ក្រុមស្ទាវ៣នាក់ជិះម៉ូតូ១គ្រឿងបានធ្វើសកម្មភាពធាក់ផ្តួលម៉ូតូយុវជនរងគ្រោះម្នាក់បណ្តាលឲ្យដួលសន្លប់ហើយគេចខ្លួនបាត់ស្រមោល។
ហេតុការណ៍នេះបានកើតឡើងនៅវេលាម៉ោង៧និង៣០នាទីថ្ងៃទី០២តុលា២០១៤នៅផ្លូវចូលវត្តព្រះពន្លាខាងកើតរង្វង់មូលស្រីគ្រប់ល័ក្ខស្ថិតក្នុងភូមិ៣សង្កាត់ព្រះពន្លា ក្រុងសិរីសោភ័ណខេត្តបន្ទាយមានជ័យ។
បើតាមប្រភពពីសមត្ថកិច្ចបានប្រាប់ថា យុវជនរងគ្រោះដោយក្រុមស្ទាវធាក់ផ្តួលម៉ូតូបណ្តាលឲ្យសន្លប់មានឈ្មោះ ផល វាសនា ភេទប្រុសអាយុ២៣ឆ្នាំរស់នៅភូមិព្រៃឫស្សី សង្កាត់ព្រះពន្លាក្រុងសិរីសោភ័ណខេត្តបន្ទាយមានជ័យបានបើកបរម៉ូតូ ម៉ាកហុងដាឌ្រីម សេ១២៥ ពណ៌ខ្មៅ ស៊េរីឆ្នាំ២០១៤ ពាក់ស្លាកលេខ បន្ទាយមានជ័យ 1J-4690។
តាមសំដីជនរងគ្រោះឈ្មោះ ផល វាសនា បានប្រាប់ នៅកន្លែងកើតហេតុថា ៖នៅពេលក្រុមស្ទាវធាក់ម៉ូតូដួលសន្លប់គឺខ្លួនបានមកពីដើរលេងម្នាក់ឯងហើយត្រឡប់ទៅផ្ទះ វិញដល់ចំណុចកើតហេតុស្រាប់តែជនដែលបង្កមានគ្នា៣នាក់ជិះម៉ូតូធុន(HUMMER.X)ដែលមកស្របទិសគ្នាហើយឡើងវ៉ាខាងស្តាំហើយធាក់ម៉ូតូដែលកំពុងជិះ បណ្តាលដួលសន្លប់តែម្តង។ ជនរងគ្រោះបានបន្តថាក្រោយពេលធាក់ផ្តួលក្រុមក្មេងស្ទាវក៏បានបើកម៉ូតូគេចខ្លួនបាត់ស្រមោលតែម្តង។
បើតាមប្រភពបានបង្ហើបប្រាប់ថាយុវជនរងគ្រោះបានបន្តថាក្រុមស្ទាវ៣នាក់ដែលបង្កគេបានស្គាល់គឺក្រុមស្ទាវរស់នៅខាងកើតវត្តព្រះពន្លាដែលជាក្រុមបងធំបងតូចបង្ក កាប់ចាក់គ្នានិងអសន្តិសុខស្ទើរាល់ថ្ងៃតែមិនដែលឃើញមានសមត្តកិច្ចណាមួយមានវិធានការបង្ក្រាបនោះឡើយ ចំណែកខ្លួនដែលសន្លប់ត្រូវបានអ្នកជិតខាងឃើញជួយ អោយបានដឹងខ្លួនបន្ទាប់មកបានគេឃើញមានសមត្ថកិច្ចនគរបាលមូលដ្ឋានចុះមកត្រួតពិនិត្យនៅកន្លែងកើតហេតុ និង បានអោយរថយន្តដឹកសង្គ្រោះទៅមន្ទីរពេទ្យ និង តាមស្រាវជ្រាវរកមុខសញ្ញា ជនដៃដល់ យកមកផ្តន្ទាទោសតាមផ្លូវច្បាប់ជាមិនខាន ៕
