ខេត្តសៀមរាប ៖ កម្លាំងកងរាជអាវុធហត្ថខេត្តចំនួន១១នាក់បានធ្វើការនាំខ្លួនប៉ូលិសសេដ្ឋកិច្ចក្រសួងមហាផ្ទៃចំនួន៤នាក់ និង អ្នកបើកកាណូតចំនួន២នាក់បញ្ជូនទៅ កាន់អង្គភាពប្រឆាំងអំពើពុករលួយ ដើម្បីសួរនាំបន្ត ទៅតាមបណ្តឹងរបស់ជនរងគ្រោះនៅតំបន់ទន្លេសាប ។ នៅក្នុងប្រត្តិបត្តិការនាំខ្លួនប៉ូលិសសេដ្ឋកិច្ចក្រសួងមហាផ្ទៃទៅភ្នំពេញដើម្បីសួរនាំនៅ អង្គភាពប្រឆាំងអំពើពុករលួយនេះបានធ្វើឡើងនៅវេលាម៉ោង១រសៀល ថ្ងៃទី០២ ខែតុលា ឆ្នាំ២០១៤ ។
ប៉ូលិសសេដ្ឋកិច្ចក្រសួងមហាផ្ទៃ៤នាក់និងអ្នកបើកកាណូត២នាក់ ត្រូវបានសមត្ថកិច្ច ធ្វើការចោទពីបទ កំហែងយកនៅថ្ងៃទី៣០ខែកញ្ញាឆ្នាំ២០១៤និងបទឃុំឃាំង និងបង្ខាំងដោយ ខុសច្បាប់ដែលប្រព្រឹត្តិនៅចំនុចមាត់ខ្លា ឃុំអន្លង់សំណរ ស្រុកជីក្រែង ខេត្តសៀមរាប។
តាមប្រភពពីប្រជានេសាទបានប្រាប់អ្នកយកព័ត៌មានថា ជនទាំងអស់នេះបានដើរប្រមូលលុយពីក្រុមអ្នករកស៊ីនេសាទនៅតំបន់ទន្លេសាបក្នុងភូមិសាស្ត្រចំនួន៥ខេត្ត ដោយពួកគេទាមទារលុយពីអ្នកនេសាទច្រើនពេក ទើបប្រជានេសាទរាយការណ៍ទៅសមត្ថកិច្ចតែម្តង។
ប្រភពបន្តទៀតថា នៅថ្ងៃទី៣០ខែកញ្ញាកន្លងទៅនេះមានករណីឃាត់ទូកនេសាទមួយហើយ ក្រុមប៉ូលិសសេដ្ឋកិច្ចក្រសួងខាងលើនេះទំនងជាសុំគោលការជំនាញឲ្យចាប់ ប៉ុន្តែត្រូវចរចាគ្នា វិញជាថ្នូរនឹងការដោះលែង ។
សូមរំលឹកផងដែរថា ប៉ូលិសសេដ្ឋកិច្ចក្រសួងមហាផ្ទៃ៤នាក់ និងអ្នកបើកកាណូត២នាក់ត្រូវបានកម្លាំងចំរុះដែលដឹកនាំដោយលោក សំរិទ្ធ សុខុន ព្រះរាជអាជ្ញអមសាលាដំបូងខេត្តនិងកម្លាំងប៉េអ៊ឹមខេត្តបានធ្វើការឃាត់ខ្លួនកាលពីថ្ងៃទិ០១ខែតុលាស្ថិតនៅភូមិសាស្ត្រកងមាសក្នុង ភូមិមាត់ខ្លា ឃុំអន្លង់សំណរ ស្រុកជីក្រែង ខេត្តសៀមរាប ជាប់ព្រំប្រ ទល់ខេត្តកំពង់ធំ យកមកសួរនាំនៅបញ្ជាការដ្ឋានកងរាជអាវុធហត្ថខេត្ត ៕
