បាត់ដំបង៖ កាលពីព្រឹកថ្ងៃទី២៦ ខែសីហា ឆ្នាំ២០១៤ ប្រជាពលរដ្ឋជាង១០០គ្រួសារ នាំគ្នាតវ៉ាលោក អ៊ឹង ស៊ីណា ប្រធានការិយាល័យកសិកម្មស្រុកថ្មគោល ធ្វើរបងប៉ះផ្លូវបណ្តាលអោយពួកគាត់ដឹកកសិផល ឬចរាចរណ៍មានការលំបាក នៅភូមិស្នួលកោងឃុំបឹងព្រីងស្រុកថ្មគោលខេត្តបាត់ដំបង។
តាមប្រភពផ្សព្ធផ្សាយព័ត៌មានមួយចំនួនបានអោយដឹងថាមានអ្នកមានអំណាចធ្វើរបងព័ទ្ធលំនៅដ្ឋានប្រជាពលរដ្ឋ បិទប្រឡាយឃាំងទឹកមិនអោយប្រជាពលរដ្ឋនៅភូមិស្នួលកោងប្រើប្រាស់។
ប្រជាពលរដ្ឋភូមិស្នួលថា ពួកគាត់មិនមានបំណងទាមទាយកដីពីលោកអ៊ឹងស៊ីណាប្រធានការិយាល័យកសិកម្មស្រុកថ្មគោលទេគឺសំណូមពរអោយដករបងថ្មចេញពីព្រោះធ្វើរបងថ្មប៉ះផ្លូវធ្វើអោយផ្លូវតូចចង្អៀតពេលពួកគាត់ដឹកកសិផលឬចរាចរណ៍មានការលំបាកដោយគោយន្តឬរថយន្តធ្លាក់ពីលើផ្លូវចូលប្រឡាយទឹក។
លោក ស្មាន់ សុភាព មេភូមិស្នួលបានអោយដឹងថារូបលោកបានផ្តល់ដំណឹងនេះជូនលោកមេឃុំតាំងពីឆ្នាំ២០១៣ តែលោកមេឃុំមិនរកដំណោះស្រាយ ។
លោក លឹម វែង មេឃុំបឹងព្រីងបានអោយដឹងថានៅព្រឹកនេះ លោកបានសម្របសម្រួលជាមួយលោក អ៊ឹង ស៊ីណា ប្រធានការិយាល័យកសិកម្មស្រុកថ្មគោលអោយគាត់ដករបងចេញ ។
លោក អ៊ឹង ស៊ីណា ប្រធានការិយាល័យកសិកម្មស្រុកថ្មគោលបានអោយដឹងថាបញ្ហាដែលកើតឡើងផ្អើលដល់ការផ្សព្ធផ្សាយព័ត៌មានមួយចំនួនថា រូបខ្ញុំធ្វើរបងព័ទ្ធលំនៅដ្ឋានប្រជាពលរដ្ឋ បិទប្រឡាយឃាំងទឹកមិនអោយប្រជាពលរដ្ឋនៅភូមិស្នួលកោងប្រើប្រាស់នោះជាការផ្សាយខុស ។ តាមពិត ប្រឡាយ ឬផ្លូវនៅភូមិស្នួលកោង ជាការស្តារសំរាប់អភិវឌ្ឍន៍កសិកម្ម មិនមែនជារបស់បុគ្គលទេ នៅឆ្នាំ២០១៣ រូបខ្ញុំបានជីករណ្តៅនិងបន្សល់អាចដីមួយចំនួន ដែលមិនទាន់ឈូសឆាយពង្រាបដោយសារទឹកជន់លិច ។ ការធ្វើរបងថ្មការពារផលកសិកម្មសំរាប់ប្រជាពលរដ្ឋហើយ បើរបងនេះវាប៉ះពាល់រូបលោក និងរុះរើឬរកវិធីសម្រួលផ្លូវអោយបានធំជាងនេះ ។ សូមប្រជាពលរដ្ឋកុំបោះសំរាមចូលប្រឡាយទឹកបណ្តាល អោយរីងរាក់និងបូមទឹកកាត់ផ្លូវវាងាយខូចខាតពិបាកធ្វើចរាចរណ៍ ៕
