ការបោះឆ្នោតសកលឆ្នាំ២០១៣កន្លងទៅពោរពេញទៅ ដោយការបាត់បង់ជីវិតមនុស្សជាច្រើននាក់ ការរងរបួស ការហូរឈាមខ្មែរគ្នាឯង ការតវ៉ាតាមដងផ្លូវនានា ហើយវា បានរំលេចចេញនូវភាពភ័យខ្លាចក្នុងអារម្មណ៍របស់ប្រជាពល រដ្ឋថាខ្មែរអាចនឹងនិយាយលែងស្តាប់គ្នាលាបពណ៌ឱ្យគ្នាដែល ឈានទៅដល់សង្គមកើតកលិយុគ
ជាមិនខាន ។
ប៉ុន្តែវាពិតជាសំណាងរបស់សង្គមយើងដែលថ្នាក់ដឹកនាំគណបក្សប្រជាជនកម្ពុជា និង គណបក្សសង្គ្រោះជាតិ ដែលមាន អាសនៈនៅរដ្ឋសភាបានរួម គ្នាធានាថាកម្ពុជាមានឯកភាពជាតិដ៏ពិតប្រាកដចាប់ពីពេលនេះ តទៅ ។
ប៉ុន្តែតើអ្នកនយោបាយទាំងពីរបក្សនឹងអាចរក្សាពាក្យសម្តី របស់ខ្លួនបានកម្រិតណានោះ វានឹងត្រូវបង្ហាញតាមរយៈពេល វេលាទៅអនាគតហើយនេះគឺជាកិច្ចការអាទិភាពដែលគណបក្សទាំងពីរត្រូវរួមគ្នាធ្វើ ដើម្បីចៀសវាងភាពច្រំដែល នៃប្រវត្តិ សាស្ត្រដែលតែងតែមានជម្លោះរវាងខ្មែរ និងខ្មែរ ។
វាជាសំណាងមួយទៀតរបស់កម្ពុជានៅពេលដែលប្រធាន គណបក្សសង្គ្រោះជាតិ លោក សម រង្ស៊ី នៅថ្ងៃទី ២១ ខែ សីហា ផ្ញើលិខិតគាំទ្រការថ្លែងរបស់លោក ហ៊ុន សែន កាលពី ថ្ងៃ ១៨ ខែសីហា អំពីដំណោះស្រាយវិវាទដីធ្លីដែលកើតឡើង ច្រើននៅក្នុងប្រទេសកម្ពុជា ក្នុងរយៈពេល ១០ឆ្នាំនេះ ។ ទន្ទឹម នោះ លោក សម រង្ស៊ី សុំផ្តល់ជូនប្រមុខរដ្ឋាភិបាលនូវព័ត៌មាន របាយការណ៍ និងញត្តិដែលគណបក្សសង្គ្រោះជាតិ បានទទួល ពីប្រជាពលរដ្ឋរងគ្រោះដីធ្លី ហើយក៏សុំសហការក្នុងការលើកទឹក ចិត្តអ្នកវិនិយោគត្រឹមត្រូវដែលរួមចំណែកអភិវឌ្ឍពិតប្រាកដ សម្រាប់កម្ពុជារយៈពេលវែង ។
នរណាក៏ដឹងដែរថា ពលរដ្ឋដែលមានជម្លោះដីធ្លីចាប់ផ្តើម កក្រើកតវ៉ាឡើងវិញ ក្រោយពីស្ងប់ស្ងាត់មួយរយៈ បន្ទាប់ពីការ ជាប់គាំងនយោបាយជិតមួយឆ្នាំរួចមក ។ គណបក្សសង្គ្រោះ ជាតិមានកម្មវិធីនយោបាយច្បាស់លាស់ដើម្បីដោះស្រាយវិបត្តិ ដីធ្លីជូនពលរដ្ឋ ។ រីឯប្រមុខដឹកនាំរាជរដ្ឋាភិបាល លោកនាយក រដ្ឋមន្ត្រី ហ៊ុន សែន ក៏បញ្ជាក់ពីជំហរក្នុងការដោះស្រាយវិបត្តិដីធ្លី ដែរ ។ ថែមទាំងបានស្តីបន្ទោសទៅមន្ត្រីក្រោមឱវាទ មានទាំង រដ្ឋមន្ត្រីអភិបាលខេត្តនិងថ្នាក់ដឹកនាំពាក់ព័ន្ធទាំងអស់ថាមិនបាន យកចិត្តទុកខិតខំដោះស្រាយបញ្ហាដីធ្លីជូនពលរដ្ឋ។
ក្នុងករណីដីទំនាស់នោះ ជាប់ពាក់ព័ន្ធនឹងដីសម្បទាន សេដ្ឋកិច្ច សម្តេចតេជោបញ្ជាក់ច្បាស់ថា គឺត្រូវគិតពលរដ្ឋជាធំ ដោយអាជ្ញាធរ និងក្រុមហ៊ុន ត្រូវអនុវត្តគោលនយោបាយស្បែក ខ្លាជាដាច់ខាត ។ សម្តេចក៏បានបន្ទោសទៅមន្ត្រីក្រោមឱវាទ របស់លោកថា ការផ្តល់ដីសម្បទានសេដ្ឋកិច្ច មើលតែតាមផែន ទីនិងមិនបានចុះ
ទៅមើលផ្ទាល់ពិសេសមិនបានអនុវត្តអនុសាសន៍ របស់សម្តេចឱ្យមានប្រសិទ្ធភាព ។
ធាតុពិត អ្នកទន្ទ្រានយកដីធ្លីពីពលរដ្ឋ គឺសុទ្ធសឹងជាឧកញ៉ា ជាមន្ត្រីគ្រាក់ៗ ដែលមានតួនាទីក្នុងរាជរដ្ឋាភិបាល និងក្នុងគណ បក្សប្រជាជនកម្ពុជា។ ដូច្នេះ គណបក្សសង្គ្រោះជាតិអាចពិបាក នឹងធ្វើកំណែទម្រង់ដីធ្លីឬចាប់ឧកញ៉ានិងមន្ត្រីពាក់ព័ន្ធទាំងនោះយកមកផ្តន្ទាទោស ។ ពិសេស ក្រុមហ៊ុនដែលទទួលដីសម្បទាន សេដ្ឋកិច្ចច្រើនជាងគេនោះ គឺជាក្រុមហ៊ុនវៀតណាម និងក្រុម ហ៊ុនចិន ដែលជាប្រទេសមានឥទ្ធិពលមកលើគណបក្សកាន់ អំណាច។
ដូច្នេះការដោះស្រាយវិបត្តិដីធ្លីបានជោគជ័យ ឬមិនជោគ ជ័យ គឺអាស្រ័យទៅលើបក្សកាន់អំណាចមានឆន្ទៈពិតប្រាកដ ដោះស្រាយរឿងនេះដែរឬអត់ ? និយាយអីចឹងមិនមែនផាត់ ចោលមិនទទួលស្គាល់តួនាទីរបស់បក្សប្រឆាំងនោះឡើយ ។
អ្នកវិភាគយល់ឃើញថា គណបក្សទាងពីរចៀសមិនផុតពី ការចាប់ដៃគ្នាដោះស្រាយបញ្ចប់វិបត្តិដីធ្លីនោះឡើយគឺប្រៀបដូច ជាទូកនិងច្រវា បើចង់ចេញដំណើរតាមផ្លូវទឹកលុះត្រាតែមាន ទូក និងច្រវា ទើបអុំទៅមុខរួច ។
បក្សប្រឆាំងដើរតួនាទីជាអ្នកឃ្លាំងមើលបក្សកាន់អំណាច ត្រូវតែដោះស្រាយវិបត្តិដីធ្លី និងអនុវត្តន៍ច្បាប់ឱ្យមានប្រសិទ្ធ ភាព ទើបអាចទទួលបានការគាំទ្រពីប្រជាពលរដ្ឋ ហើយកម្ពុជា ត្រូវតែប្រែក្លាយភាពតានតឹងឱ្យទៅជាឱកាសពិតប្រាកដសម្រាប់ ភាពរីកចំរើននៃលទ្ធិប្រជាធិបតេយ្យ និងសេដ្ឋកិច្ចនៅកម្ពុជា ៕
