អន្តរជាតិ ៖ ពិតជារកអុសប្រទះឈើងាប់មែន ថ្នាំញៀនប្រភេទយ៉ាម៉ាប្រមាណជិត៣ម៉ឺនគ្រាប់ត្រូវបានគេប្រទះឃើញដោយមិនបាច់ខំប្រឹងរក ខណៈដែលក្រុមហ៊ុនអគ្គីសនីរបស់ប្រទេសថៃ បានចុះធ្វើការរំកិលបង្គោលភ្លើង ដោយបានជីករណ្តៅជម្រៅប្រមាណជាងមួយម៉ែត្រ ក៏បានប្រទះឃើញថ្នាំញៀននេះតែម្តង ដោយមិនដឹងថាជនណាមួយបានជីកដីកប់វាតាំងពីពេលណាមកនោះទេ ។
យោងតាមរបាយការណ៍របស់ភាគីថៃ បានបញ្ជាក់ថា នៅព្រឹកថ្ងៃទី១៧ ខែវិច្ឆិកា ឆ្នាំ២០១៧ ក្រុមហ៊ុនប៉ាមថង បានចុះទៅកាន់ភូមិ២ ឃុំណងវ៉ែង ស្រុកវឌ្ឍនាណៈខន ខេត្តស្រះកែវ ប្រទេសថៃ ដើម្បីធ្វើការរំកិលបង្គោលភ្លើងមួយដើមដែលមានបញ្ហា ដើម្បីទៅដាំនៅកន្លែងផ្សេង ក្បែៗទីតាំងចាស់នោះដែរដើម្បីអោយឃ្លាតពីផ្លូវសាធារណៈ ។ ខណៈដែលក្រុមកម្មករកំពុងធ្វើការជីករណ្តៅបានជម្រៅជាងមួយម៉ែត្រទៅហើយនោះក៏ស្រាប់តែបានប្រទះឃើញប្រអប់កែសមួយ ដែលស្រោបដោយថង់ផ្លាស្ទិកព៌ណខ្មៅនិងដោយសារតែមានការប៉ះទង្គិចជាមួយនឹងឧបករណ៍ជីករណ្តៅផងនោះ ទើបធ្វើអោយថង់នោះត្រូវបែកធ្លាយ ធ្លាយចេញមកខាងក្រៅ នូវថ្នាំញៀនប្រភេទយ៉ាម៉ាមួយចំនួនផង ទើបកំលាំងរាយការណ៍ទៅសមត្ថកិច្ចតម្រួតខេត្តស្រះកែវ និងតម្រួតនៃអធិការដ្ឋាន
ស្រុកវឌ្ឍនាណៈខន ដើម្បីចុះទៅពិនិត្យនៅក្នុងរណ្តៅនោះ ។
ជំហានដំបូងគឺសមត្ថកិច្ថបានសន្និដ្ឋានថា ថ្នាំញៀននេះអាចមានចំនួន៣ម៉ឺនគ្រាប់ទៅតាមលក្ខណៈ នៃការវេចខ្ចប់ ប៉ុន្តែក្រោយពីបានប្រគល់ទៅអោយកំលាំងជំនាញនៃអធិការដ្ឋានតម្រួតវឌ្ឍនាណៈខន ដើម្បីយកទៅត្រួតពិនិត្យនិងរាប់សារថ្មី ទើបទទួលបានលទ្ធផលសរុប មានចំនួន ២៧ ៩១១ គ្រាប់ ដោយបច្ចុប្បន្នសមត្ថកិច្ចថៃកំពុងសិក្សា និងស្រាវជ្រាវរកមុខសញ្ញាដែលយកថ្នាំញៀននេះទៅកប់ក្នុងដី ដើម្បីយកមកផ្តន្ទាទោសទៅតាមផ្លូវច្បាប់ ៕
