កំពង់ធំ ៖ មេព្រៃសង្កាត់រដ្ឋបាលព្រៃឈើតាំងក្រសាំង ក្រោមការបញ្ជាផ្ទាល់ពីលោកមុំ សុផល នាយផ្នែករដ្ឋបាលព្រៃឈើកំពង់ថ្ម ខេត្តកំពង់ធំ ធ្វើការចាប់ឃាត់ទ្រាក់ទ័រដឹកឈើប្រភេទតាត្រាវដែលជាប្រភេទឈើកម្រ ដែលត្រូវច្បាប់បានហាមឃាត់យ៉ាងតឹងរឹង នៅបណ្តោយផ្លូវក្រាលគ្រោះក្រហម ស្ថិតនៅភូមិខ្វែក ឃុំកំពង់ថ្ម ស្រុកសន្ទុក ខេត្តកំពង់ធំ នៅព្រឹកថ្ងៃទី២០ ខែវិច្ឆិកា ឆ្នាំ២០១៧ និងបានរិបអូសយកមករក្សាទុកនឹងធ្វើការវាស់វែងនៅផ្នែករដ្ឋបាលព្រៃឈើកំពង់ថ្ម។ហើយឃាត់ខ្លួនតៃកុងម្នាក់ឈ្មោះ សាំង ប៉ែត ទីលំនៅភូមិពង្រ ឃុំពង្រ ស្រុកបារាយណ៍ ខេត្តកំពង់ធំ និងកំពុងធ្វើការសាកសួរនៅផ្នែករដ្ឋបាលព្រៃឈើកំពង់ថ្ម។
លោកម៉ុំ សុផល នាយផ្នែករដ្ឋបាលព្រៃឈើកំពង់ថ្មបានឱ្យដឹងថា វត្ថុតាងដែលរឹបអូសបានជាប្រភេទឈើតាត្រាវ មានចំនួន១២ដុំស្មើរ២.៩៥៥ម៉ែត្រគូប។
នៅព្រឹកថ្ងៃដដែលនេះដែរ កម្លាំងអាវុធហត្ថស្រុកបារាយណ៍សហការជាមួយសង្កាត់រដ្ឋបាលព្រៃឈើបារាយណ៍ បានធ្វើការដេញចាប់រថយន្តកាមរីគូទហើមពណ៏ស្លែ១គ្រឿង ស្លាកលេខកណ្តាល2A2678 ដឹកឈើប្រណិតប្រភេទឈើធ្នង់ តាមបណ្តោយផ្លូវជាតិលេខ៦ នៅចំណុចទល់មុខមូលដ្ឋានកងរាជអាវុធហត្ថស្រុកបារាយណ៍។ក្នុងនោះរឹបអូសរថយន្តនឹងឈើប្រណិតប្រភេទធ្នង់ចំនួន១០ដុំធំតូច ហើយឃាត់ខ្លួនមនុស្ស២នាក់បញ្ជួនមកផ្នែករដ្ឋបាលព្រៃឈើកំពង់ថ្ម។ទី១ឈ្មោះចាន់ សំអុល ភេទប្រុស អាយុ៣២ឆ្នាំ ទី២ឈ្មោះអ៊ឹម សារិទ្ធ ភេទប្រុស អាយុ២៧ឆ្នាំ អ្នកទាំងពីរមានទីលំនៅភូមិ វាអំពុក ឃុំព្រះឃ្លាំង ស្រុកត្បែងមានជ័យ ខេត្តព្រះវិហារ៕
