កំពង់ធំ ៖ ពុទ្ធបរិស័ទនិងប្រជាពលរដ្ឋរាប់រយគ្រូសារកើតទុក្ខមិនសុខចិត្តមិនអាចទទួលយកបាន ព្រមទាំងបានរិះគន់ចំពោះការដោះស្រាយរបស់លោកអភិបាលស្រុកសណ្តាន់ថា គ្មានភាពសុក្រិត គ្មានភាពយុត្តិធម៍ គ្មានតុល្យភាព មិនអាចទទួលយកបាន ដោយសារតែនៅព្រឹកថ្ងៃទី១៥ ខែវិច្ឆិកា ឆ្នាំ២០១៧កន្លងទៅ លោក ឡង់ គីសឹង អភិបាលស្រុកសណ្ដាន់ ខេត្តកំពង់ធំ បានអញ្ជើញមកដោះស្រាយទំនាស់ (រឿងរ៉ាវចៅអធិការវត្ត និងអាចារ្យគណៈកម្មការវត្តឈើទាល ដែលឈ្លោះគ្នា ដោយសារលាភសក្ការៈ) នៅក្នុងវត្តឈើទាល ភូមិឈើទាល ឃុំឈើទាល ស្រុកសណ្តាន់ ខេត្តកំពង់ធំ ក្នុងខណ:ពេលដែលចៅអធិការវត្ត ព្រះតេជគុណ វន លន់ បានធ្វើសង្ឃទាន និងបុណ្យឆ្លងកុដិបណ្តោះអាសន្ននោះ ដោយមានអ្នកចូលរួមមានទាំងព្រះសង្ឃនិងឧបាសក ឧបាសិកាប្រមាណជាង៤០( អង្គ/នាក់) សុទ្ធសឹងតែជាសាច់ញាតិញោមលោកទាំងអស់ ឲ្យលើកដៃគាំទ្រចៅអធិការវត្តបន្តទៀត ខណៈពេលនោះ លោក អភិបាលស្រុកបានសម្រេចរំលាយរំសាយ អាចារ្យគណ:កម្មការវត្តចោល ហើយរក្សាចៅអធិការវត្តឲ្យនៅគង់ក្នុងវត្តដ៏ដែល ទើបធ្វើឲ្យអាជ្ញាធរភូមិ ឃុំ និងប្រជាពលរដ្ឋ ពុទ្ធបរិស័ទចំណុះជើងវត្តឈើទាលបានរិះគនខ្លាំងៗ ចំពោះអភិបាលស្រុកថា ការដោះស្រាយនេះគ្មានភាពយុត្តិធម៍ ប្រៀបដូចជាការសំដែងដើម្បីបំភាន់ភ្នែកមហាជន។
ពលរដ្នបានបង្ហើបប្រាប់ថា ប្រសិនបើចៅអធិការព្រះតេជគុណ វន លន់ នៅតែគង់ក្នុងវត្ត ហើយកាន់បច្ច័យកសាងនោះ ពុទ្ធបរិស័ទមិនពេញចិត្ត និងមិនទុកចិត្តធ្វើបុណ្យនោះទេ ព្រោះវាខុសទៅនិងដំណោះស្រាយនៅរសៀលថ្ងៃទី១០ ខែវិច្ឆិកា ឆ្នាំ២០១៧ ក្នុងវត្តទឹកម្លាងកន្លងទៅ គឺក្រោមអធិបតីភាពព្រះទេពសត្ថា សៀង សុខ ព្រះរាជាគណៈថ្នាក់ចត្វា និងព្រះសត្ថាបារមី ព្រះមេគណខេត្តកំពង់ធំបាននិមន្តចូលរួម និងមានការចូលរួមពីអភិបាលស្រុក មន្ទីរធម្មការនិងសាសនាស្រុក អាជ្ញាធរភូមិឃុំ ព្រមទាំងអាចារ្យគណ:កម្មការវត្ត ដែលកាលណោះសម្រេចរំលាយរំសាយអាចារ្យគណ:កម្មការ និងចៅអធិការចោលរួចហើយៗឲ្យអាជ្ញាធរដែលពាក់ព័ន្ធរៀបចំឯកសារជាថ្មី ។
ប្រជាពលរដ្ឋនិងពុទ្ធបរិស័ទចំណុះជើងវត្តរាប់រយនាក់បានលើកឡើងទៀតថា បើនៅតែដោះស្រាយរបៀបកាន់ជើងបុគ្គលមួយចំនួននោះ វានិងធ្វើឲ្យបះពាល់ដល់ផលប្រយោជន៏រួមនៃសាសនាជាមិនខាន ហើយក៏មិនអាចមានស្ថេរភាពបានដែរ។ ក្នុងនោះប្រជាពលរដ្ឋនិងពុទ្ធបរិស័ទដែលរស់នៅក្នុងភូមិ បានអំពាវនាវដល់អាជ្ញាធរគ្រប់ជាន់ថ្នាក់មេត្តាជួយរកដំណោះស្រាយជំលោះដ៏រាំរ៉ៃប្រមាណជាង១ឆ្នាំមកហើយ ឲ្យបានសមស្របដែលអាចទទួលយកបាន និងប្រសិនបើចង់អោយពុទ្ធសាសនាមានភាពរីកចំរើនទៅបាន ក៏អាស្រ័យដោយព្រះសង្ឃ ប្រជាពលរដ្ឋ ពុទ្ធបរិស័ទ ឧបាសក ឧបាសិកាផងដែរ ចុះបើអ្នកទាំងអស់គ្នាមិនចុះសម្រុងគ្នាផងនោះ មិនអាចអោយសាសនាមានភាពរីកចំរើនបានដែរ។
ពាក់ព័ន្ធនិងរឿងរ៉ាវទាំងនេះ លោក ឡង់ គីសឹង ធ្លាប់បានប្រាប់ក្នុងកិច្ចសម្ភាសថា គ្មានការបិទវត្តអារាមរយះពេល៣ខែនោះទេ ចំពោះវិវាទរវាងចៅអធិការ និងគណៈកម្មា នេះបានសម្របសម្រួលច្រើនដងហើយ តែពេលនេះយើងបាននិមន្ដព្រះសង្ឃចេញពីវត្តហើយ ហើយរំលាយគណៈកម្មាវត្តចោល រួចរើសថ្មី ដើម្បីបញ្ចប់វិវាទនេះ៕
