ខេត្តស្ទឹងត្រែង ៖ មេព្រៃខេត្តស្ទឹងត្រែង បានប្រដេញស្ទាក់ចាប់រថយន្តដឹកជញ្ជូនឈើមួយគ្រឿង ប្រភេទកាមរីស្វិត ពណ៌ប្រផេះ ពាក់ស្លាកលេខ ង-4950ភព កែច្នៃកាត់ដំបូលខាងក្រោយ ដឹកជញ្ជូនឈើប្រណិតប្រភេទឈើធ្នុង និងឈើនាងនួនពេញប្រៀប កាលពីម៉ោងជាង៥ល្ងាច ថ្ងៃ១២ វិច្ឆិកា ២០១៧។រថយន្តដឹកជញ្ជូនឈើមួយគ្រឿង ដែលរងការបង្ក្រាបនៅពេលនោះ ជារបស់អតីតមន្ត្រីនគរបាលខេត្តស្ទឹងត្រែងម្នាក់ ហើយរថយន្តនេះត្រូវបានបង្ក្រាបនៅពេលកំពុងដឹកជញ្ជូនឈើ នៅលើដងផ្លូវក្រាលគ្រួសក្រហម១ខ្សែ ផ្លូវមន្ទីរធម្មការនិងសាសនាខេត្ត នៅជិតផ្លូវជាតិលេខ៧។
មូលហេតុដែលឈានដល់ការបង្ក្រាបរថយន្តដឹកឈើនោះ គេបានដាក់ការសង្ស័យថា មន្ត្រីព្រៃឈើទាំងនោះ មិនទទួលបានលាភសក្ការៈពីឈ្មួញដឹកឈើ ទើបនាំគ្នាចាប់ឃាត់យកស្នាដៃ ព្រោះឈ្មួញនោះរកស៊ីយូរហើយមិនដែលមានផលរមាស់ ទើបតែជាប់អន្ទាក់នៅពេលនេះ។
ប្រភពបានបន្តទៀតថា មន្ត្រីព្រៃឈើនៅគ្រានោះ មិនបានឃាត់ខ្លួនជនសង្ស័យដឹកឈើនោះទេ គឺចាប់បានតែរថយន្តដឹកឈើ ចំណែកអ្នកដឹកឈើរត់គេចខ្លួនបានយ៉ាងរីករាយ ។ ប្រជាពលរដ្ឋសង្ឃឹមថា សមត្ថកិច្ចនឹងបន្តបើកការស្រាវជ្រាវ ដើម្បីស្វែងរកម្ចាស់រថយន្តដឹកឈើនោះ ឱ្យចូលខ្លួនមកបង់ពិន័យអន្តរកាល តាមច្បាប់ ស្តីពីព្រៃឈើ មិនឲ្យរួចខ្លួនងាយនោះឡើយ៕
