បន្ទាយមានជ័យ ៖ សមត្ថកិច្ចថៃបានរកឃើញឈើគ្រញូងក្នុងរទេះបញ្ជូនទំនិញរបស់កម្មករខ្មែរម្នាក់ នៅច្រកទ្វារអន្តរជាតិ ស្រុកអារញ្ញ ខេត្តស្រះកែវ ទល់មុខនឹងច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ កាលពីថ្ងៃទី០៨ ខែវិច្ឆិកា ឆ្នាំ២០១៧។ ប្រសិនបើសមត្ថកិច្ចសៀមមិនបង្ក្រាបទេនោះ គឺឈើគ្រញូងនឹងត្រូវគេអូសតាមរទេះ ឆ្លងដែនពីទឹកដីថៃចូលទឹកដីខ្មែរ និងធ្វើចរាចរណ៏ទៅស្រុកយួនដោយរលូនជាមិនខាន ដោយហេតុថាឈ្មួញដឹកជញ្ជូនឈើគ្រញូងពីទឹកដីសៀមចូលទឹកដីខ្មែរ តាមច្រកទ្វារអន្តរជាតិប៉ោយប៉ែត មានការឃុបឃិតសម្របសម្រួលជាមួយសមត្ថកិច្ចជាច្រើនស្ថាប័នប្រចាំច្រកនេះ ហើយមានការបែងចែកផលប្រយោជន៍យ៉ាងត្រជាក់ល្ហឹមថែមទៀតផង។
ប្រភពនៅច្រកប៉ោយប៉ែតបានឲ្យដឹងថា ឈ្មួញដែលតែងធ្វើសកម្មភាពដឹកជញ្ជូនឈើគ្រញូងចូលទឹកដីខ្មែរមានឈ្មោះ កុសល ហើយមានឃ្លាំងស្តុកឈើនៅចំណុចខាងលិចវត្តបាលិលេយ្យ និងមួយកន្លែងទៀតនៅក្នុងឃ្លាំងស្តុកទំនិញចំណុចដីថ្មី ដោយមានរទេះដឹកទំនិញជាច្រើនប៉ុន្តែរទេះទាំងនោះមិនដែលចតនៅទីលានត្រួតពិនិត្យរបស់មន្ត្រីជំនាញដូចរទេះកម្មករផ្សេងៗទៀតនោះទេ គឺពួកគេអូសរទេះចេញពីថៃចូលទឹកដីខ្មែរ ហើយទៅដល់គោលដៅយ៉ាងរលូន សមត្ថកិច្ចគយ នគរបាលអន្តោប្រវេសន៍ប្រចាំច្រកប៉ោយប៉ែត និងសមត្ថកិច្ចពាក់ព័ន្ធផ្សេងៗទៀតត្រូវបានគេសង្សយ័ថា ជាអ្នកឃុបឃិតសម្របសម្រួលឲ្យឈ្មួញឈ្មោះ កុសល ដឹកជញ្ជូនឈើគ្រញូងចូលតាមច្រកទ្វារអន្តរជាតិប៉ោយប៉ែតបានដោយជោគជ័យ។
បើតាមសេចក្ដីរាយការណ៍បានឲ្យដឹងដែរថា ឈ្មួញឈ្មោះ កុសល មានខ្នងបង្អែកក្រាស់ឃ្មឹក ទើបអាចដឹកជញ្ជូនឈើគ្រញូងពីទឹកដីថៃចូលទឹកដីខ្មែរ ហើយការបង្ក្រាបកាលពីថ្ងៃទី០៨ ខែវិច្ឆិកា ឆ្នាំ២០១៧ គឺជាចំណាត់ការរបស់សមត្ថកិច្ចថៃ អាចថាជាពាលស៊ីពាល ទើបបើកធ្លាយដឹងដល់សមត្ថកិច្ចថៃចេញបង្រ្កាប។
ប្រជាពលរដ្ឋនៅឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ក៏បានឲ្យដឹងថា កាលពីថ្ងៃទី០៧ ខែវិច្ឆិកា ឆ្នាំ២០១៧ ក្រុមគយចល័តខេត្តបន្ទាយមានជ័យ ក៏បានបង្ក្រាបរថយន្តនីសាន់ដឹកឈើគ្រញូង១គ្រឿងដែលឆ្លងដែនពីទឹកដីសៀមផងដែរ។ បញ្ហាខាងលើនេះបង្ហាញយ៉ាងច្បាស់ថា បទល្មើសឆ្លងដែនក្នុងខេត្តបន្ទាយមានជ័យ នៅតែកើតឡើងយ៉ាងពេញបន្ទុក ទោះបីថ្នាក់ដឹកនាំក្រសួងមហាផ្ទៃ បានបញ្ជាឲ្យបិទច្រករបៀងតាមព្រំដែនខ្មែរ-ថៃ ក្នុងខេត្តបន្ទាយមានជ័យទាំងស្រុង ក៏ប៉ុន្តែដូចចាក់ទឹកលើស្លឹកឈូក ជាក់ស្ដែងច្រករបៀងជាច្រើនកន្លែងនៅតែត្រូវសមត្ថកិច្ចប្រចាំច្រកទាំងនោះបើកដៃឲ្យឈ្មួញនាំចូលទំនិញគេចពន្ធ ទំនិញខុសច្បាប់ និងឈើគ្រញូងយ៉ាងអនាធិបតេយ្យចូលមកកម្ពុជា៕
