មណ្ឌលគិរី ៖ ប្រភពព័តមានឲ្យដឹងថា កម្លាំងយោធានិងប៉ូលីសព្រំដែនប្រចាំស្រុកកែវសីមា ខេត្តមណ្ឌលគីរី បានសហការគ្នាលួចឈូសឆាយផ្លូវមួយខ្សែស្ងាត់ៗ ស្ថិតនៅក្នុងភូមិឡាប៉ាខេ ឃុំស្រែខ្ទុម ស្រុកកែវសីមា ខេត្តមណ្ឌលគិរី ដោយគ្មានគោលការណ៏អនុញ្ញាតពីក្រសួងនិងថ្នាក់ខេត្តនោះឡើយ។តាមព័ត៌មានច្បាស់ការបានឲ្យដឹងថា ការឈូសឆាយផ្លូវមួយខ្សែស្ងាត់ៗនេះ គឺពួកគេទុកសម្រាប់ឲ្យក្រុមឈ្មួញឈើទុច្ចរិតលួចដឹកឈើខុសច្បាប់ បណ្តាលឲ្យមជ្ឈដ្ឋានសាធារណៈមានការភ្ញាក់ផ្អើលយ៉ាងខ្លាំង និងធ្វើឲ្យផ្អើលដល់សមត្ថកិច្ចខេត្តចុះត្រួតពិនិត្យ។
ពាក់ព័ន្ធករណីនេះ សមត្ថកិច្ចជំនាញទូទាំងខេត្តមណ្ឌលគិរី បានចុះស៊ើបអង្កេតហើយបានរកឃើញថា ពិតជាមានការលួចឈូសឆាយផ្លូវលំថ្មីមួយខ្សែពិតមែន ស្ថិតនៅភូមិឡាប៉ាខេ ឃុំស្រែខ្ទុម ស្រុកកែវសីមា ខេត្តមណ្ឌលគិរី ឆ្ពោះទៅកាន់ចំណុចប៉ុស្តិ៍របៀងការពារព្រំដែនកម្ពុជាវៀតណាម ត្រង់ចំណុចប៉ុស្តិ៍យូលិត ក្នុងឃុំស្រែខ្ទុម ស្រុកកែវសីមា ដែលមានឈ្មោះ វាន់ ចន្ធារី ជាមន្ត្រីយោធាព្រំដែន និងមេបញ្ជាការកងអនុសេនាតូចទី២ របស់កងអនុសេនាធំទី២ វរៈកាពារព្រំដែន ១០៣ ឈរជើងប្រចាំការនៅច្រករបៀងខាងលើនោះ ដែលគ្រប់គ្រងផ្ទាល់ពីលោក សឹម សំណាង ជាមេបញ្ជាការ គ២ ។
ចំណែកមន្ត្រីនគរបាលមាន លោក ប៊ូ សំអុល ហៅសាន មានតួនាទីជាប្រធានប៉ុស្តិ៍ឡាប៉ាខេ គ្រប់គ្រងច្រករបៀងការពារព្រំដែនជាច្រើននៅស្រុកកែវសីមា។ មន្ត្រីទាំង ៣រូបខាងលើ ត្រូវបានគេអះអាងថា ជាអ្នកជាប់សង្ស័យពាក់ព័ន្ធក្នុងការលួចឈូសឆាយធ្វើផ្លូវលំគ្មានការអនុញ្ញាត ទៅកាន់ព្រំដែនវៀតណាមប្រវែងចន្លោះពី៤គីឡូម៉ែត្រ ទៅ៥គីឡូម៉ែត្រ ដើម្បីសម្រួលការដឹកជញ្ជូនបទល្មើសព្រៃឈើឆ្លងដែន។
លោក ស្វាយ សំអាង អភិបាលខេត្តមណ្ឌលគីរីបានថ្លែងប្រាប់អ្នកសារព័ត៌មានថា ខេត្តនឹងកោះហៅមន្ត្រី ឬបុគ្គលណា ដែលមានការជាប់ពាក់ព័ន្ធក្នុងរឿងនេះ ធ្វើការសាកសួរទៅតាមនីតិវិធីក្នុងពេលឆាប់ៗនេះ ។ លោកអះអាងថា ចំពោះមន្ត្រីសាលាស្រុក និងមន្ត្រីជំនាញមួយចំនួនផ្សេងទៀត ដែលមានតួនាទីទទួលខុសត្រូវ នៅក្នុងតំបន់ស្រុកមួយនេះ ក៏ត្រូវកោះអញ្ជើញមកសួរនាំផងដែរ ។
យ៉ាងណាក៏ដោយ មជ្ឈដ្ឋានទូទៅបានសង្កត់ធ្ងន់លើអាជ្ញាធរស្រុកកែវសីមា រួមទាំងមន្ត្រីជំនាញរដ្ឋបាលព្រៃឈើថា បានពាក់ព័ន្ធយ៉ាងជ្រៅ ចំពោះបទល្មើសមួយនេះ ត្រូវទទួលខុសត្រូវចំពោះមុខច្បាប់ ដោយមិនត្រូវលើកលែងនោះឡើយ ចំពោះការលួចឈូសឆាយផ្លូវមួយខ្សែស្ងាត់ៗស្ថិត នៅក្នុងភូមិឡាប៉ាខេ ឃុំស្រែខ្ទុម ស្រុកកែវសីមា ខេត្តមណ្ឌលគិរី ដោយគ្មានគោលការណ៍ ការ អនុញ្ញាត ពីក្រសួង និងថ្នាក់ខេត្ត ៕
