កំពង់ធំ ៖ មេឈ្មួញរកស៊ីដឹកជញ្ជូនឈើនៅទឹកដីស្រុកសណ្តាន់ដុះស្លែ ហៅយាយយ៉ុន ល្បីដឹកឈើចេញគ្មានសមត្ថកិច្ចណាហ៊ានបង្ក្រាប ពេលនេះកម្លាំងឧទ្យានុរក្សស្ទាក់ចាប់បាន រថយន្តដឹកឈើពុះដាក់ខាងលើ បង្កប់ឈើក្តាខាងក្រោមចំនួន៥ម៉ែត្រគូប នៅតំបន់អូរក្រញូង ឃុំសុចិត្រ ស្រុក សណ្តាន់ ខេត្តកំពង់ធំ។
ដោយឡែក កម្លាំងឧទ្យានុរក្សបានស្ទាក់ឃាត់បានរថយន្តបុកស័រមួយគ្រឿងនិងរថយន្តកូរេពីរតោនកន្លះ ដឹកឈើទ្វារបង្អួចអត់ច្បាប់ នៅចំនុចស្ទឹងពង្រោង ភូមិសាស្ត្រស្រុកសណ្តាន់ផងដែរ។ការចុះបង្ក្រាបករណីទាំងពីរធ្វើឡើងជាបន្តបន្ទាប់ថ្ងៃទី៣-៤ ខែវិច្ឆិកា ឆ្នាំ២០១៧នៃឱកាសពិធីបុណ្យអុំទូក ដោយកម្លាំងឧទ្យានុរក្សនិងកិច្ចសហការល្អពីភា្នក់ងារផ្តល់ព័ត៌មាន ហើយឈានដល់ការបង្ក្រាបវត្ថុតាងបញ្ជូនទៅរក្សាទុកនៅមន្ទីរបរិស្ថានខេត្តដើម្បីដោះស្រាយតាមនិតិវិធីច្បាប់។
លោកស៊ាន គឹមស៊ន ប្រធានក្រុមចល័តមន្ត្រីឧទ្យានុរក្ស បានបញ្ជាក់ប្រាប់ថា ម្ចាស់រថយន្តដឹកឈើពុះបង្កប់ឈើក្តាក្រោមនោះ ពិតជាឈ្មោះហៅយាយ យ៉ុន បានចុះពីលើរថយន្តដឹកឈើ រត់គេចខ្លួនពេលឃើញកម្លាំងឧទ្យានុរក្សស្ទាក់បង្ក្រាប។ប្រភពពីទីភ្នាក់ងារនិងប្រជាពលរដ្ឋនៅតំបន់នោះបានបញ្ជាក់ទៀតថា ឈ្មួញដឹកឈើឈ្មោះយាយ យ៉ុន នេះរកស៊ីរបរខុសច្បាប់នេះដុះស្លែយូរណាស់មកហើយ ដឹកឈើចេញពីក្នុងភូមិសាស្ត្រគ្រប់គ្រងដោយនាយផ្នែកទំរីង គឺលោក សៅ វ៉ាន្នី ដែលមិនដែលឃើញ ជំនាញសមត្ថកិច្ចយកចិត្តទុកដាក់បង្ក្រាបបទល្មើសកើតឡើងលើទឹកដីគ្រប់គ្រងរបស់ខ្លួននោះឡើយ។
ដោយសារតែបទល្មើសដឹកជញ្ជូនឈើចេញហូរហែពីតំបន់គ្រប់គ្រងរបស់នាយផ្នែកសណ្តាន់ អសកម្មនោះហើយ ទើបមហាជនសង្ស័យថា៖ជំនាញសមត្ថកិច្ចមេព្រៃនៅតំនប់ទំរីង ស្រុកសណ្តាន់ ទំនងជាឃុបឃិតត្រូវរ៉ូវគ្នាជាមួយឈ្មួញរកស៊ីឈើអស់ហើយ បានជាបិទភ្នែកដេកលក់ស្កប់ស្កល់។ប្រជាពលរដ្ឋសំណូមពរដល់ថ្នាក់ដឹកនាំពាក់ពន្ធជួយចាក់ចង្កេះដាស់តឿន ដល់មន្ត្រីជំនាញនៅតំបន់ទំរីងភ្ញាក់ខ្លួន យកចិត្តទុកដាក់ចំពោះតួនាទីភារកិច្ចរបស់ខ្លួន ធ្វើការទប់ស្កាត់និងបង្ក្រាបបទល្មើសព្រៃឈើ រួមចំណែកការពារផលប្រយោជន៍សង្គមផង៕
