បាត់ដំបង ៖ ប្រជាពលរដ្ឋ ៦៥ គ្រួសារនេះ រស់នៅចំណុចអូរឬស្សី-អង្គ្រង-កណ្តាល-ភ្នំកាពិញ-ភ្នំសំរោង-ភ្នំក្បាលខ្មោច ស្ថិតក្នុងភូមិសំរោងឃុំឆ្នាល់មាន់ស្រុកគាស់ក្រឡខេត្តបាត់ដំបង កាលពីរសៀលថ្ងៃទី២២ ខែសីហា ឆ្នាំ២០១៤ ឲ្យដឹងថា លោក សង ថន ដែលពីមុនគេទទួលស្គាល់ជាឧញ៉ា ត្រូវរងការិះគន់ថាទន្ទ្រានយកដីដាំដុះប្រជាពលរដ្ឋ៦៥គ្រួសារ យកគ្រឿងចក្រកាប់ទន្ទ្រានឈូសឆាយដីព្រៃយកជាកម្មសិទ្ធផ្ទាល់ខ្លួន។
ប្រជាពលរដ្ឋថាដីព្រៃនៅចំណុចកើតហេតុសម្បូរសត្វព្រៃជាច្រើនប្រភេទជាពិសេសសត្វក្ងោកមានទាំងហ្វូងៗពេលដែលោកសងថនបានយកគ្រឿងចក្រកាប់បំផ្លាញព្រៃទាំងនោះបណ្តាលអោយសត្វព្រៃបានរត់ហោះហើរបាត់អស់។មិនត្រឹមតែកាប់ព្រៃដែលគ្មានអ្នកគ្រប់គ្រងទេលោកបានកាប់ដំណាំពោតចំនួន១១គ្រួសារហើយប្រជាពលរដ្ឋប្តឺងអជ្ញាធរមិនមានចំណាត់ការ។រឿងគួរអាណិតអាសូរ២នាក់ប្តីប្រពន្ធដែលតស៊ូរស់នៅស៊ីឈ្នួលគេទាំងស៊ីអត់ស៊ីឃ្លានយូរឆ្នាំមកហើយមិនមានមុងភួយឬសំលៀកបំពាក់គ្រប់គ្រាន់បានដាំពោតដុះបានបន្តិចបន្តួចហើយត្រូវលោកសងថនយកគ្រឿងចក្រឈូសឆាយបំផ្លាញចោលនិងមានបំណងយកដីលំនៅដ្ឋានពួកគាត់ទៀត។
ឈ្មោះឡូនឈឿនហៅពៅអាយុ៣៦ឆ្នាំនិងប្រពន្ធឈ្មោះដូងរ៉េតអាយុ៣៤ឆ្នាំមានកូនតូច៣នាក់រស់នៅចំណុចអង្គ្រងបានអោយដឹងថាពួកគាត់ជាជនក្រីក្រអត់ដីពី មុនមិនទាន់មានកូនស៊ីឈ្នួលកាប់គាស់ដាំដុះអោយគេក្រោយមកឆ្នាំ២០០៥បានសម្ងំកាប់ព្រៃនិងកាំបិតពូថៅធ្វើខ្ទមនៅរហូតបានដី២ហិកតា(មិនទាន់ស្រឡះល្អទេ)និងមានកូន៣នាក់។នៅខែកក្កដាឆ្នាំ២០១៤បានដាំពោតតាមគន្លងព្រៃបានជិត១ហិកតាដុះបានប្រហែល២តឹកមិនមានភ្លៀងធ្លាក់ទៀតស្រាប់តែចុងខែសីហានេះលោកសងថនបានយកគ្រឿងចក្រមកឈូសលើដំណាំពោតព័ទ្ធធ្វើព្រំថាជាដីរបស់គាត់។
លោក ប៊ុន សារ៉ាត់ យោធិនសោធននិវត្តន៍ (អតីតអនុបញ្ជាការតំបន់អភិវឌ្ឍន៍ភូមិភាគទី៥)បានអោយដឹងថាគាត់និងកូន៣គ្រួសារមានដី១០ហិកតាបានកំពង់ដាំដុះត្រូវលោកសងថនបានប្តឹងនិងយកគ្រឿងចក្រឈូសឆាយព័ទ្ធយកដីដោយចោទប្រជាជនជាអ្នកយករបស់គាត់ ។ លោក សងថន ប្តឹងប្រជាពលរដ្ឋជាច្រើនគ្រួសារជីកស្រះទឹក អោយសង១៥០០០ដុល្លា ព្រោះដីដែលប្រជាពលរដ្ឋនៅជាដីរបស់គាត់ ។
លោក ប៊ុន សារ៉ាត់ យោធិនសោធននិវត្តន៍បានអោយដឹងថា ដីចំណុចប្រជាពលរដ្ឋកំពង់រស់នៅនេះ មិនមែនជាដីលោកសងថនទេ។
លោក ទេស កែ ដែលមានដីនៅចំណុចនេះបានអោយដឹងថា រូបលោកក៏មានប័ណ្ណដីនៅចំណុចនេះដែរ ដែលរបបយោធាបែងចែកនិងបានដាំដុះអាស្រ័យផលទៀតផង ។ ក្នុងនាម ជាប្រជាពលរដ្ឋ៦៥គ្រួសារសូមលើកដៃសំពះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីជួយអន្តរាគមន៍រកយុត្តិធម៌ដល់ប្រជាពលរដ្ឋផង ។
លោក សង ថន បានបកស្រាយអោយអ្នកសារព័តមានក្នុងស្រុកដឹងតាមទូរស័ព្ទ កាលព្រឹកថ្ងៃទី ២៣ ខែសីហាថា ដីនៅចំណុចប្រជាជនតវ៉ាវាជាដីខ្ញុំបានទិញតាំងពីឆ្នាំ២០០៧ ពីមន្ត្រីការិយល័យស្រុករបបយោធិនសោធនម្នាក់ ៥ ហិកតាសរុបចំនួន ១០០ ហិកតា ។ លុះខែ៣ ឆ្នាំ២០១៣ ឈ្មោះ ទេស កែ ឈ្មោះ ប៊ុន សារ៉ាត់ ឈ្មោះ ផល អ៊ិត និងមនុស្ស១ចំនួនទៀតបាននាំគ្នាកាប់ឆ្កាលើដីខ្លួនដូច្នេះរូបខ្ញុំក៏ប្តឹងតែម្តង ។ ដីនៅចំណុចនេះ លោកមានសំបុត្រកាន់កាប់ត្រឹមត្រូវបើចង់បានឯកសារទៅយកពីតុលាការចុះ ។
លោក ស៊ិន ញ៉ា អភិបាលស្រុកគាស់ក្រឡបានអោយអ្នកសារព័ត៌មាន ដឹងតាមទូរស័ព្ទកាលរសៀលថ្ងៃទី២៣ ខែសីហា ថាដីនៅចំណុចកើតហេតុ លោក សង ថន មានឯកសារខ្លះវាយត្រាពីរូបលោកជាអភិបាលឯកសារខ្លះមានវាយត្រាឈ្មោះ ណុប វុឌ្ឍី ប្រធានសូរិយោដីស្រុកខ្លះទៀតគ្មានត្រាក៏មាន ។ ចំពោះការទំនាស់គ្នាជាមួយប្រជាពលរដ្ឋ រូបលោកបានអញ្ជើញលោក សង ថន មកសាលាស្រុក២ដង ដើម្បីសម្របសម្រួលជាមួយប្រជាពលរដ្ឋតែលោកមិនចូលខ្លួនដោះស្រាយ ។
ពាក់ព័ន្ធករណីនេះ មន្ត្រីរាជការនៅស្រុកគាស់ក្រឡមួយចំនួនមិនហ៊ានចេញមុខការពារប្រជាពលរដ្ឋ ដោយខ្លាចអំណាចលោក សង ថន ពីមុនមានងារជាឧញ៉ា បានបង្ហើបថា ដីដែលមានទំនាស់ពីមុនលោក សង ថន មានឈ្មោះកាន់កាប់មែន តែដោយមិនមានការអភិវឌ្ឍ ត្រូវបាននិរាករណ៍ចោល ទើបពេលនេះលក់ដីកន្លែងផ្សេងអស់ ក៏មកដណ្តើមយកដីទាំងនេះទៀត ។
ករណីវិវាទដីធ្លីខាងលើ សុំឲ្យអាជ្ញាធរខេត្តជួយដោះស្រាយជូនប្រជាពលរដ្ឋស្របតាមអនុសាសន៍ សម្តេចតេជោ ដែលបញ្ជាឲ្យអភិបាលខេត្ត ត្រូវដោះស្រាយនៅមូលដ្ឋានឲ្យចប់សព្វគ្រប់ ជៀសវាងប្រជាពលរដ្ឋឡើងមកតវ៉ានៅភ្នំពេញ ៕
