ខេត្តកំពង់ធំ ៖ កម្លាំងកងរាជអាវុធហត្ថស្រុកបារាយណ៍ ខេត្តកំពង់ធំបានឆែករថយន្តមួយគ្រឿង ដែលជាមុខបញ្ជាចាស់រកស៊ីដឹក ឈើប្រណីតតែបែជាប្រទះឃើញថ្នាំញៀនទៅវិញ ។
កាលពីថ្ងៃទី ២២ ខែសីហា ឆ្នាំ២០១៤ វេលាម៉ោង ១ និង៣០នាទីថ្ងៃត្រង់ កម្លាំងអ.ហស្រុកបារាយណ៍ដោយទទួល បានបទបញ្ជារបស់លោកវរៈសេនីយ៍ត្រី ឃុន ប៊ុនហួរ បានឃាត់រថយន្តម៉ាក បាឡែន ពណ៌ទឹកប្រាក់ ១គ្រឿង ពាក់ស្លាកលេខ ស្វាយរៀង.២A-០៥០៣ ធ្វើដំណើរពីត្បូងទៅជើងតាមបណ្តោយផ្លូវជាតិលេខ ៦ ដែលជាមុខសញ្ញាចាស់សង្ស័យមានការ លួចលាក់ដឹកឈើប្រណីតដើម្បីត្រួតពិនិត្យពុំឃើញមានឈើប្រណីតទេ តែបែជាមានគ្រឿងញៀនប្រភេទម៉ាទឹកកក មួយកញ្ចប់ ដបបំពង់ទុយោ និងដែកកេសទៅវិញ ។
ជនសង្ស័យជាម្ចាស់រថយន្តមានឈ្មោះ ឡាក់ ពៅ អាយុ ២៧ឆ្នាំ មានទីលំនៅភូមិវត្ត ឃុំស្រែណូយ ស្រុកវ៉ារិន ខេត្តសៀមរាប ។
បច្ចុប្បន្នជនសង្ស័យព្រមទាំងវត្ថុតាងគ្រឿងញៀន ត្រូវបានលោកវរៈសេនីយ៍ត្រី ឃុន ប៊ុនហួរ បញ្ជូនទៅកាន់បញ្ជា ការដ្ឋានកងរាជអាវុធហត្ថខេត្តកំពង់ធំ ដើម្បីចងក្រងសំណុំឯកសារនៅតាមនីតិវិធីច្បាប់ ។
គេសង្កេតឃើញថា ក្រុមអ្នករកស៊ីជូញដូរ និងដឹកជញ្ជូនបទល្មើសព្រៃឈើ ជាពិសេសតៃកុងរថយន្តដែលដឹកឈើ ប្រណីតខុសច្បាប់តែងតែប្រើប្រាស់គ្រឿងញៀន ដើម្បីពង្វក់ស្មារតីមិនខ្លាចងាប់បើកឡានលឿនផ្តាច់ព្រលឹងទៅឋានយមរាជ គេចចេញពីការតាមបង្ក្រាបរបស់សមត្ថកិច្ច ហើយករណីខាងលើសង្ស័យអ្នកបើកបរក៏មានការប្រើគ្រឿងញៀនដែរ ទើបបើក ឡានផ្តាច់ព្រលឹងមិនខ្លាចងាប់រហូតដល់ធ្លាក់ផ្លូវគេជពីការតាមបង្ក្រាបរបស់កម្លាំងអ.ហស្រុកបារាយណ៍ ។/ ដោយ ៖ តេច ឆេង
