ខេត្តកំពង់ធំ ៖ កាលពីថ្ងៃទី ១៨ ខែសីហា ឆ្នាំ២០១៤ វេលាម៉ោង ៥ទៀបភ្លឺ លោកវរៈសេនីយ៍ត្រី ឃុន ប៊ុនហួរ មេបញ្ជា ការកងរាជអាវុធហត្ថស្រុកបារាយណ៍បានដឹកនាំកងកម្លាំងអាវុធហត្ថស្រុកចុះប្រតិបត្តិការចាប់បានជនសង្ស័យពីរ នាក់ ដែលជាមុខសញ្ញាជួញដូរសត្វព្រៃ ព្រមទាំងវត្ថុតាងនៅតាមបណ្តោយផ្លូវជាតិលេខ ៦ ក្នុងភូមិសាស្ត្រភូមិព្នៅ ឃុំទ្រាល ស្រុកបារាយណ៍ ខេត្តកំពង់ធំ ។
តាមមន្ត្រីអ.ហស្រុកបារាយណ៍ បានឱ្យដឹងថា ជនសង្ស័យមានឈ្មោះ សេង សុខនីម ភេទស្រី អាយុ ៤៩ឆ្នាំ រស់នៅឃុំត្រពាំងប្ញស្សី ស្រុកកំពង់ស្វាយ ខេត្តកំពង់ធំ ជាអ្នកជួញដូរសត្វព្រៃ និងឈ្មោះ លឹម ស៊ីណូ ភេទប្រុស អាយុ ៣១ឆ្នាំ រស់នៅភូមិក្រចាប់ ឃុំក្រចាប់ ស្រុកស្ទឹងសែន ខេត្តកំពង់ធំ ជាអ្នករត់ម៉ូតូឌុប និងវត្ថុតាងដែលរឹបអូសបានរួម មាន ពស់វែង ចំនួន ៨ក្បាល មានទម្ងន់សរុប ១៤គីឡូក្រាម ពស់ សង់សឿ ១២ក្បាល មានទម្ងប់សរុប ១៩គីឡូក្រាម រួមទាំងម៉ូតូឌ្រឹមសង់ ស៊េរីឆ្នាំ ០៩ ដែលជាមធ្យោបាយដឹកជញ្ជូន ។
ជនសង្ស័យឈ្មោះ សេង សុខនីម បានឱ្យដឹងថា សត្វព្រៃត្រូវបានប្រមូលទិញពីប្រជាពលរដ្ឋ និងបាននាំយក ទៅលក់នៅភោជនីយ៍ដ្ឋានធំៗនៅទីក្រុងភ្នំពេញ ។
មន្ត្រីអ.ហស្រុកបារាយណ៍បានឱ្យដឹងទៀតថា ជនសង្ស័យ គឺជាមុខសញ្ញាចាស់រកស៊ីជួញដូរសត្វព្រៃ ចំណែក ជនសង្ស័យទាំងពីររូប ព្រមទាំងវត្ថុតាងត្រូវបានបញ្ជូនទៅឱ្យសង្កាត់រដ្ឋបាលព្រៃឈើបារាយណ៍ ដើម្បីកសាងសំណុំ ឯកសារបញ្ចូនទៅតុលាការខេត្តតាមនីតិវិធីច្បាប់ ។
នេះជាស្នាដៃថ្មីមួយទៀតរបស់កងរាជអាវុធហត្ថស្រុកបារាយណ៍ ក្នុងការទប់ស្កាត់ និងបង្ក្រាបបទល្មើស ផ្សេងៗ តាមការចង្អុលបង្ហាញរបស់លោកឧត្តមសេនីយ៍ មេបញ្ជាការកងរាជអាវុធហត្ថខេត្តកំពង់ធំ និងអនុវត្តន៍តាម បទបញ្ជារបស់ ឯកឧត្តម នាយឧត្តមសេនីយ៍ សៅ សុខា មេបញ្ជា ការកងរាជអាវុធហត្ថលើផ្ទៃប្រទេស ។/
ដោយ ៖ តេច ឆេង
