បាត់ដំបង ៖ កាលពីម៉ោង៩និង៣០នាទីព្រឹក ថ្ងៃទី១២ ខែសីហា ឆ្នាំ២០១៤ រថយន្តកូរ៉េកែច្នៃដឹកសសរក្រាក់លើកំណាត់ផ្លូវជាតិលេខ ៥ ពីខេត្តពោធិ៍សាត់មកដល់ចំណុចភូមិពុកឆ្មា ឃុំអន្លង់វិល ស្រុកសង្កែ ខេត្តបាត់ដំបង ជ្រុះរាយប៉ាយ ក្រុមអ្នកដឹកឈើថា បង់ប្រាក់អោយរដ្ឋបាលព្រៃឈើទើបដឹកមករលូន ។ លុះម៉ោង១១ថ្ងៃដដែល លោក ម៉ៅ លាបថេង នាយសង្កាត់រដ្ឋបាលព្រៃឈើបាត់ដំបងឃាត់រថយន្តនេះ យកទៅសង្កាត់រដ្ឋបាលព្រៃឈើធ្វើការផាកពិន័យ ។
រថយន្តកូរ៉េចំណុះ ៥ តោនពាក់ស្លាកលេខភ្នំពេញ 3A4894 (ដោះស្លាកលេខទុក) កែច្នៃដឹកសសរក្រាក់ចំនួន២០០ដើមត្លុងត្បែងក្រឡៅមូលពីខេត្តពោធិ៍សាត់ មកបាត់ដំបង ។ អ្នកទទួលខុសត្រូវលើរថយន្តនេះឈ្មោះ លី ម៉ៅ ភេទប្រុសអាយុ១៩ឆ្នាំ ត្រូវ (ជាប្អូនថៅកែឈើឈ្មោះចែរ៉ើន) រស់នៅភូមិអណ្តូងក្រសាំងឃុំស្នាមព្រះស្រុកបាកាន ខេត្តពោធិ៍សាត់ ។
ពេលមកដល់ចំណុចភូមិពុកឆ្មា ឃុំអន្លង់វិល ស្រាប់តែដាច់ខ្សែចង បណ្តាលអោយជ្រុះរាយប៉ាយពេញផ្លូវជាតិតែម្តង ។ ការដឹកឈោះបានរលូននេះ បានបង់អោយសមត្ថកិច្ចតាមដងផ្លូវជាហូរហែរ និងទូស័ព្ទប្រាប់មុន ជាពិសេសលោកទូចអូននាយរងសង្កាត់រដ្ឋបាលព្រៃឈើបាត់ដំបង ដែលកំពុងឈរចំពោះមុខនេះ ។ ឈ្មោះ លី ម៉ៅ បានអោយដឹងថា ពួកខ្លួនដឹកឈើពីខេត្តពោធិ៍សាត់យកអោយចែមុំម្ចាស់ដេប៉ូនៅឃុំអន្លង់វិលស្រុកសង្កែខេត្តបាត់ដំបង
ពាក់ព័ន្ធករណីនេះ លោក ទូច អូន នាយរងសង្កាត់រដ្ឋបាលព្រៃឈើបាត់ដំបង បានបដិសេធន៍ភ្លាមៗថា មិនបានទទួលប្រាក់ពីអ្នកដឹកឈើនេះទេ ។
លោក ម៉ៅ លាបថេង នាយសង្កាត់រដ្ឋបាលព្រៃឈើបាត់ដំបង ក៏បានបដិសេធន៍ភ្លាមៗថា មិនបានទទួលប្រាក់ពីអ្នកដឹកឈើនេះទេ ។ រថយន្តកូរ៉េចំណុះ៥តោនពាក់ស្លាកលេខភ្នំពេញ3A4894 និងសសរក្រាក់ចំនួន២០០ដើម ត្លុងត្បែងក្រឡៅមូល ត្រូវយកទៅសង្កាត់រដ្ឋបាលព្រៃឈើដើម្បីធ្វើការផាកពីន័យ ។
តាមការរិះគន់ពីមជ្ឈដ្ឋាននានាដែលឈស្តាប់ហេតុការណ៍នេះ មេព្រៃពិតជាបានទទួលលាភសក្ការៈពីឈ្មួញដឹកឈើមែនតែដោយសារឈ្មួញនិយាយចំមុខសារធារណៈពេកខ្លាចខ្មាស់គេក៏បង្ខំចិត្តចាប់ឃាត់យកទៅកន្លែងតែម្តងទៅ ៕
