បាត់ដំបង ៖ កាលពីម៉ោង៩និង៤០នាទីព្រឹកថ្ងៃទី២៩ ខែកក្កដា ឆ្នាំ២០១៤ សមត្ថកិច្ចជំនាញបង្ក្រាបបទល្មើស ព្រៃឈើចោទថា អាវុធហត្ថស្រុកសង្កែកាងបទល្មើស ព្រៃឈើ ព្រោះរថយន្តម៉ាកអ៊ីស៊ុយស៊ុយដឹកឈើប្រណិតពី ខេត្តពោធិ៍សាត់មកបាត់ដំបងត្រូវបានអាវុធហត្ថស្រុកសង្កែរំដោះនាំចូលទីបញ្ជាការស្រុកស្ងាតៗ។
តាមសមត្ថកិច្ចជំនាញបង្ក្រាបបទល្មើសព្រៃឈើ (មិនបញ្ចេញឈ្មោះអង្គភាព) បានអោយដឹងថា តាមបណ្តាញ រាយការណ៍ពីខេត្តពោធិ៍សាត់ប្រាប់ ថា រថយន្តដឹក ឈើប្រណិតម៉ាកអ៊ីស៊ុយស៊ុយពណ៌ក្រហមពាក់ស្លាកលេខ ភព 1387 បានរកស៊ីដឹកឈើប្រណិតជាច្រើនលើកពីខេត្តពោធិ៍សាត់មកបាត់ដំបង ហើយមិនមានអ្នកបង្ក្រាប
ឡើយ ព្រោះពួកគេស្គាល់មេព្រៃ និងអាវុធហត្ថតាមដងផ្លូវដោយបង់ប្រាក់ជូនសមត្ថកិច្ចទាំងនោះ ។ ក្រោយពីទទួលបានព័ត៌មាន កម្លាំងសមត្ថកិច្ចយើងបានតាមស្ទាក់ ចាប់រថយន្ត តែចាប់មិនបាន ពេល រថយន្តនោះ បើកមកដល់ស្រុកសង្កែ ទំនងជាដឹងខ្លួន ក៏ត្រូវមន្ត្រីអាវុធហត្ថស្រុកនាំចូលទីបញ្ជាការស្រុកសង្កែតែម្តង ។
ក្រោយពីរថយន្តពណ៌ក្រហមនេះចេញពីទីបញ្ជាការអាវុធហត្ថស្រុកសង្កែមន្ត្រីអាវុធហត្ថម្នាក់នៅស្រុកសង្កែបានអោយដឹងថាឈើប្រណិត៤ទៅ១០ដុំនេះជារបស់មេទិញធ្វើផ្ទះ ។
ប៉ុន្តែពាក់ព័ន្ធករណីនេះលោកអ៊ិនតាំមេបញ្ជាការងអាវុធហត្ថស្រុកសង្កែបានឆ្លើយតាមទូរស័ព្ទថាជាប់រៀននៅភ្នំពេញមិនដឹងរឿងទេ ។
លោក លី គឹមហៀង មេបញ្ជាកាអាវុធហត្ថស្រុកសង្កែបានឆ្លើយតាមទូរស័ព្ទថា មិនដឹងរឿងរថយន្តដឹកឈើទេ ហើយលោកកំពង់ជាប់រវល់ប្រជុំ ។
មានមតិរិះគន់ថា អាវុធហត្ថស្រុកសង្កែអាចជាអ្នកកាងបទល្មើសព្រៃឈើ និងជាអ្នករកស៊ីបទល្មើសព្រៃឈើ ព្រោះការទិញឈើធ្វើផ្ទះមិនមានការរាយការណ៍ជូនសមត្ថកិច្ចជំនាញពាក់ព័ន្ធ គឺជាការខុសច្បាប់ ទើបីសាមីខ្លួនជាមន្ត្រីកងកម្លាំងក៏ដោយ ៕
