បាត់ដំបង ៖ លោក ស្រី សុខុន មេបញ្ជាការនគរបាលការពារវរៈព្រំដែនគោក ៨១៧ រងការចោទប្រកាន់ថាបានប្រើគ្រឿងចក្រជីករ៉ែមាសតាមដងអូរបណ្តាល អោយប៉ះពាល់វៀចខ្សែបន្ទាត់ព្រំដែន កម្ពុជា-ថៃ និង ប៉ះពាល់ដល់សុខភាពប្រជាពលរដ្ឋអស់ពេលប្រហែល១ឆ្នាំគិតមកដល់ថ្ងៃទី២៤ខែកក្កដាឆ្នាំ២០១៤នៅភូមិឃុំចក្រីស្រុកសំពៅលូនខេត្តបាត់ដំបង ។
ប្រជាពលរដ្ឋបានអោយដឹងថាលោកស្រីសុខុនមេបញ្ជាការនគរបាលការពារវរៈព្រំដែនគោក៨១៧លោកមូលប៊ុនថានាយប៉ុស្តិ៍វរៈព្រំដែនគោកចក្រីនិងជនជាតិចិនបានយកគ្រឿងចក្រម៉ៃខូងចំនួន២គ្រឿងកាយតាមដងអូរព្រំប្រទល់ថៃកម្ពុជាជីករករ៉ែមាសដោយគ្មានច្បាប់អនុញ្ញាតិ។ការកាយរករ៉ែមាសនេះមានពេលជាង១ឆ្នាំបង្កអោយខូចខាតផ្លូវទឹកបង្កើតទឹកជំនន់និងពិបាកប្រើប្រាស់ទឹកដោយមានកករឬជាតិពុលជាដើម។
លោកជាសម្បត្តិអភិបាលស្រុកសំពៅលូនបានអោយដឹងថាលោកស្រីសុខុននិងជនជាតិចិនបានមកជីករ៉ែមាសនេះគឺប្រហែល១ឆ្នាំមកហើយរូបលោកទើបតែដឹងពេលមេឃុំរាយការណ៍នៅខែកក្កដាឆ្នាំ២០១៤ ។លោកបានអោយលោកស្រីសុខុននាំជនជាតិចិនព្រមទាំងយកឯកសារមកបង្ហាញផងដែរប៉ុន្តែលោកស្រីសុខុនពន្យាពេលនិងប្រាប់ថារងចាំជនជាតិចិនត្រឡប់មកវិញសិន ។
ការជីករករ៉ែមាស តាមដងអូរបណ្តាលអោយ ប៉ះពាល់ដល់សុខភាព ព្រមទាំងដីផ្ទះសម្បែងរបស់ប្រជាពលរដ្ឋនៅក្នុងស្រុកជាពិសេសខូចទ្រង់ទ្រាយខ្សែបន្ទាត់ព្រំដែនវៀចវេរខ្សែបន្ទាត់ព្រំដែន អាចបាត់បង់ទឹកដីកម្ពុជាដូច្នេះរូបលោកក៏មិនអាចទុកអោយលោកស្រីសុខុនធ្វើព្យុះភ្លៀងបានដែរក្រោយពីចប់ការងារនៅខេត្ត២ថ្ងៃរូបលោកនឹងហៅលោកស្រីសុខុនមកជួបនៅថ្ងៃទី២៦ខែកក្កដាឆ្នាំ២០១៤ដើម្បីអោយដកគ្រឿងចក្រចេញជាបន្ទាន់។
ពាក់ព័ន្ធករណីនេះ លោក ជី ឈៀង ប្រធានមន្ទីររ៉ែថាមពល កាលពីម៉ោង ២ រសៀល ថ្ងៃទី២៤ ខែកក្កដា ឆ្នាំ២០១៤ បានប្រាប់ថារូបលោកកំពង់ជាប់ប្រជុំ ។
លោក ស្រី សុខុន មេបញ្ជាការនគរបាលការពារវរៈព្រំដែនគោក៨១៧មិនលើកទូរស័ព្ទឡើយ ៕
