ខេត្តក្រចេះ ៖ ការណ៍ផ្ទុះអាវុធជាច្រើនគ្រាប់ក្នុងប្រតិបត្តិការ បង្ក្រាបរថយន្តដឹក ឈើមួយគ្រឿងរបស់លោកព្រះរាជអាជ្ញា អមសាលាដំបូងខេត្ត ដែលអ្នកស្រុកនឹកស្មានថាជាសង្គ្រាម ដោយស្នូរគ្រាប់កាំភ្លើង លាន់លឺរំពងនាពាក់កណ្តាល អាធ្រាតុ ឈានចូលថ្ងៃទី២៥ កក្កដា ឆ្នាំ ២០១៤ គឺត្រូវបានគេចាត់ទុកថា ជាករណីផ្ទុះអាវុធជា លើកទីបីនៅក្នុងស្រុកស្នួល លើការចុះបង្ក្រាប បទល្មើសការដឹកជញ្ជូនឈើរបស់លោកទី សុវិនថាល់ ព្រះរាជអាជ្ញាអមសាលាដំបូងខេត្ត។
ស្ត្រីសរសៃខ្ចីវ័យ២៣ឆ្នាំម្នាក់ បានរងរបួសធ្ងន់ដោយ សារតែគ្រាប់កាំភ្លើង ខណៈពេលកំពុងអង្គុយបំបៅដោះ ទារកជាងពីរខែនៅលើផ្ទះ បន្ទាប់ពីមានការផ្ទុះអាវុធ ជាច្រើនគ្រាប់របស់ស្ថាប័នអយ្យការខេត្ត ក្នុងប្រតិបត្តិការ ចុះបង្ក្រាបរថយន្តដឹកឈើប្រណីតមួយគ្រឿងនៅវេលាពាក់កណ្តាលអធ្រាត។
ហេតុការណ៏ផ្ទុះអាវុធជាលើកចុងក្រោយបានកើតឡើង កាលពីវេលាពាក់កណ្តាលអធ្រាត្រ ឈានចូលថ្ងៃទី២៥ កក្កដា នៅចំណុចទីប្រជុំជនឃុំស្វាយជ្រះ ស្រុកស្នួល ជាប់នឹងផ្លូវជាតិលេខ៧ គឺត្រូវគេរាយការណ៍ថា បានផ្ទុះអាវុធជាច្រើនគ្រាប់រហូតបង្កឲ្យស្ត្រីម្នាក់បានរងរបួស ដោយសារគ្រាប់កាំភ្លើងទាំងមិនដឹងខ្លួន។
លោកអនុសេនីយ៏ទោ ជា ជាន នាយប៉ុស្តិ៍រដ្ឋបាលស្វាយជ្រៈ បានឲ្យដឹងថា ស្ត្រីរងគ្រោះឈ្មោះ ហ៊ាល រី អាយុ២៣ឆ្នាំ មានទីលំនៅឃុំស្វាយជ្រៈ ស្រុកស្នួល មានកូនពីរនាក់ ស្រីម្នាក់ និងជាស្ត្រីសរសៃខ្ចី ទើបតែមានកូនប្រុសម្នាក់ទៀតអាយុជិត២ខែ។ លោកនាយប៉ុស្តិ៍បានបញ្ជាក់ថា កាលពីយប់កើតហេតុ ស្ត្រីរងគ្រោះបានងើបអង្គុយបំបៅដោះកូននៅលើផ្ទះមានទីតាំងជិតកន្លែងកើតហេតុចំងាយជាង១៥ម៉ែត្រ ចំណែកឯក្រុមគ្រួសារ មានចំនួន៧ នាក់ទៀតកំពុងដេកនៅលើផ្ទះ ។
ស្ត្រីរងគ្រោះត្រូវគ្រាប់កាំភ្លើងចំកំភួនដៃខាងស្តាំ ធ្លាយចេញមកស្មាខាងឆ្វេង បណ្តាលឲ្យរបួសធ្ងន់។
ប្រភពព័ត៌មានពីកន្លែងកើតហេតុបានឲ្យដឹងថា កាលពីវេលាពាក់កណ្តាលអធ្រាត្រ ឈានចូលថ្ងៃទី២៥ កក្កដា គឺមានការផ្ទុះអាវុធខ្លីជាច្រើនគ្រាប់ផ្អើលអ្នកភូមិ ក្នុងប្រតិបត្តិការណ៏បង្ក្រាបរថយន្តសាំយ៉ុងដឹកឈើប្រណីតធ្នង់មួយគ្រឿង របស់ស្ថាប័នព្រះរាជអាជ្ញា អមសាលាដំបូងខេត្ត ក្រោមការដឹកនាំផ្ទាល់របស់លោក ទី សុវិនថាល់ ព្រះរាជអាជ្ញានិងលោក ហាក់ ហ៊ាន់ ព្រះរាជអាជ្ញាររង។
ក្នុងស្ថានភាពដ៏តានតឹងដែលបានអូសបន្លាយពេលជាង១ម៉ោងពីសំណាក់កម្លាំងសមត្ថកិច្ចនិងក្រុមឈ្មួញដឹកឈើ ក៏ត្រូវបានផ្ទុះអាវុធជាច្រើនគ្រាប់ រហូតបង្កឲ្យមាន ស្ត្រីអ្នកភូមិនៅក្បែរនោះម្នាក់រងរបួសធ្ងន់ ។
បន្ទាប់ពីមានការផ្ទុះអាវុធក្នុងសមរភូមិចាប់បង្ក្រាបការដឹកជញ្ជូនឈើខុសច្បាប់ គឺរថយន្តសាំយ៉ុងដឹកឈើធ្នង់មួយគ្រឿងនេះ គឺត្រូវបានចាប់បង្ក្រាបរួមទាំងមនុស្សពីរនាក់ទៀត មានម្នាក់ជាអ្នកបើកបរនិងព្រូរថយន្ត នាំខ្លួនមក កាន់ទីបញ្ជាការ កងរាជអាវុធហត្ថខេត្តទាំងយប់ ៕
ដោយ ៖ ពិសុទ្ធ
