ខេត្តមណ្ឌលគិរី ៖ ការរកស៊ីនាំប្រេងចូលរបស់ឧកញ៉ា ល័ក្ស តាមច្រកដាក់ដាំខេត្តមណ្ឌលគីរី ត្រូវបានគេរិះគន់ថា បង់ពន្ធនាំចូលមិនគ្រប់ ដែលជាការឃុបឃិតគ្នា ជាមួយសមត្ថកិច្ចជំនាញ និងលើសពីតម្រូវការសម្រាប់ការប្រើប្រាស់ ចែកចាយក្នុងខេត្តមណ្ឌលគិរី ដែលជាល្បិចកន្ទេលធំបន្លំដេករបស់ឧកញ៉ា ល័ក្ស ។
ប្រភពព័តមានបានឲ្យដឹងថា កាលពីថ្ងៃទី១៥ ខែវិច្ឆិកា ឆ្នាំ២០១៦ មានរថយន្តស៊ីទែនប្រេង ប្រមាណជិត១០គ្រឿងរបស់ឧកញ៉ា ល័ក្ស ត្រូវបានឆ្លងកាត់ច្រកដាក់ដាំចូលទឹកដីកម្ពុជា ដោយគ្មានការត្រួតពិនិត្យឯកសារពាក់ព័ន្ធ ពីមន្ត្រីជំនាញនោះឡើយ។
ប្រភពខាងលើបានឲ្យដឹងទៀតថា សមត្ថកិច្ចមាត់ច្រកបានបើកបារ៉ាស់ចំហរ រួមមាននគរបាលអន្តោប្រវេសន៍ ស្នាក់ការរបស់សាលាខេត្ត កាំកុងត្រូល ពិសេសខាងស្នាក់ការគយរដ្ឋាករតែម្តង ក្នុង ការសម្រួលឲ្យ រថយន្តស៊ីទែនប្រេងរបស់ឧកញ៉ា ល័ក្ស ឆ្លងកាត់ និងគ្មានការត្រួតពិនិត្យ ឯកសារប្រតិវេទន៍គយច្បាស់លាស់នោះឡើយ ។
ពាក់ព័ន្ធករណីនេះ លោកឡុញ ស៊ីថេន ប្រធានការិយាល័យគយ និងរដ្ឋាករច្រកដាក់ ដាំបានប្រាប់សារព័តមានក្នុងស្រុកមួយតាមទូរស័ព្ទថា “រថយន្ត ស៊ីទែនដឹកប្រេងរបស់ឧកញ៉ាល័ក្ស មានច្បាប់ត្រឹមត្រូវ ហើយអ្វីដែលសមត្ថកិច្ចរបស់លោកមិនពិនិត្យ ឬឡើងមើល ដោយសារគេមានឯកសារបង់ពន្ធ នៅអគ្គនាយកដ្ឋានគយនិងរដ្ឋាករកម្ពុជា រួចហើយ ។ ប្រេងទាំងនេះដឹកមកសម្រាប់បម្រើការ ចែកចាយ ក្នុងខេត្តមណ្ឌលគិរីប៉ុណ្ណោះ បើប្រេងទាំងនេះ ដឹកបន្តចេញពីខេត្តមណ្ឌលគិរី រឿងចាប់ឬគុក ច្រវ៉ាក់ ខ្ញុំអត់ទទួលខុសត្រូវ ព្រោះប្រេងទាំងអស់ សម្រាប់តែចែកចាយក្នុងខេត្តប៉ុណ្ណោះ ។
ឧកញ៉ាល័ក្សគឺជាឈ្មួញដុះស្លែ ក្នុងការដឹកជញ្ជូនប្រេងពី ប្រទេសវៀតណាមចូលមកកម្ពុជា តាមច្រកដាក់ដាំ ខេត្តមណ្ឌលគិរី សម្រាប់ចែកចាយតែក្នុងខេត្តមណ្ឌលគិរី ប៉ុន្តែឧកញ៉ាល័ក្សបានសំរុកដឹកប្រេង យកទៅចែកចាយទៅកាន់ខេត្តក្រចេះ ខេត្តស្ទឹងត្រែង និងខេត្តមួយចំនួនផ្សេងទៀត ដែលសមត្ថកិច្ច មន្ត្រីជំនាញ ក៏ដូចជាអាជ្ញាធរបានឃុបឃិត និងមិនហ៊ានប៉ះពាល់ ដោយសំអាងលើការដឹកជញ្ជូនប្រេងនេះ មានការបង់ពន្ធត្រឹមត្រូវពីអគ្គនាយកដ្ឋានគយ និងរដ្ឋាករកម្ពុជា ដែលធ្វើឲ្យរដ្ឋបាត់បង់ចំណូលពន្ធយ៉ាងច្រើន។
ប្រជាពលរដ្ឋខេត្ត មណ្ឌលគិរីបានរិះគន់ថា សមត្ថកិច្ចជាច្រើនបានពាក់ព័ន្ធ ទៅនឹងរបរនាំប្រេងចូលរបស់ឧកញ៉ារូបនេះ ដែលគេសង្ស័យថាបង់ពន្ធមិនគ្រប់ គេចពន្ធ និងមានចំនួនបរិមាណលើសពីច្បាប់អនុញ្ញាត្ត ទើបសកម្មភាពដឹកប្រេងរបស់ឧកញ៉ាល័ក្ស ឆ្លងកាត់ច្រកដាក់ដាំមានភាពរលូន និងជួលបន្ថែមរថយន្តដឹកប្រេងក្រុមហ៊ុនសូគីមិច មិនតិចជាង១០គ្រឿងទៀតផង ប្រយោជន៍ជ្រកក្រោមក្រុមហ៊ុន ស្របច្បាប់មួយនេះ។
ពាក់ព័ន្ធករណីនេះ មិនអាចទាក់ទងបានទេពី លោកឧកញ៉ាល័ក្ស ដោយគ្មានលេខទូរស័ព្ទ ដើម្បីសុំការបំភ្លឺ តែនឹងព្យាយាមទំនាក់ទំនង សុំការបកស្រាយនៅពេលក្រោយ៕
