ប្រជាពលរដ្ឋមានសេចក្តីត្រេកអរយ៉ាងខ្លាំង នៅពេល ដែលគណបក្សប្រជាជនកម្ពុជា និងគណបក្សសង្គ្រោះជាតិ បានបញ្ចប់ការជាប់គាំងខាងផ្នែកនយោបាយអូសបន្លាយអស់ រយៈពេលពេញមួយឆ្នាំ ដែលបង្កឱ្យមានភាពអាប់អួរនៅក្នុង សង្គមជាតិដោយក្នុងជំនួបកំពូលរវាងថ្នាក់ដឹកនាំគណបក្ស ទាំងពីរ ដែលជាប់ឆ្នោតតំណាងរាស្ត្របានសម្រេចកិច្ចព្រម ព្រៀងមួយដែលអ្នកវិភាគហៅថាកិច្ចព្រមព្រៀងទីក្រុង ភ្នំពេញ ថ្ងៃទី ២២ ខែកក្កដា ឆ្នាំ ២០១៤ រួមមានការឯកភាពគ្នាលើ ៧ ចំណុច ឈានទៅ ដល់ការបើកសករាជថ្មីរំពឹងថា នឹងឈប់មានការចលាចល ក្នុងសង្គមតទៅទៀតសេដ្ឋកិច្ចនឹងរីកចំរើនប្រជាពលរដ្ឋអាចរស់ នៅនឹងប្រកបរបរទទួលទានដោយសុខដុមរមនា ។
ពាក្យចាស់លោកពោលថា ក្រោយពេលមានព្យុះភ្លៀង មេឃតែងស្រឡះ ឬក៏សំពៅក៏ទៅសំប៉ានក៏ទៅដែលមានន័យ អ្វីៗគ្រប់យ៉ាងនិងបានល្អប្រសើរ ក្រោយពេលជួបឧបសក្គឧប-ទ្រព្យចង្រៃផងទាំងពួង ចំណែកប្រជាពលរដ្ឋរំពឹងថាគណបក្ស ប្រជាជនកម្ពុជា និងគណបក្សសង្គ្រោះជាតិ បង្កការយល់ទុក ចិត្តគ្នាមិនស៊ីលើស៊ីក្រោមចាប់ដៃគ្នាធ្វើការបំរើជាតិដើម្បីផល ប្រយោជន៍ប្រជាពលរដ្ឋនិងទុកផលប្រយោជន៍ជាតិធំជាងផល ប្រយោជន៍គណបក្ស ។
សារព័ត៌មានថ្ងៃនេះ ក៏ដូចប្រជាពលរដ្ឋទូទាំងប្រទេសសូម អបអរសាទរចំពោះកិច្ចព្រមព្រៀងទីក្រុងភ្នំពេញ ព្រោះពួក យើងយល់ឃើញថាគណបក្សជាប់ឆ្នោតទាំងពីរទាំងគណបក្ស កាន់អំណាចក៏ដូចជាគណបក្សប្រឆាំងត្រូវតែបង្ហាញនូវឆន្ទៈ បង្រួបបង្រួមផ្សះផ្សាជាតិ ឯកភាពជាតិ និងការអភិវឌ្ឍន៍មាតុ ប្រទេសឱ្យរីកចំរើនសមតាមបំណងប្រាថ្នារបស់រាស្ត្រម្ចាស់ ឆ្នោត ។
ទោះបីយ៉ាងណា កិច្ចព្រមព្រៀងខាងលើនេះ ដែលកើត ចេញលើថ្លុកឈាមរបស់ប្រជាពលរដ្ឋខ្មែរ និងការជាប់គុក ច្រវ៉ាក់របស់អ្នកនយោបាយនិងសកម្មជនលទ្ធិប្រជាធិបតេយ្យ នៅតែធ្វើឱ្យប្រជាពលរដ្ឋមានការស្រពិចស្រពិលបារម្ភថា តើ ការអនុវត្តន៍នូវកិច្ចព្រមព្រៀងខាងលើបានទទួលជោគជ័យមួយ រយភាគរយដែរឬទេ ? ព្រោះផ្លូវដើរដែលមានន័យថា ការ ពិភាក្សាគ្នានៅមានរយៈពេលវែងឆ្ងាយតទៅទៀត ហើយអាច ឈានទៅរកការបរាជ័យការមិនចុះសំរុងគ្នាជាថ្មីម្តងទៀត ដែលបង្កឱ្យមានព្យុះភ្លៀងនយោបាយសារជាថ្មី ។
អ្នកវិភាគនៅតែមានសំណួរថា កិច្ចប្រជុំកំពូលលើកនេះ គណបក្សប្រជាជនកម្ពុជាគ្រាន់តែសម្របសម្រួលដើម្បីលួងឱ្យ តំណាងរាស្ត្របក្សសង្គ្រោះជាតិចូលរួមប្រជុំសភា កុំឱ្យមតិ មហាជននិងអន្តរជាតិដាក់សម្ពាធថា ជាសភាឯកបក្ស ផ្ទុយពី លទ្ធិប្រជាធិបតេយ្យ រីឯគណបក្សសង្គ្រោះជាតិសុខចិត្តចូល អង្គុយនៅរដ្ឋសភា ក៏ប្រហែលជាដឹងខ្លួនថា កម្លាំងរបស់ខ្លួនចុះ ខ្សោយនៅពេលដែលបក្សកាន់អំណាចប្រើកណ្តាប់ដៃដែកបង្ខំ ឱ្យបក្សប្រឆាំងងាកមករកតុចរចាវិញនោះ ។
ប្រជាពលរដ្ឋសង្ឃឹមថា កិច្ចព្រមព្រៀងទីក្រុងភ្នំពេញក៏ជា ប្រទីបមួយបញ្ចាំងផ្លូវឱ្យគណបក្សទាំងពីរ ដើររួមគ្នាកសាង ជាតិដោយមិនចងព្យេរនិងគ្នា ព្រោះយ៉ាងណាក្តីក្នុងរបបប្រ-ជាធិបតេយ្យមិនអាចធ្វើការជាឯកបក្សដោយមិនស្តាប់អនុ-សាសន៍បក្សប្រឆាំងបាននោះឡើយចំណែកបក្សប្រឆាំងដែល ធ្វើពហិការក៏ជាឧបសគ្គរារាំងដល់ការអភិវឌ្ឍន៍ដែលមានន័យ ថា ធ្វើឱ្យរាំងស្ទះដល់ការរីកចំរើនរបស់ប្រជាពលរដ្ឋនោះ ប្រជាពលរដ្ឋនឹងលែងមានជំនឿ និងផ្តល់ក្តីទុកចិត្តទៀត ។
ដូច្នេះសំណួរសួរថា តើមេឃស្រឡះដែរឬទេ ក្រោយពេល មានព្យុះភ្លៀងរួចមក ចម្លើយមានតែរង់ចាំមើលពេលវេលា ទៅអនាគត និងឋិតនៅលើឆន្ទៈរបស់គណបក្សទាំងពីរ ដែល ត្រូវគិតផលប្រយោជន៍រាស្ត្រជាធំទើបការអនុវត្តកិច្ចព្រមព្រៀង ទទួលបានជោគជ័យ ៕
