ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានលើកឡើងឲ្យដឹងថានៅថ្ងៃដំបូងនៃពិធីបុណ្យអុំទូក កាលពីថ្ងៃទី១៣ ខែវិច្ឆិកា ឆ្នាំ២០១៦ គឺបានប្រព្រឹត្តិទៅប្រកបដោយបរិយាកាសសប្បាយរីករាយ នេះបើយោងតាម Facebook Page ផ្លូវការរបស់សម្តេចតេជោ ហ៊ុន សែន ដែលបានបង្ហោះឲ្យដឹង នៅថ្ងៃទី១៣ ខែវិច្ឆិកា ឆ្នាំ២០១៦។
Facebook Page ផ្លូវការសម្តេចតេជោ បានបញ្ជាក់ឲ្យដឹងយ៉ាងដូច្នេះថា «នៅថ្ងៃដំបូងនៃពិធីបុណ្យអុំទូកកាលពីម្សិលមិញ គឺបានប្រព្រឹត្តិទៅ ប្រកបដោយបរិយាកាសសប្បាយរីករាយ យ៉ាងអធិកអធមក្រៃលែង។ កន្លែងកំសាន្តមួយចំនួនដែលបងប្អូនប្រជាពលរដ្ឋ និងទេសចរណ៍បរទេសអាចចូលរួមកំសាន្តសប្បាយ បានគឺនៅតាបណ្តោយមាត់ទន្លេ មុខព្រះបរមរាជវាំង វត្តបទុមវតី និងនៅកោះពេជ្រជាដើម»។
សម្តេចតេជោ ហ៊ុន សែន បានបញ្ជាក់បន្ថែមថា «នៅសល់តែ២ថ្ងៃទៀតប៉ុណ្ណោះ ដូច្នេះកុំភ្លេចចូលរួមកំសាន្តសប្បាយនៅក្នុងថ្ងៃទី ២ នៃពិធីបុណ្យ អុំទូកនៅមុខព្រះបរមរាជវាំងនៅថ្ងៃនេះ»។
គួរបញ្ជាក់ថា ពិធីបុណ្យអុំទូក អកអំបុក សំពះ ព្រះខែ ប្រព្រឹត្តទៅរយៈពេល៣ថ្ងៃ ពោលគឺនៅថ្ងៃទី១៣-១៤-១៥ខែវិច្ឆិកា ឆ្នាំ២០១៦។ពិធីបុណ្យអុំទូកនេះអាចនឹងមានប្រជាពលរដ្ឋចូលរួម ប្រមាណជាជាង២លាននាក់ នេះបើតាមការព្យាករណ៍របស់គណៈកម្មការរៀបចំបុណ្យជាតិ។
សម្តេចតេជោនាយករដ្ឋមន្ត្រី និងសម្តេចកិត្តិព្រឹទ្ឋបណ្ឌិត បានដង្ហែរព្រះមហាក្សត្រទតពិធីដ៏អធិកអធម្មនេះ រួមជាមួយមន្ត្រីរាជរដ្ឋាភិបាល ព្រឹទ្ឋសភា រដ្ឋសភា និងប្រជាពលរដ្ឋយ៉ាងច្រើនកុះករ
គណៈកម្មាធិការរៀបចំបុណ្យជាតិ-អន្តរជាតិ បានឲ្យដឹងថា ក្នុងព្រះរាជពិធីបុណ្យអុំទូក មានទូក.ងចំនួន២៦០ទូក ស្មើនឹង១៣០គូ ដែលមកបណ្តារាជធានី-ខេត្តដោយមានកីឡាករចំណុះទូក ដែលមកចូលរួមប្រណាំងប្រជែងគ្នានៅក្នុងឆ្នាំ ២០១៦នេះ សរុបមាន ចំនួនជាង ១ម៉ឺន៧ពាន់នាក់ត្រូវប្រណាំងរយៈពេល៣ថ្ងៃ ចាប់ពីថ្ងៃទី១៣ ដល់១៥ ខែវិច្ឆិកា ឆ្នាំ
២០១៦។
នៅរាជធានីភ្នំពេញ ពោលគឺនៅក្បែរៗបរិវេណព្រះបរមរាជវាំង ឆាកតន្ត្រីដ៏ធំចំនួន៥កន្លែង ត្រូវបានរៀបចំនៅកោះពេជ្រ នៅមុខសួនវត្តបុទុមវត្តី ហើយក៏មានស្តង់លក់ទំនិញ និង អាហាររាប់រយស្តង់ ចាំទទួលស្វាគមន៍ប្រជាពលរដ្ឋដែលមកដើរកម្សាន្តបុណ្យអុំទូក។ ការលំអភ្លើងពណ៌នៅលើដើមឈើ សួនច្បារ ព្រមទាំងមានបដា ខ្លោងទ្វារ ដែលមានសរសេរពាក្យអបអរសាទរព្រះរាជពិធីបុណ្យអុំទូកបដាដែលសរសរសារដាស់តឿនស្តីអំពីជំងឺអេដស៍ ដូចជា «ខ្ញុំមកប្រណាំងទូក មិនមែនប្រណាំងអេដស៍នោះទេ» និង «ឈ្នះទូក ឈ្នះអេដស៍គឺជាក្តីប្រាថ្នារបស់យើង» ជាដើម។
អាជ្ញាធររាជធានីភ្នំពេញក៏បានរំពឹងថា ប្រជាជនប្រមាណ២លាននាក់ នឹងមកចូលរួមទស្សនានិងកម្សាន្ត យ៉ាងកុះករនៅក្នុងព្រះរាជពិធីបុណ្យអុំទូក ដើម្បីការពារសណ្តាប់ធ្នាប់ និង សុវត្ថិភាព ដល់ប្រជាពលរដ្ឋទាំងឡាយ កងកម្លាំងសន្តិសុខជាង១ម៉ឺននាក់ ត្រូវបានដាក់ពង្រាយនៅតាមគោលដៅសំខាន់ៗ ។ក្រុមគ្រូពេទ្យ ជិត ៩០០នាក់ និងរថយន្តសង្គ្រោះ ១៥ គ្រឿងក៏បាន ត្រៀមចាំជួយសង្គ្រោះ ប្រជាពលរដ្ឋ ដែលចូលរួមក្នុងព្រះរាជពិធីបុណ្យអុំទូក ផងដែរ។បើតាមមន្ទីរសុខាភិបាលភ្នំពេញ ក្រុមគ្រូពេទ្យត្រូវបានពង្រាយនៅ១១កន្លែង ដោយ នៅខាងកើតទន្លេសាបមាន៣ទីតាំង គឺ នៅតំបន់ដីចាក់ថ្មីរបស់ក្រុមហ៊ុន OCIC វិទ្យាល័យជ្រោយចង្វារ និង សាលាបឋមសិក្សាជ្រោយចង្វា។
ចំនែកនៅខាងលិចទន្លេសាបមាន៩ទីតាំង ដោយ បីទីតាំងនៅជុំវិញវេទិកាបុណ្យ នៅផែថ្មភ្នំពេញ មុខព្រះគន្លង់ វាលព្រះមេរុ ដើមពោធិ៍មុខព្រះបរមរាជវាំង ស្តូបមិត្តភាពកម្ពុជា-វៀតណាម និងកោះពេជ្រ។ រីឯអគ្គស្នងការនគរបាលជាតិក៏បានដាក់ចេញលេខទូរសព្ទ័១១ខ្សែ ក្នុងនោះមាន លេខពិសេស ១១៧ ឬ ១១៨ ដើម្បីឲ្យបងប្អូនប្រជាពលរដ្ឋ រាយការណ៍មុខសញ្ញាផ្សេងៗ ដែលទាក់ទងនឹងករណីចោរលួច ឆក់ ដាក់ថ្នាំសណ្តំ បាត់ក្រុមគ្រួសារជាដើម ៕
