ខេត្តបាត់ដំបង ៖ប្រភពព័តមានឲ្យដឹងថា ប៉ូលីសអន្តោប្រវេសន៏នៅច្រកអន្តរ-ជាតិដូង ដឹកនាំដោយលោក សៅ ប៊ុនរិទ្ធ បានយកលុយថ្លៃធ្វើប័ណ្ណឆ្លងដែន (Border Pass) ក្នុងតម្លៃកប់ពពក ពីពលករចំណាកស្រុក ក្នុងម្នាក់ៗពី ប្រាំពីរម៉ឺនបីពាន់រៀល ខណៈដែលរាជរដ្ឋាភិបាល បានកំណត់ឱ្យយកតែពីរម៉ឺនរៀលប៉ុណ្ណោះ ។
ប្រភពបានបញ្ជាក់ប្រាប់ថា បច្ចុប្បន្នពលករខ្មែរ នៅតែមានឆ្លងដែនចូលដីថៃ ក្នុងមួយថ្ងៃៗមិនតិចនាក់ទេ តាមច្រកអន្តរជាតិ ដូង ។ ពលករទាំងនោះ ត្រូវចំណាយលុយក្នុង ម្នាក់ៗចំនួនប្រាំពីរម៉ឺនបីពាន់រៀល ដើម្បី ធ្វើប័ណ្ណឆ្លងដែន ម្នាក់មួយសន្លឹកៗ ពីអស់លោកប៉ូលិសអន្តោប្រវេសន៏ក្រោមការគ្រប់គ្រង ដោយលោក សៅ ប៊ុនរិទ្ធ ។
នេះគេគ្រាន់តែ និយាយពីរឿងពលករឆ្លងដែន មួយមុខប៉ុណ្ណោះ ពោលគឺ មិនទាន់និយាយពីរឿងការ ឃុបឃិតគ្នាជាលក្ខណៈប្រព័ន្ធ បណ្តោយឱ្យកើតមានទំនិញ គេចពន្ធនានា ចេញ-ចូលឆ្លង កាត់តាមច្រកអន្តរជាតិដូង នោះផង ។
មន្ត្រីៗប៉ូលិស អន្តោប្រវេសន៏ក្រោមការគ្រប់គ្រងដោយលោក សៅ ប៊ុនរិទ្ធ តែងបានឃុបឃិតជាមួយក្រុម មេខ្យល់មួយចំនួន តាមរយៈការលួចបន្លំឈ្មោះដោយដាក់ ប្រជាពលរដ្ឋដែលធ្វើចំណាក ស្រុក មកពីបណ្តាខេត្តឆ្ងាយៗ ថាជាប្រជាពលរដ្ឋរស់នៅ ក្នុងមូលដ្ឋានជាប់ព្រំដែនខ្មែរ ថៃ ដើម្បីទទួលបានសិទ្ធិស្របច្បាប់ ក្នុងការធ្វើប័ណ្ណឆ្លងដែន ។ ប៉ុន្តែប្រជាពលរដ្ឋ ឆ្ងាយៗ ដែលចង់បានប័ណ្ណ ឆ្លងដែននោះ ត្រូវតែចំណាយលុយចាប់ពីមួយពាន់បាតទៅ មួយពាន់ប្រាំរយបាតប្រាក់ថៃ ក្នុងម្នាក់ៗ ទើបអាចធ្វើ បានដោយអត់មានបញ្ហាឡើយ ។
ប្រជាពលរដ្ឋ នាំគ្នានិយាយរិះគន់ថា ជាទង្វើពុករលួយមួយប្រឆាំងទាំងស្រុង ទៅនឹងអនុក្រិត្យរបស់ ក្រសួងមហាផ្ទៃ ព្រោះថា យោងតាមអនុក្រិត្យលេខ៦៨ របស់ក្រសួងមហាផ្ទៃ បានកំណត់ឱ្យយកថ្លៃធ្វើប័ណ្ណ ឆ្លងដែន ពីប្រជាពលរដ្ឋខ្មែរ ក្នុងម្នាក់ៗត្រឹមតែ ពីរម៉ឺនរៀលប៉ុណ្ណោះ
ផ្ទុយទៅវិញ ក្រុមប៉ូលិសអន្តោប្រវេសន៏ជាកូនចៅ របស់លោក សៅ ប៊ុនរិទ្ធ បែរ ជាយកថ្លៃហួសពីរដ្ឋបានកំណត់ ប្រៀបដូចសង្កត់កដកស្លាប ប្រជាពលរដ្ឋក្រីក្រអត់ឃ្លាន ទៅវិញ ។
ករណីនេះ សូមអោយ ឯកឧត្តម នាយឧត្តមសេនីយ៍ នេត សាវឿន អគ្គស្នងការនគរបាលជាតិ និងឯកឧត្តម នាយឧត្តមសេនីយ៍ សុខ ផល អគ្គនាយក នៃអគ្គនាយកដ្ឋាន អន្តោប្រវេសន៍ គួរតែមានការ ត្រួតពិនិត្យឱ្យបានម៉ត់ចត់ល្អិតល្អន់បំផុត ដោយចៀសវាងកុំ ឱ្យពួកមន្ត្រីៗខិលខូចមួយក្តាប់ តូចនាំគ្នាប្រព្រឹត្តអំពើពុក រលួយធ្វើឱ្យប្រជាពលរដ្ឋខឹងសម្បា ក្លាយទៅជារឿងខឹង គោវាយរទេះពិតប្រាកដ ។
ព័ត៌មានខាងលើនេះ គេហទំព័រយើង នៅមិនទាន់បានទំនាក់ទំនង សុំការបំភ្លឺពីលោក សៅ ប៊ុនរិទ្ធ បាន នៅឡើយទេ ៕
