ខេត្តកំពត ៖ សមត្ថកិច្ចបានចាប់ខ្លួន អនុរដ្ឋលេខាធិការ ក្រសួងធម្មការម្នាក់ ឈ្មោះ នាក់ សំបូរ អាយុជាង៣០ឆ្នាំ រឿងជំពាក់ប្រាក់ អ្នកលក់គ្រឿងសំណង់ រហូតដល់ជាង២០ម៉ឺនដុល្លារ ដើម្បីយកទៅកសាងវត្តមួយ នៅខេត្តកំពត ដើម្បីចង់បានងារជាឧកញ៉ា។
តាមប្រភពព័តមានឲ្យដឹងថា លោក ហែម ចាន់ដារ៉ា មេបញ្ជាការ PM ខេត្តប្រាប់ថា ការចាប់ខ្លួនជនសង្ស័យរូបនេះ បានធ្វើឡើងនៅវេលាម៉ោង ជាង១១ព្រឹកថ្ងៃទី៩ ខែវិច្ឆិកា ឆ្នាំ២០១៦ ស្ថិតនៅចំណុច ភូមិត្រពាំងរាំង ឃុំតានី ស្រុកអង្គរជ័យ ខេត្តកំពត ដោយអនុវត្តតាមដីកាបង្គាប់ឱ្យចាប់ខ្លួន ឃុំខ្លួនចុះថ្ងៃទី២១ ខែកក្កដា ឆ្នាំ២០១៥ របស់លោក ហុង សុគុណវឌ្ឍនា ចៅក្រមស៊ើបសួរ នៃសាលាដំបូងខេត្តកំពត ពីបទ «រំលោភលើទំនុកចិត្ត»។ លោកថា ការចាប់ខ្លួនជនសង្ស័យរូបនេះ ដោយសារតែគាត់ ទិញគ្រឿងសំណង់របស់គេ យកទៅកសាងវត្ត រហូតដល់ជាង២០ម៉ឺនដុល្លារ តែមិនព្រមសង។
យ៉ាងណាក៏ដោយ មន្ត្រីក្រសួងធម្មការម្នាក់ បានឲ្យដឹងថា លោក នាក់ សំបូរ ពិតជាមានតួនាទីជាអនុរដ្ឋលេខាធិការក្រសួងធម្មការ ពិតប្រាកដមែន តែទើបនឹងទទួលបានព្រះរាជក្រឹត្យ តែងតាំងនាពេលថ្មីៗនេះទេ ។ លោកថា លោក នាក់ សំបូរ ពីមុនធ្លាប់បួសជាព្រះសង្ឃនៅប្រទេសថៃ ហើយក្រោយមក ត្រូវបានតែងតាំងជាជំនួយការលោក មិន ឃិន អតីតរដ្ឋមន្ត្រីក្រសួងធម្មការ តែក្រោយពេលលោក មិន ឃិន ស្លាប់ទៅ ស្រាប់តែទៅរត់ការ បានរហូតជាអនុរដ្ឋលេខាធិការក្រសួងតែម្តង ធ្វើឲ្យគេភ្ញាក់ផ្អើលគ្រប់គ្នា តែម្តង ។
ប្រភពព័តមានបន្តថាការចាប់ខ្លួននេះ ធ្វើឡើងនៅពេលជនសង្ស័យ កំពុងធ្វើបុណ្យកថិន ជាមួយរាជទូតថៃនៅវត្តខេត្តកំពត៕
