(ព្រៃវែង)៖ព្រះមហាសុន្ទតរធម្មោ ជឹម សុភាព ព្រះវិន័យធរ និងជាព្រះមេកុដិលេខ២៣ វត្តមហាមន្ត្រី ឯកឧត្តម បណ្ឌិតរដ្ឋ ជាម យៀប និងលោកជំទាវ ហាក់ ជូ ព្រមទាំងសហការី ពុទ្ធបរិស័ទ្ធចំណុះជើងវត្តជិតឆ្ងាយ នៅព្រឹកថ្ងៃទី៣០ ខែតុលា ឆ្នាំ២០១៦ បានរួមគ្នាដង្ហែអង្គកឋិនទានរស្មីសាមគ្គី ដើម្បីយកបច្ច័យទៅប្រគេនព្រះសង្ឃ ដែលគង់ចាំព្រះវស្សាអស់ត្រីមាស ក្នុងវត្តចក្ខនារាម ស្ថិតនៅភូមិចាក់ខ្លាញ់ ឃុំពាមរក៏ ស្រុកពាមរក៏ ខេត្តព្រៃវែង។
ក្នុងឱកាសនោះ ព្រះមហាសុន្ទតរធម្មោ ជឹម សុភាព ព្រះវិន័យធរ និងជាព្រះមេកុដិលេខ២៣ វត្តមហាមន្ត្រី បានលើកឡើងថា ដោយមើលឃើញពីការខ្វះខាតបច្ច័យ ក្នុងការកសាងសាលាឆាន់ និងសមិទ្ធផលនានាក្នុងវត្ត ទើបព្រះគ្រូ និង ពុទ្ធបរិស័ទ្ធចំណុះជើងវត្តជិតឆ្ងាយ បានផ្តួចផ្តើមធ្វើបុណ្យកឋិនទានរស្មីសាមគ្គីនេះឡើង ដើម្បីប្រមូលបច្ច័យ យកមកកសាងសមិទ្ធផលនានាក្នុងវត្ត។
សូមបញ្ជាក់ថា បច្ច័យដែលបានមកពីអង្គកឋិនទានរស្មីសាមគ្គីនេះ មានចំនួន ៣១លានរៀលនិងប្រាក់ដុល្លាចំនួន១៧១២ដុល្លា និងត្រៃមួយចំនួនធំ ដើម្បីវេប្រគេនព្រះសង្ឃទុកសម្រាប់ប្រើប្រាស់កសាងសមិទ្ធផលនានាក្នុងវត្ត ។
ទន្ទឹមនោះដែរ សប្បុរសជនលោក ខា ហុក និងអ្នកស្រី បាន បូរ៉េន បានឧបត្ថម្ភដល់សិស្សានុសិស្ស សាលាបថមសិក្សាចាក់ខ្លាញ់ នូវសៀវភៅសសេរចំនួន១០០០ក្បាល ដោយសិស្សម្នាក់ទទួលបាន សៀវភៅសសេរ១ក្បាល ប៊ិច១និងប្រាក់១០០០រៀលផងដែរ៕
