ខេត្តសៀមរាប:បើទោះបីចៅហ្វាយខេត្តសៀមរាប ធ្លាប់បញ្ជាក់ពីការយកចិត្តទុក ដាក់ទប់ស្កាត់ បទល្មើសនេសាទ យ៉ាងណាក៏ដោយ តាមសេចក្តីរាយការណ៍ ពីប្រជាពលរដ្ឋ រស់នៅ តំបន់បឹង ទន្លេសាប ក្នុងខេត្តសៀមរាបបានរាយការណ៍ថា ក្នុងមូលដ្ឋានរបស់ពួក គាត់បទល្មើសនេសាទ នៅតែកើតទ្បើងយ៉ាងពេញបន្ទុកដដែល ។
ជាក់ស្តែងកាលពីថ្ងៃ០៣ ខែតុលា ២០១៦ នេះ ប្រជាពលរដ្ឋ រស់នៅតាម បណ្តាសង្កាត់មួយចំនួន ក្នុងខេត្តសៀមរាប បានឲ្យដឹងថា ក្រុមជនល្មើសប្រើ ឧបករណ៍ នេសាទ ខុសច្បាប់ បំផ្លាញធនធានមច្ឆាជាតិ នៅតំបន់ចុងឈ្នៀស តាមអំពើចិត្ត ដោយគេសង្ស័យថា មានការបើកដៃ ពីក្រុមមន្ត្រី និងសមត្ថកិច្ចពាក់ព័ន្ធ ។
លើសនេះទៅទៀត សូម្បីតែនៅចំណុចមួយចំនួន ដែលនៅមិនឆ្ងាយពីស្នាក់ការជលផលនោះផង ក៏មានបទ ល្មើស នេសាទកើតទ្បើងយ៉ាងពេញបន្ទុកដែរ ដោយសារមន្ត្រីជលផល និងអាជ្ញាធរ សមត្ថកិច្ចពាក់ព័ន្ធ មិនចាត់វិធានការ បង្ក្រាបទ្បើយ ។
ទាក់ទិននឹងការបណ្តែតបណ្តោយឲ្យមានការដាក់ បទល្មើសដោយខុសច្បាប់នេះ លោកព្រិន សាវិន នាយខណ្ទរដ្ឋបាលជលផលខេត្តសៀមរាប ពុំអាចធ្វើការសុំបំភ្លឺតាមទូរស័ព្ទបានទេ ទោះជាអ្នកសារព័តមានខលចូលចង់បែកមេដៃក៏ដោយ ក៏ពុំមានការទទួលនោះទេ ដោយសារតែលោកព្រិន សាវិន ជានាយខណ្ទចងមុង មិនទំលាប់លើក ទូរស័ព្ទអ្នកសារព័ត៌មាន ព្រោះខ្លាចការបំភ្លឺពីការពិត។
ទាក់ទិននឹងការចោទប្រកាន់ថា សមត្ថកិច្ចរដ្ឋបាលជលផលភ្នំក្រោម អសមត្ថភាពក្នុងការបង្រ្កាបបទល្មើស នេសាទ លោក វុធនាយសង្កាត់រដ្ឋបាលជលផលចុងឃ្នាស បានបំភ្លឺប្រាប់អ្នកសារព័តមាន តាមទូរស័ព្ទថា លោកមួយរយះនេះមិន បានចុះបង្រ្កាបនោះទេ ដោយសារតែជារដូវបើកនេសាទទើបរយាលបន្តិច តែលោកនឹងរៀបចំកម្លាំងចុះបង្រ្កាបនៅថ្ងៃច័ន្ទខាងមុខនេះ តែវាមានផលពិបាកថា នៅពេលចុះទៅបែកការ ហើយអ្នកដាក់បទល្មើសសារវិញអស់។
ក្រុមជនល្មើសបានប្រើសាច់អួនស្បៃមុង មានបណ្តោយរាប់ពាន់ម៉ែត្រ សម្រាប់ចាប់ត្រីខុសច្បាប់ នៅតែបន្តកើតទ្បើង ទាំងយប់ទាំងថ្ងៃ ដោយសារតែមន្ត្រីជលផល និងសមត្ថកិច្ចពាក់ព័ន្ធមិនធ្វើការបង្ក្រាប ។ ប្រជាពលរដ្ឋក្នុង ក្រុងសៀមរាបបានត្អូញត្អែរថា ផលត្រីក្នុងបឹងចេះតែថយចុះជាលំដាប់ ឈានទៅរកការ រលាយផុតពូជ ដោយសារតែបទល្មើសកើតទ្បើងឥតឈប់ឈរ ។
ប្រជានេសាទជាលក្ខណៈគ្រួសាររស់នៅ តាមតំបន់មាត់បឹងបានឲ្យដឹងថា មួយរយៈពេលចុងក្រោយនេះ បទល្មើសនេសាទប្រើសាច់អួនស្បែមុងមាន បណ្តោយចាប់ពី៥០០ម៉ែត្រ ដល់១០០០ម៉ែត្រ និងបល្មើសប្រើឧបករណ៍នេសាទឆក់កំពុងកើត ទ្បើង យ៉ាងពេញបន្ទុក ។ បទល្មើសនេសាទប្រើឧបករណ៍ខុសច្បាប់យ៉ាង អនាធិតេយ្យនោះ កំពុងតែធ្វើឲ្យប៉ះពាល់យ៉ាង ខ្លាំងដល់ជីវភាព រស់នៅ របស់ ប្រជាពលរដ្ឋ ដែលប្រកបរបរ នេសាទជាលក្ខណៈគ្រួសារ ព្រោះពូជត្រីនៅក្នុងបឹង ស្ទើរតែវិនាសសាបសូន្យអស់ទៅហើយ ។
ប្រជាពលរដ្ឋ បានអំពាវនាវឲ្យរាជរដ្ឋាភិបាល ក៏ដូចជាក្រសួង និងស្ថាប័នពាក់ព័ន្ធជួយចាត់វិធានការ បង្ក្រាបបទល្មើសជាបន្ទាន់ ព្រោះពួកគាត់គ្មានជំនឿ លើមន្ត្រី ជលផល មន្ត្រីអាជ្ញាធរ និសមត្ថកិច្ចពាក់ព័ន្ធទៀតទេ។ប្រជាពលរដ្ឋបានបញ្ជាក់ថានៅ ពេលឃើញជនល្មើស ប្រើប្រាស់ ឧបករណ៍ខុសច្បាប់ ពួកគាត់តែង តែរាយការណ៍ ទៅមន្ត្រីអាជ្ញាធរ នគរបាលប៉ុស្តិ៍ និងមន្ត្រីជលផល ប៉ុន្តែនៅទីបំផុតក្រុមជនល្មើស នៅតែអាចធ្វើអ្វីៗតាមអំពើចិត្តដដែល ។តំណាងសហគមន៍ ម្នាក់សូមមិនបញ្ចេញឈ្មោះ បានលើកឡើងថា ក្រុមអ្នកប្រព្រឹត្ដ បទល្មើស ភាគច្រើនជាអ្នកមានលុយ មិនមែនប្រជាពលរដ្ឋក្រីក្រឡើយ ហើយក្រុមនោះ មិនខ្លាចការ បង្ក្រាប របស់មន្ដ្រីជលផល និងសមត្ថកិច្ចពាក់ព័ន្ទទេ ។ ប្រការនេះ ធ្វើឲ្យប្រជាពលរដ្ឋ មានការក្ដៅ ក្រហាយយ៉ាងខ្លាំង ហើយសង្ស័យថា មន្ដ្រីជលផល និងសមត្ថកិច្ចពាក់ព័ន្ធ ជាអ្នកបើកដៃ ទើបក្រុមជន ល្មើសគ្មានញញើតអ្វីទាំងអស់ ។
សរុបសេចក្ដីមក បទល្មើសនេសាទ តំបន់ចុងឈ្នៀស ក្រុងសៀមរាប ខេត្តសៀមរាប កំពុងតែធ្វើឲ្យធនធាន មច្ឆាជាតិក្នុងបឹង ទន្លេសាប ចៀសមិនផុត ពីការរលាយ សាប សូន្យឡើយ ។ បញ្ហានេះ ក្រសួងកសិកម្មរុក្ខាប្រមាញ់ និងនេសាទ និងរដ្ឋបាលជលផល ត្រូវចាត់វិធាន ការទប់ស្កាត់បទល្មើស ប្រកបដោយប្រសិទ្ធភាព ហើយមិនត្រូវជឿលើរបាយការណ៍ របស់ក្រុមមន្ដ្រី ថ្នាក់ក្រោមនោះទេ ព្រោះជួនកាលមន្ដ្រីថ្នាក់ក្រោម មួយចំនួនអាចធ្វើ របាយការណ៍ភូតភរ ដើម្បីផល ប្រយោជន៍បុក្គលខ្លួន៕
