ខេត្តប៉ៃលិន ៖ លោក រ៉ិច គង់ ប្រធានការិយាល័យ គយនិងរដ្ឋាករ ច្រកអន្តរជាតិព្រំ ខេត្តប៉ៃលិន ទទួលរងការរិះគន់ថា តាំងពីឡើងជំនួសលោក ម៉ៅ សំអឿន ដែលថ្នាក់លើ ដកយកទៅបញ្ឈរជើងមក ការប្រមូលពន្ធរបស់លោក រ៉ិច គង់ គឺគ្មានអ្វីប្រែប្រួលជាដុំកំភួន ដើម្បីបង្កើនចំណូលពន្ធគយ នៅឡើយទេ ពោលគឺលោក រ៉ិច គង់ នៅតែបន្តអនុវត្តន៍ ល្បិចរបស់មេគយជំនាន់មុន ក្នុងការបើកដៃឲ្យ មេឈ្មួញ៦ទៅ៧នាក់ ឲ្យដឹកទំនិញគ្រប់ប្រភេទ ឆ្លងកាត់ច្រកអន្តរជាតិព្រំ ខេត្តប៉ៃលិន ដោយបង់ពន្ធមិនគ្រប់ ទុកស៊ីដដែលហ្នឹង ដោយសាររឿង ឃុបឃិតឲ្យឈ្មួញ នាំចូលទំនិញគេចពន្ធ និងទំនិញខុសច្បាប់។
មន្ត្រីតូចតាច បានឲ្យដឹងថា កន្លងទៅ លោក រ៉ិច គង់ កាន់តំណែងជា អនុប្រធានការិយាល័យ គយនិងរដ្ឋាករ ច្រកអន្តរជាតិព្រំ គាត់ក៏មានចំណែក ក្នុងការប្រព្រឹត្ត អំពើពុករលួយ និងទទួលសំណូកពីឈ្មួញ ជាមុខសញ្ញា បង់ពន្ធមិនគ្រប់ ឥឡូវពេលទទួលបានតំណែងជា ប្រធានការិយាល័យ គយនិងរដ្ឋាករច្រកព្រំ លោក រ៉ិច គង់ ជិះសេះលែងដៃតែម្តង ព្រោះធ្លាប់ចាំទទួលផល ពីការនាំចូល ទំនិញខុសច្បាប់ របស់ឈ្មួញធំៗម៉ូយចាស់ ដែលមាន ទំនាក់ទំនងល្អ ជាមួយគាត់កាលពីមុនរួចទៅហើយ។
ប្រភពបានបង្ហើបថា សព្វថ្ងៃនេះលោក រ៉ិច គង់ កំពុងមានទំនាក់ទំនង យ៉ាងជិតស្និទ្ធ ជាមួយមេឈ្មួញ ដែលនាំទំនិញគេចពន្ធ ពីប្រទេសថៃ ចូលទឹកដីខ្មែរ តាមច្រកអន្តរជាតិព្រំ ក្នុងមួយខែៗ មិនតិចជាង ៣០០រថយន្ត ធំៗនោះទេ។ឈ្មួញធំៗដែលគេដឹងថានាំទំនិញចូលតាមច្រកព្រំនេះ ជាអាទិ៍ក្រុមហ៊ុនរបស់អ្នកមានអំណាចនៅក្រុងខេត្ត ។
ក្រុមឈ្មួញបាននាំចូល ទំនិញគេចពន្ធ តាមឡានយីឌុបៗ ក៏ដូចជា កុងតឺន័រ ភាគច្រើនជាប្រភេទទំនិញ ខុសច្បាប់ ដែលត្រូវបង់ពន្ធខ្ពស់ ដោយបង់ពន្ធត្រឹមតែ ៣០ទៅ៤០ ភាគរយប៉ុណ្ណោះ និងបង់ត្រឹមតែ ជាទំនិញចម្រុះ និងគ្រឿងបន្លាស់ នាំឲ្យរដ្ឋខាតបង់ ចំណូលពន្ធ រាប់សិបលានរៀល ក្នុងមួយខែៗនិងរាប់សិបឆ្នាំមកហើយ។
រថយន្តកុងតឺន័រ ភាគច្រើនបានដឹក ប្រភេទរថយន្តទំនើបៗកាត់ត ដែលគេបង់ពន្ធ ជាគ្រឿងបន្លាស់ និងមួយចំនួនទៀត ជាស្រា ភេសជ្ជៈ ទំនិញចាប់ហួយ ហើយរាល់ទំនិញគេចពន្ធ ឆ្លងកាត់តាម ច្រកអន្តរជាតិព្រំ ដែលគេជឿថាក៏មានការបើកភ្លើងខៀវ ពីលោក ទំ ណូន ជាប្រធានសាខាគយ ខេត្តប៉ៃលិន ផងដែរ ទើប អ្វីៗក៏អាចដំណើរការ រលូនដោយគ្មានការត្រួតពិនិត្យ។
កាលពីថ្ងៃទី៩តុលាឆ្នាំ២០១៦ រាជរដ្ឋាភិបាលបានចេញសេចក្តីសម្រេចមួយ បង្កើតក្រុមការងារថ្នាក់ជាតិ ទទួលខុសត្រូវដោយរដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ និងថ្នាក់ខេត្តទទួលខុសត្រូវដោយចៅហ្វាយខេត្ត ដើម្បីធ្វើការទប់ស្កាត់បង្ក្រាបបទល្មើសគេចពន្ធ និងជម្រុញការប្រមូលពន្ធគយ ឲ្យបានកាន់តែប្រសើរឡើងផងដែរ ហេតុដូច្នេះគួរតែថ្នាក់ជាតិនិងថ្នាក់ខេត្ត កុំមើលរំលងឲ្យសោះនូវច្រកមួយនេះ។
ពាក់ព័ន្ធករណីនេះ យើងមិនទាន់អាច ទាក់ទងលោក រ៉ិច គង់ ប្រធានការិយាល័យគយច្រកព្រំ ដែលទើបនឹង ឡើងកាន់តំណែង ដើម្បីបំភ្លឺបានទេ តែនិងព្យាយាមនូវពេលក្រោយ៕
