កំពង់ធំ៖សកម្មភាពឈូសឆាយដីព្រៃអត់ច្បាប់ នៅតែបន្តកើតមានយ៉ាងអាណាធិបតេយ្យ បើទោះបីជាមានការចុះបង្ក្រាបខ្លះៗក៏ដោយ នៅតែមានការឃុបឃិតគ្នាឈូសឆាយដីព្រៃហាមឃាត់ ។
ជាក់ស្តែងនៅរសៀលថ្ងៃទី០៤ខែវិច្ឆិកាឆ្នាំ២០១៦នេះ គ្រឿងចក្រអាបុល១គ្រឿង បានឈូសឆាយដីព្រៃស្ថិតនៅចំនុចព្រំប្រទល់ ស្រុកសំបូរនិងស្រុកប្រាសាទបល្ល័ង្គ ខាងក្រោយភូមិខ្មាក់ ឃុំសាលាវិស័យ ត្រូវបានកម្លាំងផ្នែករដ្ឋបាលព្រៃឈើស្ទោង ចុះឃាត់ទុក បញ្ឈប់សកម្មភាព ដើម្បីសាកសួររកឯកសារច្បាស់លាស់។
ប្រភពព័ត៍មានពីកន្លែងកើតហេតុ បានបង្ហើបឲ្យដឹងថាគ្រឿងចក្រមួយគ្រឿងនេះ ទើបតែចូលឈូសឆាយបានចំនួន២ថ្ងៃទេ តែត្រូវបែករឿងដល់កម្លាំងសមត្ថកិច្ចជំនាញ ក្រោមការបញ្ជាផ្ទាល់ពីលោកអ៊ិតសុធា ព្រះរាជអាជ្ញាខេត្តកំពង់ធំ ទើបនៅរសៀលថ្ងៃទី៤ខែវិច្ឆិកានេះ សមត្ថកិច្ចផ្នែករដ្ឋបាលព្រៃឈើស្ទោង ចុះទៅឃាត់គ្រឿងចក្រមិនឲ្យធ្វើការឈូសឆាយទេ ព្រមទាំងឃាត់ខ្លួនអ្នកបើកគ្រឿងចក្រ យកទៅសាកសួរនៅសង្កាត់រដ្ឋបាលព្រៃឈើប្រសាទបល្ល័ង្គ។
លោក តឹប ញាតា នាយខ័ណ្ឌរដ្ឋបាលព្រៃឈើកំពង់ធំ បានឲ្យដឹងនៅរសៀលថ្ងៃដដែលនេះថាចំពោះគ្រឿងចក្រអាបុល១គ្រឿងនោះ លោកបានបញ្ជាឲ្យកម្លាំងផ្នែកស្ទោងឃាត់សិន រង់ចាំសាកសួររកឯកសារច្បាស់លាស់ ចំនែកអ្នកបើកគ្រឿងចក្រម្នាក់នោះ កំពុងតែសាកសួរនៅរដ្ឋបាលព្រៃឈើ ។
លោក តឹម ញាតា បានឲ្យដឹងទៀតថា ម្ចាស់គ្រឿងចក្រមាន ឈ្មោះណាង បានសុំច្បាប់កាយដីយកទៅធ្វើផ្លូវ តែបែរជាឲ្យកម្មករបើកគ្រឿងចក្រ ទៅឈូសឆាយដីព្រៃហាមឃាត់ទៅវិញ។
ម្ចាស់គ្រឿងចក្រឈ្មោះ ណាង បានឆ្លើយថាខ្លួនគេបានស្នើសុំទៅអាជ្ញាធរស្រុកនិងមេឃុំ រួចហើយព្រោះគ្រាន់តែឈូសកាយដី របស់គាត់សម្រាប់ធ្វើផ្លូវទេ និងយកកន្លែងដាក់គ្រឿងផង។
លោក អ៊ិត សុធា ព្រះរាជអាជ្ញាសាលាដំបូងកំពង់ធំ បានប្រាប់ថាលោកកំពុងតែ បញ្ជាឲ្យសមត្ថកិច្ចជំនាញចុះមើលផែនទី ចុចជីប៊ីអេស និងចាត់ការតាមផ្លូវច្បាប់ហើយ ៕
