កំពង់ធំ៖ រថយន្តលុចសីស៤៧០មួយគ្រឿង ដឹកឈើប្រណិតចំនួន៤៣ដុំ ត្រូវបានកម្លាំងចម្រុះផ្នែករដ្ឋបាលព្រៃឈើស្ទោង ក្រោមការដឹកនាំដោយនិង បញ្ជាផ្ទាល់លោកអ៊ិតសុធា ព្រះរាជអាជ្ញាសាលាដំបូងខេត្តកំពង់ធំ ចុះបង្ក្រាបបានកាលពី រសៀលថ្ងៃទី២ខែវិច្ឆិកាឆ្នាំ២០១៦ នៅចំនុចភូមិកំពង់ធំ សង្កាត់កំពង់រទេះ ក្រុងស្ទឹងសែន ខេត្តកំពង់ធំ បន្ទាប់ពីបានធ្វើសកម្មភាព ដឹកឈើប្រណិតតាមបណ្តោយផ្លូវជាតិលេខ៦។
ប្រភពព័ត៍មានពីសមត្ថកិច្ចបានបង្ហើបឲ្យដឹងថា៖សមត្ថកិច្ចបានចុះធ្វើការឃាត់ចាប់រថយន្ត១គ្រឿងខាងលើនេះបន្ទាប់ពីមាន សេចក្តីរាយការណ៏ផ្តល់ឲ្យថា រថយន្តលុចសីស៤៧០បានធ្វើសកម្មភាពដឹកឈើតាមដងផ្លូវជាតិលេខ៦ ចេញពីកន្លែងមួយយកទៅដាក់កន្លែងមួយតែត្រូវ សមត្ថកិច្ចក្របួចជាប់តែម្តង ដោយរឹបអូសបានឈើប្រណិតចំនួន៤៣ដុំនិងរថយន្តម៉ាកលុចសីស៤៧០ យកទៅធ្វើការវាស់វែងនៅផ្នែករដ្ឋបាលព្រៃឈើស្ទោងដើម្បីចាត់ការតាមច្បាប់ ។
នាយផ្នែករដ្ឋបាលព្រៃឈើស្ទោងបានប្រាប់ឲ្យដឹងថា រថយន្តដឹកឈើមួយគ្រឿងនេះម៉ាកលុចសីស៤៧០ ពណ៍ខ្មៅ ពាក់ស្លាកលេខភ្នំពេញ 2V-71-38 បានធ្វើសកម្មភាពដឹកឈើចេញមកពីខេត្តព្រះវិហារ យកមកដាក់ខេត្តកំពង់ធំ តែត្រូវសមត្ថកិច្ចបានដេញតាមភ្លាមៗ និងបានឃាត់ខ្លួនជនសង្ស័យម្នាក់យកទៅសាកសួរព័តមានបន្ថែម។
នៅចំពោះមុខសមត្ថកិច្ច ជនសង្ស័យបានឆ្លើយថាខ្លួនគេគ្រាន់ជាតៃកុងឡានទេ ហើយចំនែកឈើនោះបងស្រីរបស់ខ្លួនបានទិញ ពីឈ្មោះចែទូចនៅក្នុងខេត្តកំពង់ធំដូចគ្នា គោលបំណង យកទៅធ្វើផ្ទះ តែទោះបីជាយ៉ាងណាក៏ដោយ សមត្ថកិច្ចជំនាញផ្នែករដ្ឋបាលព្រៃឈើស្ទោង បានអះអាងថា ឈើនៅក្នុងរថយន្តលុចស៊ីស៤៧០ មានចំនួន៤៣ដុំ ជាប្រភទឈើធ្នង់និងឈើនាងនួន ត្រូវបានសមត្ថកិច្ចធ្វើការវាស់វែង និងផាកពីន័យតាមផ្លូវច្បាប់ ៕
