តាកែវ: បន្ទាប់ពីកម្លាំងចំរុះ ដឹកនាំដោយលោកព្រះរាជអាជ្ញារង រួមជាមួយ សាខាកាំកុងត្រូល ខេត្តតាកែវ ចុះរឹបអូស យកសាច់ត្រីធ្វើប្រហុក ដែលមានផ្ទុកសារធាតុគីមី នៅឃុំអង្គាញ់ ស្រុកទ្រាំង ជាង ៣ តោន កាលពីថ្ងៃទី ២៨ តុលា ២០១៦ យកមករក្សាទុក នៅសាលាឃុំនោះ នៅរសៀលថ្ងៃទី១ វិច្ឆិកា នេះ បានដុតកំទេចចោលប្រហុក ដែលមានផ្ទុកសារធាតុ formerlin ដែលមានការចូលរួម ពីលោកអភិបាលរងខេត្ត យស ណាស៊ី លោកព្រះរាជអជ្ញារង ផាន់ សុភ័ក្ត្រ និងលោក ប៉ោ លាងគង់ ប្រធានសាខាកាំកុងត្រូលខេត្ត រួមជាមួយមន្ត្រីជំនាញពាក់ព័ន្ធ ។
លោក ប៉ោ លាងគង់ បានប្តេជ្ញាចិត្តថា នឹងបន្តចាប់ ជាបន្តបន្ទាប់ ចំពោះទំនិញដែល កំពុងតែចរាចរលើទីផ្សារ ដែលបន្លំ គ្មានគុណភាព គ្មានប្រភពច្បាស់លាស់ ដាក់បន្ថែមនូវសារធាតុគីមី ពិសេស គឺទំនិញដែលលួចដឹកចូល មកតាមច្រករបៀង មួយចំនួនក្នុងខេត្តតែម្តង ។
លោកព្រះរាជអាជ្ញារង ខេត្តតាកែវថា ចំពោះជនសង្ស័យ ឈ្មោះ ជឹម ចាន់ថន ដែលកម្លាំងចំរុះចុះបង្ក្រាប នៅទីតាំងផលិតប្រហុកកែច្នៃ ដាក់សារធាតុគីមីនោះ ត្រូវបានដោះលែង ឱ្យត្រឡប់មកផ្ទះវិញហើយ ដោយគ្រាន់តែឃុំខ្លួន បណ្តោះអាសន្ន រយៈពេលបីថ្ងៃ ពិន័យជាប្រាក់ និងធ្វើកិច្ចសន្យាជាមួយ តុលាការតែប៉ុណ្ណោះ ៕
