កំពង់ធំ៖នៅព្រឹកថ្ងៃទី០២ខែវិច្ឆិកាឆ្នាំ២០១៦នេះសាខាកាំកុងត្រូលខេត្តកំពង់ធំសហការជាមួយមន្ទីរពាណិជ្ជកម្មខេត្តព្រមទាំងកម្លាំងសមត្ថកិច្ចមូលដ្ឋានចុះត្រួតពិនិត្យផលិតផលខូចគុណភាពនិងនៅផ្សារកំពង់ថ្ម ស្ថិតនៅភូមិត្រស់ ឃុំបល្ល័ង្ក ស្រុកបារាយណ៏ ខេត្តកំពង់ធំ ។
នៅក្នុងប្រតិបត្តិការព្រឹកមិញនេះកម្លាំងជំនាញបានចុះឆែកនៅតាមបណ្តាតូបលក់ដូរ ជាច្រើនកន្លែងនៅក្នុងផ្សារកំពង់ថ្ម ដោយបានរកឃើញផលិតផលដែលបង្កឲ្យប៉ះពាល់ដល់សុខភាពមាន ស្ករគ្រាប់ដែលនាំមកពីប្រទេសវៀតណាមនិងប្រទេសចិនចំនួន ៨២កញ្ចប់ ជាមួយគ្នាធ្វើការពិនិត្យតូបលក់សសៃគុយទាវ១កន្លែង បានរកឃើញគុយទាវមានសារធាតុបូរ៉ាក់ជិត២គីឡូផងដែរ។
លោកលៀងសុភា ប្រធានសាខាកាំកុងត្រូលខេត្តកំពង់ធំបានឲ្យដឹងថា ផលិតផលខូចគុណភាពសមត្ថកិច្ចជំនាញដកយកមកកំទេចចោល។ ចំនែកអាជីវករជាម្ចាស់ផលិតផលខូចគុណភាពសមត្ថកិច្ចបានយោគយល់គ្រាន់តែធ្វើកិច្ចសន្យាអប់រំ ហាមមិនឲ្យតាំងលក់ទៀត តែបើមានលក់លើកក្រោយ ត្រូវចាត់វិធានការតាមច្បាប់ហើយ ។
ជាមួយគ្នានេះដែរ លោកក៏បានធ្វើការណែនាំដល់អាជីវករផ្សារកំពង់ថ្មហាមមិនឲ្យលក់ទឹកត្រីមួយចំនួនដែលអាជ្ញាធរវៀតណាម ទើបតែរកឃើញថា ផ្ទុកសារធាតុគ្រោះថ្នាក់កម្រឹតខ្ពស់ មានជាតិអាសូនិច នឹងបង្រៀនឲ្យចេះពី របៀបមើលកាលបរិច្ឆេត លើមុខទំនិញ ព្រមទាំងពន្យល់ឲ្យអាជីវករចេះថែរក្សាផលិតផលរបស់ខ្លួន ចេះទុកដាក់ឲ្យមានអនាម័យដើម្បីសុខភាព ព្រោះថាកក្តារួមចំនែកទាំងនេះហើយធ្វើឲ្យយើងស្គាល់ពីផលិតផលពិតឬក្លែងក្លាយ ព្រោះសុខភាពរបស់មនុស្សជាកក្តាសំខាន់ណាស់។
ជាមួយគ្នានេះដែរ ប្រជាពលរដ្ឋក៏បានសាទរចំពោះសមត្ថកិច្ចជំនាញយកចិត្តទុកដាក់បង្ក្រាប ៕
