លោកព្រះរាជអាជ្ញារងដឹកនាំកំលាំងចម្រុះចុះបង្ក្រាបទីតាំងឈ្មួញរកស៊ីឈើប្រណិត ដឹកជញ្ជូន និងស្តុកទុកឈើ ដុះស្លែរកាលពីរព្រឹក ថ្ងៃទី១៨ ខែកក្កដា ឆ្នាំ២០១៤ស្ថិតនៅ ក្នុងភូមិព្រៃពន្លិច សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ!
មតិមហាជននិយាយថា ក្នុង១រយៈពេលកន្លងមកនេះ គឺចាប់តាំងពីលោកព្រះរាជអាជ្ញា និងលោកព្រះរាជអាជ្ញារងផ្លាស់មកថ្មី បានបញ្ចេញនូវកណ្តាប់ដៃដែកដឹកនាំកំលាំងចំរុះចុះបង្ក្រាបបទល្មើសព្រៃឈើគួរឲ្យកត់សម្គាល់ ។ រីឯសកម្មភាពដឹកជញ្ជូនឈើនៅក្នុងខេត្តកំពង់ធំ បានស្ងប់ស្ងាត់មួយកម្រិត ក៏ប៉ុន្តែមិនមែនបានសេចក្តីថាគ្មានបទល្មើសនោះទេ គឺនៅតែមាន រហូតមកដល់ពេលនេះ បទល្មើសព្រៃឈើ បានកំរើកសារជាថ្មី ក្រោមការដឹកជញ្ជូនជាលក្ខណៈបង្កប់ក្នុងរថយន្ត ដឹកអេតចាយ យកមកស្តុក នៅតាមផ្ទះ លុះនៅពេលយប់ បទល្មើសនឹងត្រូវបានដឹកចេញជាបន្តបន្ទាប់ ។
គណៈបញ្ជាការឯកភាពខេត្ត ដែលមាន ឯកឧត្តម អ៊ុត សំអន អភិបាលខេត្តកំពង់ធំ និងជាប្រធានគណៈបញ្ជាការឯកភាពខេត្ត បញ្ជាឲ្យកំលាំងចុះបង្ក្រាបបទល្មើសខុសច្បាប់ទាំងបទល្មើសព្រៃឈើ និងបទល្មើសនេសាទបានជាច្រើនករណីគួរឲ្យមោទនៈ ។ ជាក់ស្តែង កាលពីព្រឹក ថ្ងៃទី១៨ ខែកក្កដា ឆ្នាំ២០១៤ដោយមានការឯកភាពពី ឯកឧត្តម អ៊ុត សំអន អភិបាលខេត្ត និងលោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ធំនោះ លោក សាយ ណូរ៉ា ព្រះរាជអាជ្ញារង បានដឹកនាំកំលាំងចម្រុះ ឆែកទីតាំងស្តុកឈើមួយកន្លែងស្ថិតនៅ ក្នុងភូមិព្រៃពន្លិច សង្កាតអាចារ្យលាក់ ក្រុងស្ទឹងសែន ខេត្តកំពង់ធំ ដែលមានម្ចាស់ផ្ទះ ឈ្មោះ រៀល នុន ជាប្ដីអាយុ ៧៣ឆ្នាំ និង ប្រពន្ធឈ្មោះ នី បុប្ឋាវី អាយុ ៤៦ឆ្នាំ មានមុខរបរបន្លំភ្នែក ជាអ្នកទិញអេតចាយ តែធាតុពិតរកស៊ីឈើប្រណិត ប្រហែលជាមុខរបរដឹកអេតចាយ មិនសូវកាក់កប ក៏បានគំនិតដឹកអេតចាយពីលើឈើប្រណិតពីក្រោម ហើយកន្លងមកត្រូវបានព្រះរាជអាជ្ញាធ្វើកិច្ចសន្យា២ដង រួចមកហើយ ឲ្យបញ្ឈប់នូវការជួញដូរឈើ តែនៅតែមិនរាងចាល ។ ឲ្យឈប់យ៉ាងម៉េចបើរកស៊ីដឹកឈើប្រណិតវាបានចំណេញប្រាក់ច្រើននោះ ! ថែមទាំងនិយាយអួតអាងថា កន្លងមកពុំដែលមាននរណាហ៊ានបង្ក្រាបទីតាំងរបស់គាត់នោះទេ! ព្រោះសំអាងមានខ្នងអ្នកធំនៅពីក្រោយ ហើយក៏មិនដឹងថាខ្នងនោះធំប៉ុណ្ណានោះដែរ ។ ពេលនេះសមត្ថកិច្ចចុះបង្ក្រាបបានរឹបអូសស្ទើគ្មានសេសសល់នោះទេ ដែលមានឈើប្រភេទធ្នង់ ចំនួន ៣០២ដុំ ព្រមទាំងសន្លឹកឈើនីវជាង២០០សន្លឹក ទ្វារ គ្រែ និងឈើមុខកាត់មូលផងដែរ យកទៅរក្សាទុកនៅផ្នែករដ្ឋបាលព្រៃឈើស្ទោងចាត់ការតាមផ្លូវច្បាប់ ។
ក្នុងថ្ងៃដដែល សមត្ថកិច្ចមេព្រៃ បានរឹបអូសបានរថយន្តដឹកឈើប្រភេទ សាំយ៉ុង មួយគ្រឿង ពណ៌ សរ អត់ស្លាកលេខ បានលួចដឹកឈើធ្នង់ ចេញពីខេត្តព្រះវិហារ ឆ្លងកាត់ខេត្តកំពង់ធំ ចាប់បាននៅ ចំនុចភូមិ ស្រយូវ សង្កាត់ស្រយូវ ក្រុង ស្ទឹងសែន អ្នកបើកបរក៏ចុះរត់បាត់ស្រមោល បន្សល់ទុករថយន្ត សមត្ថកិច្ចក៏យកទៅរក្សាទុកនៅផ្នែករដ្ឋបាលព្រៃឈើស្ទោង ដើម្បីរងចាំធ្វើការវាស់វែង ៕
