ខេត្តកំពង់ធំ ៖ លោក សាយ ណូរ៉ា ព្រះរាជអាជ្ញារងអមសាលាតំបូងខេត្តកំពង់ធំ បានប្រាប់អោយដឹងថា បន្ទាប់ពីទទួលព័ត៌មានថា មានរថយន្ដយីឌុបពណ៍ត្រីអ៊ីរបស់យោធាបានដឹកឈើចេញពីខេត្តព្រះវិហារ ឆ្ពោះមកខេត្តកំពង់ធំ លុះព្រឹកឡើងម៉ោង៦,១៧នាទី ក៏ប្រទះឃើញរថយន្តនោះកំពង់ រើឈើដាក់ក្នុងដីឡូតិ៍ផ្ទះប្រជាពលរដ្នមួយកន្លែង លោកក៏បានដឹកនាំកំលាំងចំរុះចុះដល់កន្លែងដែលរថយន្ដចតក៏បានឃើញឈើពេញ១រថយន្ដយីឌុប ហើយកម្មករកំពុងរើ ។ លោកបានសួររកលិខិតអនុញ្ញាត បន្ទាប់មកក៏ឃើញមនុស្សម្នាក់កាន់លិខិតអនុញ្ញាត ក្នុងលិខិតនោះដាក់ថា ជាប្រភេទឈើផ្ទះចាស់និងមានលិខិតអនុញ្ញាត ដោយ ឯកឧត្តមអភិបាលខេត្ត ឲ្យដឹកផ្ទះចាស់មកពីខេត្តព្រះវិហារ បន្ដមកធ្វើផ្ទះនៅក្នុងភូមិព្រៃពន្លិច សង្កាត់អាចារ្យលាក់ ។ ក៏ប៉ុន្តែការពិតវាខុសពីខ្លឹមសារនៅក្នុងលិខិតអនុញ្ញាត លោកក៏ហៅកំលាំងជំនាញមេព្រៃអោយមកពិនិត្យឃើញថា សុទ្ធតែឈើថ្មី ខុសពីរការស្នើសុំ ហើយក៏ជំរាបទៅឯកឧត្តមអភិបាលខេត្ត ក៏ចាត់វិធានការតាមច្បាប់ ។ នៅក្នុងឯកសារដាក់ចំនួន១៨ម៉ែត្រគូប តែបើតាមជំនាញមេព្រៃអះអាងថាលើសច្រើនម៉ែត្រគូបណាស់ ។
ទាំងអស់នេះគឺជាសកម្មភាពរបស់ឈ្មួញឈើ ក្លែងបន្លំ លិខិតក្នុងការស្នើរសុំអភិបាលខេត្តដឹកឈើផ្ទះចាស់ៗ ប្រភពពត៌មានបានបញ្ជាក់ច្បាស់ថា នៅពេលដែលពួកឈ្មួញ សុំលិខិតអនុញ្ញាតិបានហើយ ឲ្យដឹកត្រឹមតែជាង ១០ម៉ែត្រគូប ប៉ុណ្ណោះ តែឈ្មួញវិញនោះលេងមួយអស់ដៃតែម្តងគឺដឹកចាប់ពី ទៅ៥០ទៅ ៦០ ម៉ែត្រគូបឯណោះ! ។
ជាក់ស្តែងរថយន្តយីឌុបនេះ ដឹកលើសពីលិខិតអនុញ្ញាតិរហូតដល់ទៅ៣ដងឯណោះ ក្រោយពីសមត្ថកិច្ច បានពិនិត្យហើយបានរកឃើញថា ពិតជាបានក្លែងបន្លំយកឈើថ្មី មកជំនួសឈើចាស់ពិតមែន ឈើនិងរថយន្តត្រូវបាន បញ្ជូនមកផ្នែករដ្ឋបាលព្រៃឈើស្ទោង ដើម្បីឲ្យសាម៉ីខ្លួនចូលមកដោះស្រាយដោយ សន្តិវិធីទៅតាមច្បាប់ ៕
