ខេត្តបន្ទាមានជ័យ៖ តាចាស់ម្នាក់ទៅផឹកស្រាតាំងពីព្រឹក រហូតដល់ព្រលប់ស្រវឹងជោក លុះត្រឡប់មកផ្ទះ ដើរដឹកកង់ដួលបោកក្បាលស្លាប់យ៉ាងអាណោធអាធ័ម ហេតុការណ៍នេះ នៅវេលាម៉ោង៧ និង៤០នាទីយប់ ថ្ងៃទី១៦ ខែកក្កដា ឆ្នាំ២០១៤ នៅលើកំណាត់ផ្លូវជាតិលេខ៥ ត្រង់ចំណុចភូមិ អួរស្ងួត ឃុំ អូរប្រាសាទ ស្រុកមង្គលបូរី ខេត្តបន្ទាយមានជយ័។
បើតាមប្រភពបានប្រាប់ថា តាចាស់ខាងលើនេះតែងតែដើរផឹកស្រា គ្មានថ្ងៃស្វាងសោះ អោយតែមានគេបបួលផឹកកុំខានឲ្យសោះ មុនកើតហេតុរូបគាត់បានដើររកដៃគូរផឹកពីដើមភូមិ ដល់ចុងភូមិ លុះពេលគាត់ស្រវឹងស្រាជោគជាំ ក៏ត្រឡប់មកផ្ទះវិញដឹកកង់ខ្លួនឯងដួលបោកក្បាលស្លាប់ នៅកន្លែង កើតហេតុតែម្តង ។
ក្រោយពីកើតហេតុគេឃើញមានសមត្ថកិច្ច អ ហ និងសមត្ថកិច្ចមូលដ្ឋានចុះមកកន្លែងកើតហេតុ និងបានធ្វើកោសល្យវិច្ឆ័យសាកសពជនរងគ្រោះ ។ ក្រោយពីបានធ្វើកោសល្យវិច្ឆ័យរួច រាល់ សមត្ថកិច្ចបានសន្និដ្ឋានថា សាកសពជនរងគ្រោះខាងលើនេះពិតជាបានដួលបោកក្បាលស្លាប់ខ្លួនឯង មែន មិនមានពាក់ព័ន្ធករណីឃាតកម្មអ្វីនោះទេ។
លោកវរសេនីយ៍ត្រី រស់ សំបូរ មេបញ្ជាការកងរាជអាវុធហត្ថស្រុកមង្គលបូរី បានប្រាប់នៅព្រឹកនេះថា ក្រោយពីបានប្រជាពលរដ្ឋបានរាយការណ៍សមត្ថកិច្ច អ ហ លោកក៏បានបញ្ជាកម្លាំង ៤ នាក់ចុះទៅត្រួតពិនិត្យនៅកន្លែងកើតហេតុភ្លាមៗ។
លោកបានបន្តថា មានករណីផឹកស្រាស្រវឹងដើរដឹកកង់ដួលបោកក្បាល ទៅលើផ្លូវជាតិលេខ ៥ បណ្តាលអោយស្លាប់នៅនឹងកន្លែង ជនរងគ្រោះឈ្មោះ វ៉ាន់ ភួ ភេទ ប្រុស អាយុ ៧៦ ឆ្នាំ រស់នៅ ភូមិព្រៃចង្ហារលិច ឃុំបន្ទាយនាង ស្រុកមង្គលបូរី។
សមត្ថកិច្ចបានប្រគលសពជូនទៅក្រុមគ្រួសារដើម្បីយកទៅធ្វើបុណ្យតាមប្រពៃណីខ្មែរ ៕
