ខេត្តសៀមរាប ៖ អ្នកភូមិដែលមានជំលោះដីធ្លីជាងមួយរយនាក់ ក្មេង ចាស់ ប្រុសស្រី និងមានម្ហូបអាហារជាស្រេច ជិះគោយន្តចេញពីឃុំស្រែណូយ ស្រុកវ៉ារិន ខេត្តសៀមរាប ប៉ុន្តែត្រូវបានអភិបាលរងខេត្តចុះជួបដោះស្រាយ នៅ ពាក់កណ្តាលផ្លូវ ត្រង់ចំណុចរង្វង់មូលស្រុកបន្ទាយស្រី ដើម្បីកុំឱ្យប៉ះពាល់សណ្តាប់ធ្នាប់នៅតាមដងផ្លូវ ។
ហេតុការណ៍នេះកើតឡើងនៅថ្ងៃទី២៣ ខែមេសា ឆ្នាំ២០១៤ ដោយពលរដ្ឋទាំងនោះមានជម្លោះ ជាមួយយោធា កង ពល លេខ៥ និងយោធភូមិភាគទី៤ ។
ប្រជាពលរដ្ឋនៅឃុំស្រែណូយ ស្រុកវ៉ារិន បានឱ្យដឹងថា ពលរដ្ឋ១២៥នាក់ស្នើឱ្យលោក ឃឹម ប៊ុនសុង ជួយដោះ ស្រាយទំនាស់ដីធ្លីជាមួយយោធាកងពលលេខ៥ និងយោធាយោធភូមិភាគទី៤ ចំណុចសង្កែធំ និងចំណុចអូរផ្អាវ ។ អ្នកភូមិបានបន្តថា ដីពួកគាត់បានកាន់កាប់ និងបង្កបង្កើនផលតាំងពីឆ្នាំ២០០៥ ។ ប៉ុន្តែត្រូវទាហាន កងពលលេខ ៥ ដកហូតយកជួលឱ្យឈ្មួញដាំដំឡូង ដោយយកលេសធ្វើកន្លែងអភិវឌ្ឍន៍យោធា ។ ទំនាស់ដីធ្លីនេះ កើតឡើងនៅ ឆ្នាំ២០១៣ ជាមួយយោធាកងពលលេខ៥ និងយោធភូមិភាគទី៤ ដែលមានផ្ទៃដីទំហំជិត៧០០ហិកតា ស្មើនឹង ជាង ១២៥ គ្រួសារ ស្ថិតនៅឃុំស្រែណូយ ស្រុកវ៉ារិន ។ ប្រជាពលរដ្ឋទាំងនោះបានឱ្យដឹងថា បើអាជ្ញាធរខេត្តមិនជួយ ដោះស្រាយទេ ពួកគាត់នឹងធ្វើដំណើរទៅរាជធានីភ្នំពេញ ដើម្បីឱ្យសម្តេចតេជោ ហ៊ុន សែន ជួយអន្តរាគមន៍ ។
អ្នកភូមិបានជិះគោយន្តកន្ត្រៃចំនួន ១១គ្រឿង សំរុកចូលមកក្រុងសៀមរាបក្នុងគោលបំណងសុំឱ្យអភិបាល ខេត្ត ដោះស្រាយដីទំនាស់រវាងអ្នកភូមិ និងក្រុមយោធា ។ ទោះបីមិនបានទៅដល់គោលដៅដោយត្រូវសមត្ថកិច្ច ស្ទាក់ នៅចំណុចស្រុកបន្ទាយស្រី តែរវាងអ្នកស្រុក និងសមត្ថកិច្ចក៏មិនបានប៉ះទង្គិចគ្នាដែរ គឺមានសកម្មភាព ប្រកប ដោយអហិង្សា ។
អ្នកភូមិបានឱ្យដឹងថា ទំនាស់ខាងលើអូសបន្លាយជាយូរមកហើយ ពួកគាត់បានប្តឹងទៅអាជ្ញាធរស្រុកខេត្ត ប៉ុន្តែ អាជ្ញាធរគ្រប់ជាន់ថ្នាក់ចេះតែឱ្យរង់ចាំ គឺនាំមួយឆ្នាំហើយមួយឆ្នាំទៀត ដោយពុំអាចចាំតទៅ ទៀតបាន ទើបពួកគាត់ សម្រេចលើកគ្នាមកកាន់សាលាខេត្តសៀមរាប ។
នៅរសៀលថ្ងៃទី២៣ខែមេសានេះ ប្រជាជនបានត្រឡប់ទៅគេហដ្ឋានវិញហើយ បន្ទាប់ពីលោក ប៊ុន ថាឫទ្ធិ បានចុះ ជួបនៅស្រុកបន្ទាយស្រី ដោយធ្វើកិច្ចសន្យា នឹងសន្យាទៅដោះស្រាយជូនពួកគេ នៅថ្ងៃស្អែកនេះ ៕
