ខេត្តសៀមរាប៖ ដោយខ្យល់កន្ទ្រាក់ ធ្វើឲ្យប៉ះពាល់ភូមិ ចំនួន៣ ក្នុង ឃុំ ស្រែណូយ ស្រុកវ៉ារិន ខេត្តសៀមរាប កាលវេលាម៉ោង១៧ និង ០០នាទី នារសៀលថ្ងៃទី២៨ ខែ មេសា ឆ្នាំ ២០១៦ ដែលបានធ្វើឲ្យលំនៅដ្ឋានរបស់បងប្អូនប្រជាពលរដ្ឋ ចំនួន១៦៣ខ្នង រលំ និង របើកដំបូល ព្រមទាំងធ្វើ ឲ្យមានរងរបួសមនុស្សទៀតផង ។
នៅព្រឹកថ្ងៃទី ២៩ ខែ មេសា ឆ្នាំ២០១៦នេះ ឯ.ឧ ឃឹម ប៊ុនសុង អភិបាលខេត្ត បានដឹកនាំប្រតិភូ ខេត្ត ចុះពិនិត្យពីស្ថានការណ៍ នៃការប៉ះពាល់ និង ខូចខាតលំនៅដ្ឋានរបស់ប្រជាពលរដ្ឋ ។
តាមការបញ្ជាក់ របស់អាជ្ញាធរមូលដ្ឋានបានឲ្យដឹងថា៖ នៅវេលាម៉ោង១៧ និង ០០នាទី មានភ្លៀង ធ្លាក់មួយមេធំ ដោយលាយឡំនឹងខ្យល់កន្ទ្រាក់ មកពីទឹសបូព៌ បានឆ្លងកាត់លើភូមិសាស្ត្រឃុំ ស្រែណូយ បានធ្វើឲ្យលំនៅដ្ឋាន របស់ប្រជាពលរដ្ឋ ចំនួន៣ភូមិ ដួលរលំ និង ប៉ើងដំបូល ក្នុងនោះក៏មាន មណ្ឌល សុខភាព , សាលារៀន សាលាឃុំ ព្រមទាំងធ្វើឲ្យមនុស្សរងរបួសចំនួន ៣នាក់ និង ខូចខាត ទ្រព្យសម្បត្តិផងដែរ ។
នៅក្នុងនោះ លំនៅដ្ឋាន ដែល ទទួលរងគ្រោះដោយខ្យល់កន្ទ្រាក់នេះ សរុបចំនួន ១៦៣ខ្នង ក្នុងនោះភូមិស្រែពោធិ៍ ផ្ទះប៉ើងដំបូល ចំនួន ១០ខ្នង , ភូមិស្រែណូយ ផ្ទះដួលរលំ ចំនួន ០២ខ្នង របើកដំបូល ២៧ខ្នង របួសមនុស្ស ០១នាក់ , ភូមិគោកវត្ត ផ្ទះដួលរលំ ចំនួន ០៤ខ្នង របើកដំបូល ១២០ខ្នង មានរបួសមនុស្ស ០២នាក់ ។
ក្នុងដំណើរ ចុះពិនិត្យស្ថានការណ៍ខូចខាតនោះ ឯ.ឧ ឃឹម ប៊ុនសុង បានសម្តែងនូវការសោក ស្តាយ អាណិតអាសូរ ចំពោះបងប្អូនក្រុមគ្រួសាររងគ្រោះទាំងអស់ ដែលបានខិតខំកសាងនូវជីវភាព របស់ខ្លួន ដើមី្បឲ្យមានទីជម្រករស់នៅសមរម្យ ប្រកបដោយសុភមង្គល ។ តែនេះជាអកុសល នៃបាតុភូតធម្មជាតិ ដែលយើងមិនអាចគេចបាន ។
ឯ.ឧ ឃឹម ប៊ុនសុង បានបញ្ជាក់ ថា៖ ក្នុងគ្រាដែលប្រជាពលរដ្ឋ នៅតាមបណ្តាស្រុក តំបន់មួយ ចំនួន ខ្វះខាតទឹកប្រើប្រាស់ ក៏ត្រូវបានប្រមុខ រាជរដ្ឋាភិបាល ក្រោមកិច្ចដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រី បានបើកនូវយុទ្ធនាការ ក្នុងការចុះ ចែកទឹកដល់ប្រជាពលរដ្ឋ រហូតដល់មានភ្លៀង ធ្លាក់ មកគ្រប់គ្រាន់ ដោយមិនទុកឲ្យបងប្អូនណាម្នាក់ ស្លាប់ដោយឥតទឹក បរិភោគនោះឡើយ ។
ឯកឧត្តម បាន ណែនាំដល់អាជ្ញាធរគ្រប់ជាន់ថ្នាក់ ត្រូវជួយធ្វើការជួសជុលលំនៅដ្ឋានដែលដំបូល របើក ដើមី្បឲ្យបានពួកគាត់ស្នាក់នៅ ប្រកបមុខរបរចិញ្ចឹមជីវិតប្រចាំថ្ងៃ របស់ពួកគាត់ផងដែរ ៕
