ខេត្តកំពង់ធំ ៖ កាលពីថ្ងៃទី ១០ ខែកក្កដា ឆ្នាំ២០១៤ វេលាម៉ោង ១៩ និង២០នាទីយប់ កងរាជអាវុធហត្ថ ស្រុកបារាយណ៍ ខេត្តកំពង់ធំ បានតាមចាប់ចោរដៃឆើតមួយរូប នៅស្រុកកំពង់ត្រឡាច ខេត្តកំពង់ឆ្នង្មាំ យកមកទី ស្នាក់ការកងរាជអាវុធហត្ថស្រុកបារាយណ៍ ព្រមទាំងបានបញ្ជូនខ្លួនជនសង្ស័យទៅតុលាការតាមនីតិវិធីច្បាប់ ក្រោម កិច្ចដឹកនាំបញ្ជាផ្ទាល់ដោយលោកវរៈសេនីយ៍ត្រី ឃុន ប៊ុនហួរ មេបញ្ជាការកងរាជអាវុធហត្ថស្រុកបារាយណ៍ ។
ជនសង្ស័យដែលជាចោរដៃឆើតលួចម៉ូតូឈ្មោះ សន រ័ត្ន អាយុ ២៣ឆ្នាំ បានលួចម៉ូតូឌ្រីមស៊េរីឆ្នាំ២០១៣ នៅក្នុងវិទ្យាល័យគ្រើល ឃុំអណ្តូងពោធិ៍ ស្រុកបារាយណ៍ ខេត្តកំពង់ធំ រីឯជនរងគ្រោះជាម្ចាស់ម៉ូតូមានឈ្មោះ សិត រមនា ជាអ្នកគ្រូសាស្ត្រចារ្យបង្រៀននៅវិទ្យាល័យគ្រើល ។
តាមព័ត៌មានផ្តល់ឱ្យដោយសមត្ថកិច្ចបានឱ្យដឹងថា កាលពីថ្ងៃទី ០៩ ខែកក្កដា វេលាម៉ោង ១កន្លះរសៀល ជនសង្ស័យឈ្មោះ ចាន់រ័ត្ន បានចូលទៅក្នុងអនុវិទ្យាល័យគ្រើល ដោយលួចយកម៉ូតូ ឌ្រីមស៊េរីឆ្នាំ២០១៣ របស់ អ្នកគ្រូ សិត រមនា ដែលកំពុង បង្រៀន គួរសិស្សបានដោយសុវត្ថិភាព ។
ក្រោយពីលួចបានហើយ ចោរដៃឆើតក៏បានជិះមកស្រុកកំពង់ត្រឡាច ខេត្តកំពង់ឆ្នាំង ដោយយកម៉ូតូដែល លួចបានទៅដូរពីអ្នកលក់ម៉ូតូមួយកន្លែង យកម៉ូតូ ឌ្រីមស៊េរីឆ្នាំ២០០៨ វិញ និងសុំថែមលុយ ៣០០ដុល្លារ ។
ក្រោយពីពិនិត្យប័ណ្ណសំគាល់យានយន្តដែលមានឈ្មោះ សិត រមនា ទើបអ្នកលក់ម៉ូតូ និងមេភូមិមានការ សង្ស័យទូរស័ព្ទមកសួរសមត្ថកិច្ចស្រុកបារាយណ៍ និងម្ចាស់ម៉ូតូ ទើបបែកធ្លាយរឿងចោរដៃឆើតលួច ម៉ូតូក្តៅអ៊ុនៗ សមត្ថកិច្ចមូលដ្ឋានឃាត់ខ្លួនជនសង្ស័យ ព្រមទាំងប្រគល់ឱ្យកម្លាំងកងរាជអាវុធហត្ថស្រុកបារាយណ៍ ចាត់ការទៅតាមនីតិវិធីច្បាប់ ។
ដោយមានការសហការល្អរវាងកម្លាំងសមត្ថកិច្ចទាំងពីរខេត្ត ទើបចោរដៃឆើតមិនអាចគេចខ្លួនរួច ចំណែកម៉ូតូ និងត្រូវបានកម្លាំងកងរាជអាវុធហត្ថស្រុកបារាយណ៍ប្រគល់ជូនអ្នកគ្រូ សិត រមនា វិញ ។
ប្រជាពលរដ្ឋនៅស្រុកបារាយណ៍មានទំនុកចិត្តនិងកោតសរសើរចំពោះការបំពេញភារកិច្ចបំរើការងារប្រជាជនបានយ៉ាងល្អប្រសើររបស់កងរាជអាវុធហត្ថស្រុកបារាយណ៍ ក្រោមការដឹកនាំបញ្ជារបស់លោកវរៈសេនីយ៍ត្រី ឃុន ប៊ុនហួរ ដែលតែងតែយកចិត្តទុកដាក់ការពារសន្តិសុខ សុវត្ថិភាពជូនចំពោះប្រជាពលរដ្ឋមូលដ្ឋានឈានទៅដល់ភូមិ ឃុំ មានសុវត្ថិភាពល្អ បង្ក្រាបបានទាន់ពេលនូវអំពើលួចឆក់ប្លន់ និងការជួញដូរសេពគ្រឿងញៀនជាដើម ៕
ដោយ ៖ តេច ឆេង
