បើកការដ្ឋានស្ថាបនា ផ្លូវក្នុងភូមិបឹងដូនប៉ា ជាអំណោយរបស់ សម្តេចតេជោ

ខេត្តសៀមរាប៖ ផ្លូវមួយខែ្សប្រវែង ១ពាន់៦២០ម៉ែត្រ ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រី បានផ្តល់ជូនដល់បងប្អូនប្រជាពលរដ្ឋ ក្នុងភូមិបឹងដូនប៉ា សង្កាត់ស្លក្រាម ក្រុង ខេត្តសៀមរាប ក្នុង ឱកាសដែលសម្តេចអញ្ជើញចុះត្រួតពិនិត្យ និងកាត់ឃ្វៀលដីនៅក្នុងតំបន់បុរីវប្បធម៌ទេសចរណ៍ នាឆ្នាំ២០១៥ កន្លងមក ។

ផ្លូវមួយខ្សែនេះ ដែលបានតភ្ជាប់ពីផ្លូវបេតុងក្រោយវត្តព្រះឥន្ធកោសីយ៍ ហៅវត្តលើ ទៅតភ្ជាប់ ផ្លូវ ៦០ម៉ែត្រ ជាប្រភេទផ្លូវចាក់បេតុង និង ក្រាលកៅស៊ូ (DBST) ដែលស្ថាបនាដោយកងវិស្វកម្ម មន្ទីរសាធារណការខេត្ត ត្រូវបានបើកការដ្ឋានស្ថាបនា នៅព្រឹកថ្ងៃទី ២៣ ខែ មីនា ឆ្នាំ ២០១៦ ។

ផ្លូវមួយខែ្សប្រវៃង ១ពាន់៦២០ម៉ែត្រនេះ ក្នុងការចុះសិក្សាពីផលប៉ះពាល់ ដើមី្បបើកផ្លូវមួយខ្សែនេះ ធ្វើ ទៅតាមស្ថានភាពផ្លូវដែលអាចបើកបាន មាន៣ទំហំ ក្នុងនោះផ្លូវប្រវែង ១៨០ម៉ែត្រ ដែលមានទទឹង៨ម៉ែត្រ ត្រូវធ្វើការចាក់ផ្លូវប្រភេទបេតុង មានទទឹង០៧ម៉ែត្រ និង ផ្លូវប្រវែង ១ពាន់២៣០ម៉ែត្រ មានទទឹង ១៥ម៉ែត្រ ធ្វើការចាក់ផ្លូវកៅស៊ូ ប្រភេទ DBST មានទទឹង ១១ម៉ែត្រ និង ផ្លូវប្រវែង ២១០ម៉ែត្រ មានទទឹង ១០ម៉ែត្រ ធ្វើការចាក់ផ្លូវ ប្រភេទបេតុង មានទទឹង ៨ម៉ែត្រ ហើយកំណាត់ផ្លូវបឹងដូនប៉ានេះ ចេញពីផ្លូវក្រោយវត្តព្រះឥន្ធកោសីយ៍ មកភ្ជាប់ នឹងផ្លូវ៦០ម៉ែត្រ ។

ឯ.ឧបណ្ឌិត ឃឹម ប៊ុនសុង អភិបាលខេត្តសៀមរាប បានសុំក្តីអនុគ្រោះ ចំពោះរាល់ការប៉ះពាល់ដីភូមិដ្ឋាន និង ដំណាំដើមឈើ និងត្រេកអផងដែរ អំពីស្មារតីចូលរួមរបស់បងប្អូនប្រជាពលរដ្ឋ ដែលបានបរិចាកដីភូមិ និង រុះរើរបងលំនៅដ្ឋាន ក្នុងការបង្កនូវលក្ខណៈងាយស្រួលដល់ក្រុមការងារ ធ្វើ ការស្ថាបនាទៅបានដោយរលូន ដោយមិនបានទារនូវសំណងអ្វីពីអាជ្ញាធរឡើយ ។

ឯ.ឧបណ្ឌិតឃឹម ប៊ុន សុង បានជម្រាបដល់បងប្អូនប្រជាពលរដ្ឋថា ផ្លូវមួយខ្សែនេះ គឺជាការយកចិត្តទុកដាក់ ដ៏ខ្ពង់ខ្ពស់របស់សម្តេច តេជោ ហ៊ុន សែន នាយករដ្ឋមន្ត្រី ក្នុងការគិតគួអំពីជីវភាពរស់នៅរបស់ប្រជាពលរដ្ឋ និង ភាពទុក្ខលំបាករបស់ បងប្អូនដែលខ្វះខាតផ្លូវធ្វើដំណើរទៅមកនៅក្នុងភូមិ សំខាន់ក្មួយៗកុមារាកុមារី ធ្វើដំណើរទៅសិក្សារៀនសូត្រ ។

ក្នុងនោះដែរបងប្អូនប្រជាពលរដ្ឋ ក៏បានធ្វើការស្វាគមន៍ និង ថ្លែងអំណរគុណចំពោះសម្តេចតេជោ ហ៊ុន សែន និង សម្តេចគត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក៏ដូចអាជ្ញាធរខេត្ត ដែលបានខិតខំពុះពារ ក្នុងការកាត់ ឆ្វៀលដីក្នុងតំបន់បុរីវប្បធម៌ទេសចរណ៍ ជូនប្រជាពលរដ្ឋក្នុងភូមិបឹងដូនប៉ា នឹងបានផ្តល់នូវផ្លូវមួយខ្សែ ដែលជា ចំណងដៃឆ្នាំថ្មី ឆ្នាំវក អដ្ឋស័ក ព.ស២៥៦០ ព្រមទាំងបានគាំទ្រនូវបេក្ខភាពសម្តេចតេជោ ហ៊ុន សែន ជានាយករដ្ឋមន្ត្រី នៃប្រមុខដឹកនាំប្រទេសនៅគ្រប់អាណ្តត្តិក្រោយៗទៀតផងដែរ ៕ ប៊ុនធឿន (សៀមរាប)