សៀមរាប ៖ លោកវរសេនីយ៍ទោ ភឹង ចិន្តារ៉េត នាយការិយាល័យព្រហ្មទ័ណ្ឌកំរិតស្រាលនៃស្នងការដ្ឋាននគរបាលខេត្តសៀមរាបបានសហការណ៍ជាមួយកម្លាំងអធិការដ្ឋាននគរបាលក្រុងសៀមរាប ក្រោមការបញ្ជាដឹកនាំកម្លាំងពីសំណាក់លោកព្រះរាជអាជ្ញារងសាលាដំបូងខេត្តសៀមរាបចំនួនពីររូបបានចុះប្រតិបត្តិការណ៍ធ្វើការបង្ក្រាបកន្លែងបើកបំរើសេវាអ៊ិន ធើ ណេត ដែលមានយីហោ ឈ្មោះ ផ្សារញ៉ែ ណេត កាហ្វេស្ថិតនៅក្នុងភូមិតាភុល សង្កាត់ស្វាយដង្គំ និងមួយទីតាំងទៀតស្ថិតនៅក្នុងភូមិបន្ទាយចាស់ សង្កាត់ស្លក្រាម ក្រុងសៀមរាប ក្នុងពេលតែមួយ ផងដែរ ដោយទីតាំងអ៊ិន ធើ ណេត ខាងលើទាំងពីរបានលួចប្រព្រឹត្តបទល្មើសបើកឱ្យមានការភ្នាល់បាល់ទាត់តាមប្រព័ន្ធអ៊ិន ធើ ណេត ដោយខុសច្បាប់ នៅវេលាម៉ោង៤ទៀបភ្លឺថ្ងៃទី០៩ខែកក្តដាឆ្នាំ២០១៤ ។
ជាក់ស្តែងទីតាំងអ៊ិន ធើ ណេត ខាងលើទាំងពីរបានលួចប្រព្រឹត្តបទ ល្មើសបើកឱ្យមានការភ្នាល់បាល់ ទាត់ តាមប្រព័ន្ធអ៊ិន ធើ ណេត ដោយខុសច្បាប់នេះសមត្ថកិច្ចនគរបាលជំនាញបានធ្វើការឃាត់ខ្លួនទាំងពីរទីតាំង បានមនុស្សប្រុសស្រីចំនួន១៧នាក់ដែលកំពុងតែនាំគ្នាលេងភ្នាល់បាល់ទាត់ និង ខ្លះទៀតលេងបៀរតាមប្រព័ន្ធអ៊ិនធើ ណេតរួចនាំខ្លួននិងវត្ថុតាងព្រមទាំងម្ចាស់ទីតាំងយកមកកាន់ការិយាល័យជំនាញដើម្បីចំណាត់ការទៅតាមនិតិវិធីជាបន្ត។វត្ថុតាងដែលសមត្ថកិច្ចនគរបាលចាប់បានរួមមានៈកុំព្យួរទ័រចំនួន៣៧គ្រឿង,ម៉ូតូ១២គ្រឿងក្នុងនោះមានព្រមទាំងម៉ូតូកង់បីមួយគ្រឿងផងដែរ,និងកង់បីគ្រឿង,តុមួយ,កៅអី២០ព្រមទាំងលុយមួយចំនួនទៀត ។
លោកវរសេនីយ៍ទោ ភឹង ចិន្តារ៉េត បានបន្តឱ្យដឹងទៀតថាបន្ទាប់ពីសមត្ថកិច្ចនគរបាលជំនាញបានធ្វើការសួរនាំ អ្នកភ្នាល់បាល់ទាត់ទាំងពីរទីតាំងរួចមកសមត្ថកិច្ចក៏បានកសាងសំណុំរឿងបញ្ជូនជនសង្ស័យទាំង១៧នាក់និងវត្ថុតាងទាំងអស់ទៅកាន់តុលាការនៅរសៀលថ្ងៃទី០៩ខែកក្កដាឆ្នាំ២០១៤នេះដើម្បីនាំខ្លួននិងវត្ថុតាងព្រមទាំងម្ចាស់ទីតាំងយកមកកាន់ការិយាល័យជំនាញដើម្បីចំណាត់ការទៅតាមនិតិវិធីជាបន្ត ៕
