ខេត្តសៀមរាប៖ នៅចុងសប្តាហ៍ថ្ងៃទី១៩ ខែ មីនា ឆ្នាំ២០១៦ ឯកឧត្តមបណ្ឌិត ឃឹម ប៊ុនសុង អភិបាលខេត្តសៀមរាប បានចុះជួបសំណេះ សំណាល និងនាំយកនូវអំណោយ ជាគ្រៀងឧបភោគបរិភោគ ចែកជូនដល់បងប្អូនប្រជាពលរដ្ឋ ទីទ័លក្រចំនួន ៣០០គ្រួសារ មកពី០៩ភូមិ ក្នុងឃុំខ្វាវ ស្រុកជីក្រែង ខេត្តសៀមរាប ដែលជួបការខ្វះខាតស្បៀង អាហារសម្រាប់ផ្គត់ផ្គង់ គ្រួសារពួកគាត់ប្រចាំថ្ងៃ ។
តាមរបាយការណ៍ ស្រុកជីក្រែងក្នុងរដូវវស្សាកន្លងមកនេះថា៖ បងប្អូនប្រជាពលរដ្ឋមួយចំនួន ក្នុងឃុំខ្វាវ បានទទួលរងនូវគ្រោះរាំងស្ងួត ហើយការងារបង្កបង្កើនផល ក៏ទទួលបានផលតិចជាងបណ្តាឆ្នាំមុនៗ ដែលជាហេតុធ្វើ ឲ្យបងប្អូនមានបញ្ហាប្រឈម នឹងការខ្វះខាតនូវស្បៀងអាហារ ដែលជាឧបសគ្គធ្វើឲ្យប្រជាពលរដ្ឋយើង ធ្វើចំណាកស្រុក ទៅរកការងារធ្វើ នៅតាមទីប្រជុំជន និង ចេញទៅក្រៅប្រទេសទៀតផង ។
មានប្រសាសន៍ សំណេះសំណាលនាឱកាសនោះ ឯ.ឧបណ្ឌិត ឃឹម ប៊ុនសុង ក៏សម្តែងនូវការអាណិតអាសូរដល់បង ប្អូន ប្រជាពលរដ្ឋ ដែលទទួលរងគ្រោះដោយធម្មជាតិ ដែលជាបញ្ហាប្រឈមមួយ ! អាជ្ញាធរយើង ត្រូវធ្វើការដោះស្រាយជាបន្ទាន់ ចំពោះបងប្អូន ។
ឯកឧត្តមបណ្ឌិតបានបន្តទៀតថា៖ ប្រមុខរាជរដ្ឋាភិបាល ក្រោមកិច្ចដឹកនាំ របស់ សម្តេចតេជោ ហ៊ុន សែន នាយករដ្ឋមន្ត្រី បានជម្រុញ និងពង្រីកនូវប្រព័ន្ធធារាសាស្ត្រ នៅតាមបណ្តាខេត្ត ស្រុក ឃុំ ក្នុងការធានានូវការផ្គត់ផ្គងទឹក ជូនដល់ប្រជាកសិករ ក្នុងការងារបង្កបង្កើនផល ទាំងរដូវប្រាំង និង រដូវវស្សា ។ ជាក់ ស្តែងនៅក្នុងភូមិសាស្ត្រស្រុកជីក្រែង ដែលមានទំនប់អាងទឹក ដ៏ធំ មួយ ដែលប្រជាពលរដ្ឋហៅថា (ទំនប់ម្កាក់) ដែលកំពុងសាងសង់ដោយក្រុមហ៊ុនចិន ។
ឯកឧត្តមបណ្ឌិត ឃឹម ប៊ុនសុង បានរំលឹកដល់ បងប្អូនប្រជាពលរដ្ឋ ទាំងអស់ ត្រូវនាំគ្នាគោរពនូវច្បាប់ចរាចរណ៍ផ្លូវគោក ពេលបើកបរត្រូវពាក់មួកសុវត្ថិភាព និង ដាក់ខ្សែក្រវ៉ាត់សុវត្ថិភាព និង បើកបរគ្មានជាតិស្រវឹង ។
ក្នុងនោះដែរ បងប្អូនប្រជាពលរដ្ឋទីទ័លក្រទាំង ៣០០គ្រួសារ ក្នុងមួយគ្រួសារទទួលបាន មី០១កេស ទឹកត្រី ១យូរ . ទឹកស៊ីអ៊ីវ ០១យូរ ប៊ីចេង ១ថង អង្ករ ២៥គក្រ ផងដែរ ៕ប៊ុនធឿន(សៀមរាប)
