ខេត្តព្រះវិហារ៖ជនសង្ស័យម្នាក់និងថ្នាំញៀន១កញ្ចប់ ត្រូវបានកម្លាំងកងរាជអាវុធហត្ថប្រចាំទិសស្រុកជាំក្សាន្តចំនួន៦នាក់ រថយន្ត៣គ្រឿង ដឹកនាំបញ្ជាផ្ទាល់ដោយលោក វរៈសេនីយ៍ត្រី គង់ ផល្លី នាយរងសេនាធិការប្រចាំស្នាក់ការសន្តិសុខ ធម្មជាតិសម្តេចតេជោ បានធ្វើការឃាត់ខ្លួនកាលពីវេលាម៉ោង១០:៣០នាទីព្រឹកថ្ងៃ ទី១៤ខែមិនាឆ្នាំ២០១៦ ត្រង់ចំណុចអង្ការអេដស៏ ស្ថិតក្នុងភូមិស្រឯមត្បូង ឃុំកន្ទួត ស្រុកជាំក្សាន្ត ខេត្តព្រះវិហារ។
លោកវរៈសេនីយ៍ត្រី គង់ ផល្លី បានឲ្យដឹងថា ក្រោយពីទទួលបានព័តមានពីម្ចាស់រថយន្តតាក់ស៊ី ថាមានថ្នាំញៀនបង្កប់នៅក្នុងឡាំងផ្លែឈើមួយ ដែលបានផ្ញើមកពីក្រុងភ្នំពេញ ទៅស្រុកត្រពាំងប្រាសាទ ខេត្តឧត្តមានជ័យ លោកបានដឹកនាំកម្លាំង ដោយមានការសហការណ៍ពីម្ចាស់រថយន្តផងនោះ ទើបកម្លាំងបានធ្វើការឃាត់ខ្លួនជនសង្ស័យម្នាក់ រួមទាំងថ្នាំញៀន១កញ្ចប់តូច(ម៉ាទឹកកក) ត្រង់ចំណុចភូមិសាស្រ្តខាងលើ រួចក៍នាំមកធ្វើការសួរនាំបន្ត នៅស្នាក់ការសន្តិសុខ ធម្មជាតិសម្តេចតេជោ។
ជនសង្ស័យដែលកម្លាំងឃាត់នេះ មានឈ្មោះ សរ សំណាង ភេទប្រុស អាយុ ២៤ឆ្នាំ រស់នៅភូមិ ពពេល ឃុំផ្អាវ ស្រុកត្រពាំងប្រាសាទ ខេត្តឧត្តមានជ័យ បានឆ្លើយសារភាពថា ក្រោយពីបានទទួល ទូរសព្វពីឈ្មោះឡូយនៅភ្នំពេញ ថានិងផ្ញើឡាំងផ្លែឈើដោយបង្កប់ថ្នាំញៀន ដើម្បីឲ្យខ្លួននៅខេត្តឧត្តមានជ័យ ប៉ុន្តែរថយន្តមិនបានទៅដល់ខេត្តឧត្តមានជ័យនោះទេ ទើបខ្លួនជួលម៉ូតូមកយកនៅភូមិស្រឯម តែមកដល់ចំណុចកើតហេតុ ក៍ត្រូវកម្លាំងកងរាជអាវុធហត្ថឃាត់ខ្លួនតែម្តង។
លោកអនុសេនីយ៍ឯក ជុន បូរ៉ា មេបញ្ជាការរងទទួលបន្ទុកស្រាវជ្រាវនិងយុត្តិធម៏ បានបញ្ជាក់ថា បច្ចប្បន្នជនសង្ស័យត្រូវបានកម្លាំងធ្វើការឃុំខ្លួនបណ្ដោះអាសន្ន នៅស្នាក់ការសន្តិសុខធម្មជាតិសម្តេចតេជោ រង់ចាំកសាងសុំណុំរឿងបញ្ជូនខ្លួនជនសង្ស័យរួមទាំងវត្ថុតាង ទៅកងរាជអាវុធហត្ថខេត្តព្រះវិហារចាត់ការតាមនិតិវិធីច្បាប់៕
