បន្ទាយមានជ័យ៖មហាជនរិះគន់លើចំណាត់ការសមត្ថកិច្ចដែលហាក់ដូចជាទើបភ្ញាក់ពីដេកទាំងមមីមមើបង្ក្រាបរថយន្តចង្កូចស្តាំលួចចូលពីថៃគ្រាដែលឈ្មួញខិលខូចមួយចំនួនរកស៊ីយ៉ាងសុខសាន្តជាយូរឆ្នាំមកហើយ ទើបតែពេលនេះឃើញ កម្លាំងអធិការដ្ឋាននគរបាលស្រុកថ្មពួក បានធ្វើការ បង្ក្រាប រថយន្តចង្កូតស្តាំ ១គ្រឿងដែល ឈ្មួញបានលោតឆ័ត្រ តាមច្រក របៀង ចេញពីប្រទេសថៃចូល មកកាន់ទឹកដី កម្ពុជាទាំងយប់បាន១គ្រឿង…។
ហេតុការណ៍នេះបាន កើតឡើងកាលពី វេលា ម៉ោង ២០និង៣០នាទីយប់ថ្ងៃទី ១៥ខែមិនា ឆ្នាំ ២០១៦ នៅលើកំណាត់ ផ្លូវជាតិលេខ ៥៦B ស្ថិតក្នុងភូមិ ស្វាយជ្រុំ ឃុំគំរូ ស្រុកថ្មពួក ខេត្តបន្ទាយមានជ័យ។
លោកវរសេនីយ៍ឯក ចាបសុផាឬទ្ធិ ស្នងការរង ខេត្បន្ទាយមានជ័យបានដឹងថា ក្រោយពីមានសេចក្តីរាយការណ៍ មកថាមានឈ្មួញខិលខូចបានលួចលោតឆ័ត្រនាំយករថយន្ត ចង្កូតស្តាំចូលពីប្រទេសថៃមកកម្ពុជា តាមច្រក របៀងបឹងត្រកួន លោកក៏បានបញ្ជាឲ្យកម្លាំង នគរបាលស្រុកថ្មពួក ចាប់បាននៅចំណុចខាងលើ។
លោកវរសេនិយ៍ឯកចាបសុផាឬទ្ធិបានបន្តឲ្យដឹងទៀតថា គួរឲ្យសោកស្តាយដែលឈ្មួញដែលបាននាំ រថយន្តចូលនោះរួចគេចខ្លួនបាត់ទើបកម្លាំងយើងចាប់បានតែរថយន្តប៉ុណ្ណោះ។លោកបញ្ជាក់ថារថយន្តដែលសមត្ថកិច្ចឃាត់បាននោះ សមត្ថកិច្ចបានយកមករក្សាទុកនៅក្នុងស្នងការខេត្តបន្ទាយមានជ័យមានម៉ាក នីស្សាន់ណាវ៉ារ៉ា ពណ៌ស លេខ ម៉ាស៊ីន Y .D25549714 និងលេខតួ.4020029291 លោកចាបសុផាឫទ្ធិបានបញ្ជាក់ថានៅក្នុងរថយន្តយើងឃើញមានផ្លាកលេខថៃចំនួន២សន្លឹកទោះជាយ៉ាងណា លោកកំពង់តែស្រាវជ្រាវរកឈ្មួញដែលបានយករថយន្តចង្កូតស្តាំអត់ពន្ធនោះចូលផងដែរ។
ទាក់ទិនទៅនឹងរឿងរ៉ាវសមត្ថកិច្ចដែលហាក់ដូចជាភ្ញាក់ពីដំណេក ទៅចាប់បានរថយន្តអត់ពន្ធចូលពីប្រទេសថៃបាន១គ្រឿងនេះត្រូវបានមជ្ឈដ្ឋានក្នុងខេត្តបន្ទាយមានជ័យរិះគន់យ៉ាងចាស់ដៃថា ហាក់ដូចជាយឺតពេលបន្តិចហើយគ្រាដែលឈ្មួញខិលខូចមួយចំនួន ដែលមានខ្សែមានខ្នងគ្រាក់ៗនៅពីក្រោយសម្រុកកើបលុយដែលចំណេញបានមកពីការនាំរថយន្តចង្កូតស្តាំអត់ពន្ធពីថៃចូលមកប្រទេសកម្ពុជាយ៉ាងភ្លូកទឹកភ្លូកដីក៏មិនដែលឃើញសមត្ថកិច្ចណាហ៊ានក្អកជាមួយឡើយ។
គួររំលឹកផងថាក្នុងរយះពេលនេះរថយន្តចង្កូតស្តាំសេរី២០១៣..២០១៤និង២០១៥មានបន្តលួចនាំចូលជាបន្តដោយក្រុមឈ្មួញហើយរថយន្តមួយចំនួនត្រូវបានគេយកស្លាកលេខទៅបំពាក់ក្នុងទឹកដីថៃរួចហើយបើកចូលមកតាមច្រករបៀងខុសច្បាប់មួយចំនួនក្នុងខេត្តបន្ទាយមានជ័យជារឿយៗផងដែរ។
