ខេត្តសៀមរាប៖នៅព្រឹកថ្ងៃទី០៧ ខែ មីនា ឆ្នាំ២០១៦នេះ ព្រះសង្ឃ និង ពុទ្ធបរិស័ទ ចំណុះជើងវត្តព្រះឥន្ធកោសីយ៍ ក្រុង ខេត្តសៀមរាប ប្រមាណជាង១០០នាក់ បាននិមន្តមកធ្វើការតវ៉ាដើម្បីឲ្យអាជ្ញាធរខេត្ត ជួយរកនូវយុត្តិធម៌ ចំពោះការតែង តាំងលោកចៅអធិការវត្តថ្មី និង សុំឲ្យធ្វើកិច្ចដំណើរការកសាងព្រះរូបបដិមាករដ៏ធំ ឲ្យបានរួចរាល់ ដើមី្បទុកតំកល់ ជាទី សក្ការៈនៅក្នុងវិមានសង្ឃ នៃទីវត្តព្រះឥន្ធកោសីយ៍ ។
ការតវ៉ានេះក្រោមការនិមន្តដឹកនាំរបស់ ព្រះភិក្ខុសង្ឃ ព្រះនាម អ៊ុន សម្ផស្ស បានចូលជួបឯកឧត្តម ប៊ុន ថាប្ញទ្ធិ អភិបាលរងខេត្ត ក្នុងនោះក៍មាន ព្រះវត្តមាន របស់ព្រះគ្រូប្រាសាទរង្សី ឡាច លាង ព្រះអនុគណក្រុងសៀមរាប និង មន្ទីរពាក់ព័ន្ធមួយចំនួនផងដែរ ។
តាមសង្ឃដិការបស់ ភិក្ខុ អ៊ុន សម្ផស្ស បានរៀបរាប់ថា ៖ ចាប់តាំងពីព្រះសុមង្គលសិលាចារ្យឥន្ទកេសរោ ពេជ្រ សន ព្រះមេគណខេត្ត ទទួលអនិច្ចធម៌ ទៅ ក្នុងទីវត្តព្រះឥន្ធកោសីយ៍ តែងមានភាពមិនចុះសម្រុងគ្នា ទាំងព្រះសង្ឃ និង ពុទ្ធបរិស័ទ ។ ក្នុងនោះដែរ ភិក្ខុ អ៊ុន សម្ផស្ស និង ប្រជាពុទ្ធបរិស័ទ ក៏បានធ្វើការចោទប្រកាន់ទៅលើ ភិក្ខុ ចាន់ សុវណ្ណ និង ភិក្ខុ ក្រួច សុមាន ជាលេខា ព្រះមេគណ ខេត្តដែលបានទទួលអនិច្ចធម៌ទៅ ព្រមទាំងបក្ខពួក បានធ្វើឲ្យមានរឿងមិនប្រក្រតី ក្នុងទីវត្តអារាមមួយនេះ ! នៅពេលដែលវត្តគ្មាន ចៅអធិការគ្រប់គ្រងវត្ត ភិក្ខុសាមណេ ចំនួន៤អង្គ ត្រូវបានដេញចេញពី វត្តដោយមិនដឹងពីមូលហេតុ ។ ចំពោះ ការតែងតាំងភិក្ខុ ចាន់ សុវណ្ណ ឬ ភិក្ខុ ក្រួច សុមាន នោះ ភិក្ខុ អ៊ុន សម្ផស្ស និង ព្រះសង្ឃ ពុទ្ធបរិសទ័ ចំណុះជើងវត្ត មិនគាំទ្រ បេក្ខភាពទាំងពីរអង្គនេះឡើយ ។ ដោយមូលហេតុ ព្រះភិក្ខុ ចាន់ សុវណ្ណ បានចាកចេញចោលវត្តអស់រយៈ ពេល ១១ឆ្នាំ ទៅរស់នៅសហរដ្ឋអាមេរិក គឺពុំអាចមកគ្រប់គ្រងកន្លែងសុំសីល និង គរុភ័ណ បានឡើយ ហើយចំពោះ ភិក្ខុ ក្រួច សុមាន បានធ្វើឲ្យបាត់បង់បច្ច័យរបស់បុណ្យព្រះសពព្រះមេគណខេត្ត ចំនួន(៥៥លាន៦សែន២ពាន់រៀល )និង ប្រាក់ដុល្លា ចំនួន (១ពាន់៦៦១ដុល្លា) ដោយមិនដឹងមូលហេតុ ។
ភិក្ខុ អ៊ុន សម្ផស្ស មានសង្ឃដិកាយ៉ាង ទទូច ចំពោះបញ្ហាការកសាងព្រះរូបដិមាករ ធ្វើអំពីស្ពាន់ដ៏ធំ ទុកតំកល់សម្រាប់ ទីសក្ការៈនៅក្នុងទីវត្តព្រះឥន្ធកោសីយ៍ ដែលបានកសាងបានប្រមាណ៨០% ត្រូវសម្តេចសង្ឃរាជ ទេព វង្ស ធ្វើការ ហាម ឃាត់ មិនឲ្យយក រូបដិមាករធ្វើពីស្ពាន់អង្គនេះ ដាក់តាំងគោរពបូជានៅក្នុងទីវត្តព្រះឥន្ធកោសីយ៍ ក្នុងឱកាសបុណ្យចម្រើន ព្រះជនព្រះមេគណខេត្ត ដោយទីវត្តនេះជាវត្តបុរាណ មានប្រាសាទទៀតផង ។
មានថេរដិកានាឱកាសនោះដែរព្រះគ្រូប្រាសាទរង្សី ឡាច លាង ព្រះអនុគណក្រុងសៀមរាប បញ្ជាក់ថា៖ ចំពោះ បញ្ហាអធិករដែលកើតឡើងនៅក្នុងទីវត្តនោះ ភិក្ខុសង្ឃ និង ពុទ្ធបរិស័ទ ត្រូវតែរៀបចំនូវឯកសារឲ្យបានត្រឹម ត្រូវ ទាំងបញ្ហា បុគ្គល ដើមី្បដាក់ជូនមកគណៈសង្ឃវិន័យ ឬ អនុគណក្រុង ដើមី្បធ្វើការដោះស្រាយ ទៅតាមក្រឹត្យ ក្រមធម៌ វិន័យរបស់ ព្រះសង្ឃ ។
ឯ.ឧ ប៊ុន ថាប្ញទ្ធិ លើកឡើងថា៖ គោលជំហររបស់ខេត្ត សូមគាំទ្រនូវរាល់ ការកសាងរបស់ព្រះសង្ឃ និង ពុទ្ធបរិស័ទ ទៅលើសមទ្ធិផលក្នុងវត្ត និង ទីសាធារណៈ ពីព្រោះថា វិស័យព្រះពុទ្ធ សាសនា នៅពេលបច្ចុប្បន្ននេះ គឺជាយន្តការមួយ ក្នុងការទាក់ទាញដល់ភ្ញៀវទេសចរណ៍ ចូលមកទស្សនា កម្សាន្ត នៅតាមទីវត្តអារាម ដែលមានអាយុកាលចំណាស់ៗ នៅលើទឹកដីប្រវត្តិសាស្ត្រខេត្តសៀមរាប និង បណ្តាខេត្ត ផ្សេងៗទៀតផងដែរ ។
ឯកឧត្តមបានបន្តថា៖ ដោយមើល ឃើញនូវកង្វះនៃការគ្រប់គ្រងព្រះសង្ឃក្នុងទីវត្តព្រះឥន្ធកោសីយ៍ មន្ទីរបានតែង តាំងចៅ អធិការស្តីទី ដែលមានព្រះនាម ភិក្ខុ ចាន់ សុវណ្ណ ជាបណ្តោះអាសន្ន ដើមី្បរងចាំក្រសួងធម្មការសាសនា ចេញ សេចក្តីប្រកាស តើតែងតាំងភិក្ខុអង្គណា ក្រោយពេលគណៈកម្មការធ្វើការជ្រើសរើសនិងវាយតម្លៃ ឬ ក៏យកព្រះសង្ឃ ពីវត្តផ្សេងមកធ្វើចៅអធិការវត្ត ក្នុងការបញ្ចប់អធិករក្នុងទីវត្តនេះ ។
ក្នុងនោះដែរឯកឧត្តមក៏បាន ធ្វើការពាំនាំនូវសំណើ និង សំណូមពររបស់ព្រះ សង្ឃ និង ពុទ្ធបរិស័ទ ជូនដល់ អភិបាលខេត្ត ក្នុងការជម្រុញឲ្យសមទ្ធិផលដែលយើងបានកសាងនេះ សម្រេចបានដោយជោគជ័យ និង ទទួលបានផលអនុសង្ឃស្មើៗគ្នាផងដែរ ៕ ប៊ុនធឿន(សៀមរាប)
