ព្រះវិហារ៖ នៅក្នុងឆ្នាំ២០១៦នេះ ការតវារឿងជម្លោះដីធ្លីរបស់ប្រជាពលរដ្ឋនៅក្នុងខេត្តព្រះវិហារ ជាមួយក្រុមហ៊ុន នឹងជាមួយអ្នកមានអំណាចដែលពួកគាត់ចោទប្រកាន់ថាបានរំលោភបំពានមកលើសិទ្ធរបស់ពួកគាត់ ខណៈអាជ្ញាធរដែនដី ហាក់បីដូចអសមត្ថភាពក្នុងការដោះស្រាយឬអាចនិយាយបានថា គ្មានចេតនារកដំណោះស្រាយអោយពួកគាត់។
រឿងរាវទាំងនោះមានចំនួន៥ករណីធំៗ ទី១ ប្រជាពលរដ្ឋរស់នៅឃុំពោធិប្រមេរ ស្រុកត្បែងមានជ័យ មានវិវាទជាមួយក្រុមហ៊ុន រ៉ូយ ហ្វេងរបស់ចិនជាច្រើនឆ្នាំ មិនទាន់រកដំណោះស្រាយចេញនៅឡើយ ។ទី២ប្រជាសហគមន៍ឃុំព្រះឃ្លាំង ស្រុកត្បែងមានជ័យ តវ៉ារឿងអ្នកមានអំណាច កាប់ដើមច្បោះ នឹងឈួសឆាយរំលោភយកដីសហគមន៍របស់ពួកគាត់ គ្មានដោះស្រាយអោយពួកគាត់រហូតមកដល់ថ្ងៃនេះ។ទី៣ រឿងប្រជាពរដ្ឋនៅឃុំត្បែងពីរ ស្រុកគូលែន ជាមួយក្រុមហ៊ុន ក៍នៅគ្មានដំណោះស្រាយ ។ ទី៤ ប្រជាពលរដ្ឋមកពីស្រុកសង្គមថ្មី មានជម្លោះរឿងដីកប់សព ជាមួយអ្នកមានអំណាច ដែលបានឈួសឆាយរំលោភយកដី ទីសក្ការៈរបស់ពួកគាត់ រហូតដល់ទៅប្តឹងពួកគាត់ទៅតុលាការថែមទៀតផង ។ ទី៥ ប្រជាពលរដ្ឋសហគមន៍រំចេក ឃុំរមណីស្រុករវៀង ជាង១០០នាក់បានលើកគ្នាមកសុំអោយអាជ្ញាធរខេត្តព្រះវិហារជួយអន្តរាគមន៏រឿងសមត្ថកិច្ចបរិស្ថានចាប់ក្មេងប្រុសម្នាក់ឈ្មោះប៊ុន បូត ភេទប្រុស អាយុ១៨ឆ្នាំ ទៅតុលាការពីបទចោទថា បានកាប់រានដីព្រៃរបស់រដ្ឋយកធ្វើជាកម្មសិទ្ឋ តែពួកគាត់បានចោទសមត្ថកិច្ចបរិស្ថានថា ចាប់បានតែប្រជាពលរដ្ឋស្លូតត្រង់ ចំនែកមេឈ្មួញធំៗវាតទីកាប់រានយកដីព្រៃរបស់រដ្ឋរាប់រយហិចតា មិនដែលឃើញ អស់លោកបរិស្ថានចាប់បានមេឈ្មួញណាម្នាក់ឡើយ ។
រឿងរ៉ាវទាំង៥ករណីខាងលើកើតមានជាយូឆ្នាំមកហើយ នៅមានរឿងស្រដៀងគ្នានេះជាច្រើនករណីទៀត ដែលអាជ្ញាធរខេត្តគ្មានសមត្ថភាពក្នុងការរកដំណោះស្រាយជូនពួកគាត់ ពេលប្រជាពលរដ្ឋលើកគ្នាមកតវ៉ា ត្រូវបានសមត្ថកិច្ចរារាំង មិនអោយចូលទីរួមខេត្តហើយថែមទាំងប្រងើយកន្តើយជាមួយពួកគាត់ទៀតផង ។
រាល់ទង្វើរបស់អាជ្ញាធរខេត្ត បានធ្វើអោយពួកគាត់អស់ជំនឿទៅលើការដឹកនាំ នឹងអាចបាត់បង់ការគាំទ្រថែមទៀតផង។លោកយាយ ប្រាក់ គីម ត្រូវជាជីដូន ក្មេងប្រុស ប៊ុន បូត បានអង្វរករថ្នាក់ដឹកនាំខេត្តអោយជួយចៅគាត់ផង ។
ឯកឧត្តម ស៊ូ សិរី អភិបាលរងខេត្តទទួលបន្ទុក មិនអាចទាក់ទងសុំការបកស្រាយបំភ្លឺបានទេ ពាក់ពន្ឋ័នឹងរឿងដីធ្លីខាងលើនេះ ៕
