អនុវត្តន៍តាមអនុសាសន៍ដ៏ខ្ពង់ខ្ពស់ របស់ប្រមុខនៃរាជរដ្ឋាភិបាលប្រទេសទាំងពីរ ស្ដីអំពីការពង្រឹងកិច្ចសហប្រតិ បត្តិការល្អ ដើម្បីរក្សាបានសន្តិសុខ សុវត្ថិភាព ជូនប្រជាពលរដ្ឋនៃប្រទេសទាំងពីរ (កម្ពុជា-ថៃ) ពិសេសនៅតំបន់ព្រំដែន នោះជាក់ស្តែងនៅព្រឹកថ្ងៃទី០១ ខែមិនា ឆ្នាំ២០១៦ ច្រកទ្វារព្រំដែនអន្តរជាតិជាំសាង៉ាំ ក្នុងភូមិសាស្ត្រស្រុកអន្លង់វែង ខេត្តឧត្តរមានជ័យ នៃប្រទេសកម្ពុជា បានបើកកិច្ចប្រជុំ និងពិភាក្សាដើម្បីរួមគ្នាអភិវឌ្ឍន៍ច្រក តំបន់ព្រំដែន ក្រោមការ អញ្ជើញចូលរួមពីសំណាក់ឧត្តម សេនីយ៍ឯក ង៉ែត ចាន់ថុន អគ្គមេបញ្ជាការរង ជានាយរងសេនាធិការចម្រុះ កងយោធ ពលខេរៈភូមិន្ទ ! ឧត្តម សេនីយ៍ទោ យឹម ផាន់ណា មេបញ្ជាការរងយោធភូមិភាគទី៤ ជាប្រធានគណៈបញ្ជាការឯកភាព សមរភូមិមុខទិសទី២ និងឧត្តមសេនីយ៍ទោ នាង ឃីម មេបញ្ជាការកងពលតូចថ្មើរជើងលេខ៤១ រីឯភាគីថៃ ! ដឹកនាំ ដោយឧត្តមសេនីយ៍ត្រី សុរិទ្ធយ៉ាស៊ិចពីន មេបញ្ជាការកងកំលាំងសារៈនារី ភូមិន្ទថៃ និង រួមដំណើរដោយមន្រី្តសំខាន់ៗ នៃប្រទេសទាំងពីរ ជាច្រើន រូបផងដែរ ។
កិច្ចប្រជុំនេះបានលើកយកនូវខ្លឹមសារសំខាន់ៗមួយចំនួនមកពិភាគ្សាគ្នា ក្នុងនោះភាគីទាំងពីរ បានពិភាក្សា ដោះស្រាយនូវរាល់បាតុភាពផ្សេងៗ ដែលកើតមានឡើងនៅតាមបណ្ដោយព្រំដែន ! បន្តសហការ ទំនាក់ទំនងល្អជាមួយគ្នា ដើម្បីរក្សាសន្តិសុខសណ្ដាប់ធ្នាប់ជូនប្រជាពលរដ្ឋ នៃប្រទេសទាំងពីរដែលរស់នៅតាមបណ្ដោយព្រំដែន បានប្រកបមុខរបរ រកស៊ីទទួលទាន និងផ្លាស់ប្តូរទំនិញជាមួយគ្នាទៅវិញទៅមកបានប្រសើរឡើង ។
ជាពិសេសភាគីនៃប្រទេសទាំងពីរ បន្តកិច្ចសហការល្អ បង្រ្កាប ទប់ស្កាត់ បទល្មើសឆ្លងដែនខុសច្បាប់ និងធ្វើការសម្របសំរួល ឲ្យអ្នកជំងឺដែលចេញពីប្រទេសកម្ពុជា បានចូលទៅទទួលការព្យាបាលនៅក្នុងប្រទេសថៃ ដោយមានការអនុគ្រោះ ចំពោះជម្ងឺធ្ងន់ធ្ងរ ដែលពុំមានឯកសារ ឬ លិខិតឆ្លងដែនគ្រប់គ្រាន់ ។
ជូបពិភាក្សានេះក្នុងគោលដៅពង្រឹង នូវចំណងមិត្តភាពសាមគ្គីភាព និង កិច្ចសហប្រតិបត្តិការ ក្នុងការជម្រុញ នូវកិច្ច ទំនាក់ទំនងគ្នារវាងភាគី នៃប្រទេសទាំងពីរឲ្យកាន់តែស្អិតរមួតបន្ថែមទៀត និងបន្តកិច្ចសហប្រតិបត្តិការការពារ សន្តិសុខនៅតាមបណ្តាខេត្តជាប់ព្រំដែន ភូមិផងរបងជាមួយគ្នាផងដែរ ៕
ប៊ុនធឿន (សៀមរាប)
