ខេត្តសៀមរាប៖កាលពីវេលាម៉ោង១៩ និង៣០នាទី នារាត្រីថ្ងៃទី ២៨ ខែ កុម្ភះ ឆ្នាំ២០១៦ កម្លាំងចម្រុះបានចុះបង្រ្កាប ទីតាំងកាស៊ីណូខុសច្បាប់មួយកន្លែង ដែលមានយីហោ សាន់ស៊ាំង ជ្រោកក្រោម ភោជនីយដ្ឋាន ស្ថិតនៅក្នុងបុរីប្រឹមប្រីយ៍ ក្នុងភូមិត្រពាំងសេះ សង្កាត់គោកចក ក្រុង ខេត្តសៀមរាប ។
កិច្ចប្រតិបត្តិការបង្រ្កាប់ទីតាំងកាស៊ីណូមួយនេះ ក្រោមការដឹកនាំរបស់លោកវរៈសេនីយ៍ឯក ស្រី យូរ៉ា មេបញ្ជាការរងកងរាជ អាវុធហត្ថខេត្ត និង លោក ឧត្តម សេនីយ៍ត្រី អ៊ុំ អមរ៉ា ស្នងការរងនគរបាលខេត្ត និងមានអាជ្ញាធរក្រុង រួមសហការគ្នាដឹកនាំកម្លាំង បានធ្វើការឃាត់ខ្លួន ! បុគ្គលិកជាអ្នកគ្រប់គ្រង និង សន្តិសុខ កាស៊ីណូ ព្រមទាំងអ្នកដែលបានចូលមកលេងល្បែងផងដែរ ចំនួន ១៤នាក់ មានស្រី ០៥នាក់ ។
តាមការបញ្ជាក់របស់លោកវរៈសេនីយ៍ទោ ថា ដាលុច ប្រធានមន្ទីរយុត្តិធម៌ កងរាជអាវុធហត្ថខេត្ត បានចុះធ្វើការបង្ក្រាបករណីនេះ បានឲ្យដឹងថា៖ ទីតាំងកាស៊ីណូដែលជ្រកក្រោមភោជនីយដ្ឋាន យីហោ សាន់ ស៊ាំង នេះ ត្រូវបានកម្លាំងសមត្ថកិច្ចយើង ធ្វើការតាមដានជាយូមកហើយ ។ តែនៅថ្ងៃទី ២៧ កុម្ភះ ឆ្នាំ២០១៦ កម្លាំង បានឃើញទីតាំងនេះ ដឹកនូវសម្ភារៈចូលមកកាន់ភោជនីយដ្ឋានរបស់ខ្លួន ដែលសុទ្ធសឹងជាឧបករណ៍ អេឡិចត្រូនិច (ទូហ្គេម) ហើយទីតាំងនេះគឺបានបើកលេងទៅដោយភាពស្ងៀមស្ងាត លុះដល់រាត្រីថ្ងៃទី២៨ កុម្ភះ ២០១៦ ធ្វើការ បង្រ្កាបតែម្តង ។
ក្នុងប្រតិបត្តិការលើកនេះសមត្ថកិច្ចចម្រុះរឹបអូសនូវ វត្ថុតាងដែលជាឧបករណ៍ សម្រាប់បម្រើការ លេងល្បែង រួមមាន ទូហ្គេមបាញ់ត្រី ០៣គ្រឿង ទូហ្គេម បញ្ឈរ ២៨គ្រឿង , រ៉ូឡិច ០១គ្រឿង , តាបលេងបៀ ចំនួន ០៤ , កុំព្យូទ័រ ០២គ្រឿង , បៀរ ១០កេស កាម៉ារ៉ា សុវត្ថិភាព ០៥គ្រឿង និង សម្ភារៈ តុ កៅអី ជាច្រើន ត្រូវបានកម្លាំងសមត្ថកិច្ច ធ្វើការដកហូតជាវត្ថុតាង ដឹកជញ្ជូនយកមករក្សាទុកនៅ ទីបញ្ជាការដ្ឋានកងរាជអាវុធហត្ថខេត្តផងដែរ ។
ចំពោះម្ចាស់ទីតាំងនេះ សមត្ថកិច្ចយើងនៅមិនទាន់បានបញ្ជាក់សញ្ញាណ្ណបុគ្គលណាម្នាក់ជា ជាជនជាតិអ្វីនៅឡើយទេ គឺសមត្ថកិច្ចកំពុងតែសួរនាំអ្នកគ្រប់គ្រង ៕ ប៊ុនធឿន (សៀមរាប)
