ខេត្តបន្ទាយមានជ័យ ៖ សព្វថ្ងៃគេឃើញមានរថយន្តមួយគ្រឿងកំពុងធ្វើចរាចរដឹកទំនិញគេចពន្ធគ្រប់ប្រភេទ និងគ្មានការបង់ពន្ធចូលរដ្ឋ ធ្វើឲ្យបាត់បង់ថវិការរដ្ឋផងនោះ រថយន្តនេះអាចនឹងត្រូវរ៉ូវជាមួយនឹងមន្ត្រីគយទាំងនោះ ។ ក្រុមឈ្មួញរកស៊ីបន្តិចបន្តួចសំរាប់ចិញ្ចឹមក្រពះវិញ ត្រូវមន្ត្រីគយតំរ៉ូវឲ្យបង់ពន្ធ ទៅវិញ។
បើតាមប្រភពព័ត៌មានបានប្រាប់ថា រថយន្តមួយគ្រឿងដែលបានដឹកទំនិញខាងលើនេះដឹកក្នុងមួយថ្ងៃ៣ត្រឡប់ ពីក្រុងប៉ោយប៉ែត ទៅខេត្តបន្ទាយមានជ័យដោយគ្មានមន្ត្រីគយណាហ៊ានឃាត់ចាប់ ឬបង់ពន្ធទេ រថយន្តនោះម៉ាក ហ៊ីយិនដាយកូរ៉េ ពាក់ស្លាកលេខ បន្ទាយមានជ័យ 3A-0494។
បើតាមការឲ្យដឹងពីស្ត្រីម្នាក់មិនបញ្ចេញឈ្មោះ អាយុ៤៥ឆ្នាំ ជាអ្នកដឹកទនិញពីប៉ោយប៉ែត ទៅទីរួមខេត្តបន្ទាយមានជ័យរូបគាត់បានត្អូញត្អែរថា សព្វថ្ងៃនេះតាំងពីមានរថយន្តដឹកទឹកកក យកមកលក់នៅក្រុងប៉ោយប៉ែតនិងចែកចាយតាមដេប៉ូ សាខាចាំទទួលលើកលក់ ព្រមទាំងយកទឹកសុទ្ធ និងទឹកកកជូនទៅតាមកន្លែងមន្ត្រីគយ ចល័ត ជារៀងរាល់ថ្ងៃ ដូច្នេះហើយទើបមិនមានមន្ត្រីគយចាប់ ឃាត់ឲ្យបង់ពន្ធ ទេ អាចមានអ្នកអំណាចនៅពីក្រោយផងនោះ។
បើតាមការអះអាងពីស្ត្រីម្នាក់មិនបញ្ចេញឈ្មោះ អាយុ៥០ឆ្នាំ ជាអ្នកដឹកទំនិញដូចគ្នាបានប្រាប់ថា ដោយសាតែមានរថយន្តដឹកទឹកកកខាងលើនេះ វាធំហើយការដឹកទំនិញមានតម្លៃថោកជាងពួកគាត់ ព្រោះតែរថយន្តនេះមិនបានបង់ពន្ធឲ្យមន្ត្រីគយឡើយ ធ្វើឲ្យគាត់ដាច់បាយព្រោះតែគ្មានទំនិញដឹកសោះ និងធ្វើឲ្យគាត់ខ្វះខាតលុយកាកសំរាប់កូនចៅរៀនសូត្រជាច្រើនផងនោះ គាត់បានបន្តថារថយន្តទឹកកកនេះដឹកទំនិញក្នុងមួយថ្ងៃចំនួន៣ជើងទៅ៤ជើងក្នុងមួយថ្ងៃឯណោះ ដូច្នេះហើយបានក្រុមឈ្មួញមួយចំនួន រត់ទៅរករថយន្តខាងលើដឹកទំនិញអោយ។
គាត់បន្តថា នៅពេលឡាននេះមកគឺគេបានដឹកទឹកកកមក បានចុះដាក់ទឹកកក ឬទឹកសុទ្ធ ប្រមាណជាមានតម្លៃ២ម៉ឺនរៀល ទៅ៣ម៉ឺនរៀលក្នុងមួយជើង គឺមន្ត្រីគយចល័តសាលាក្រហម គយចល័តកូនដំរី ចំណុះការិយាល័យគយច្រកទ្វារអន្តរជាតិប៉ោយប៉ែត មានមន្ត្រីជាច្រើន។
គាត់បានបន្ថែមថា រថយន្តនេះគឺតាមការគាត់ដឹងនោះគឺមន្ត្រីគយអនុញ្ញាតិឲ្យដឹកតែ១ជើងក្នុងមួយថ្ងៃប៉ុណ្ណោះលក្ខណះតិចតួច តែជាក់ស្តែងដឹកពេញៗរថយន្តទៅវិញ គឺបានបំពានការអនុញ្ញាតិពីមន្ត្រីទាំងអស់ដែរបាននបើកដៃឲ្យដឹកទំនិញ តែបើប្រជាពលរដ្ឋវិញគឺមន្ត្រីគយតំរ៉ូវឲ្យបង់ពន្ធជូនរដ្ឋ តែសំរាប់រថយន្តខាងលើនេះដឹកម៉ាសេរីគ្មានការឈប់ស្កាត់ និងបង់ពន្ធជូនរដ្ឋធ្វើឲ្យបាត់បង់ថវិការរដ្ឋជាច្រើនក្នុងមួយថ្ងៃ។
ពាក់ពន្ធ័បញ្ហាខាងលើនេះ អ្នកសារព័ត៌មានពុំអាចសុំការបំភ្លឺពីមន្ត្រីគយចល័តកូនដំរី ចំណុះការិយាល័យគយច្រកទ្វារអន្តរជាតិប៉ោយប៉ែត និងគយចល័តសាលាក្រហមទេ ព្រោះមិនមានលេខទូរស័ព្ទសំរាប់ទំនាក់ទំនងបានទេ ៕
