ខេត្តឧត្តរមានជ័យ៖ប្រជាពលរដ្ឋក្នុងស្រុកអន្លង់វែង បានសំដែងនូវការព្រួយបារម្ភពីបញ្ហាអសន្តិសុខ ជាប្រចាំថ្ងៃ ចំពោះសំបកកាំជ្រួច ដែលគេបាញ់ភ្នាល់ចាក់លុយ នៅមាត់ច្រកអន្តរជាតិជាំសាង៉ាំ ធ្លាក់ទៅលើលំនៅដ្ឋាន និងស្រែចំការរបស់ពួកគាត់ ដែលរស់នៅតាម ភូមិជាប់ជើងភ្នំ ដងរែក ស្ថិតនៅក្នុងឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ ។
កន្លងមកប្រជាពលរដ្ឋធ្លាប់បានស្នើរទៅអាជ្ញាធរ និងថ្នាក់ដឹកនាំរាជរដ្ឋាភិបាល ជួយដល់ពួកគាត់ដែលមាន ទុក្ខលំបាក ពីសំណាក់ក្រុមហ៊ុន សាម៉នខេមរៈអភិវឌ្ឍន៍ បើកលេងល្បែងបាញ់កាំជ្រួចភ្នាល់គ្នាចាក់លុយ ដែលជ្រកកោន ក្រោមអាជ្ញាប័ណ្ណពីក្រសួងមហាផ្ទៃ ។
ប្រជាពលរដ្ឋទាំងនោះបាននិយាយថា ៖ រយៈពេល៣ថ្ងៃ រៀងរាល់ ថ្ងៃសុក្រ សៅរ៍ និងថ្ងៃអាទិត្យ ពួកគាត់មិនបាន ចេញប្រមូលផលដំណាំ ឬទៅរកស៊ីចិញ្ចឹមជីវិតនោះទេ ។ ព្រោះនៅពេលគេបាញ់កាំជ្រួចម្តងៗ សំបកកាំជ្រួចបាន ធ្លាក់ ឆេះព្រៃ និងឆេះផ្ទះអ្នកភូមិផងដែរ ។ មិនតែប៉ុណ្ណោះពួកគាត់មិនហ៊ានចេញពីក្នុងផ្ទះឡើយ ដោយខ្លាចសំបក កាំជ្រួច ធ្លាក់ត្រូវអាចបណ្តាលឱ្យរងរបួសធ្ងន់ ឫអាចស្លាប់បាត់បង់ជីវិត ព្រោះសំបកកាំជ្រួចទាំងនោះ
មានប្រវែង ៦ម៉ែត្រ ឯណោះ ។
ប្រជាពលរដ្ឋបាននិយាយទៀតថា ៖ កាំជ្រួចដែលគេបាញ់ចេញនោះ មានចម្ងាយឆ្ងាយណាស់ សូម្បីតែភូមិ របស់ ពួកគាត់ដែលនៅតាមផ្លូវយុទ្ធសាស្រ្ត ក្បែរជើងភ្នំដងរែក ដែលមានចំងាយពី ៣គីឡូម៉ែត្រ ទៅ ៥គីឡូម៉ែត្រឯណោះ ក៏ សំបកកាំជ្រួចនោះធ្លាក់ត្រូវចំដំបូលផ្ទះ និងដីស្រែចំការរបស់ពួកគាត់ទៀត ។
ប្រជាពលរដ្ឋបានបន្ថែមទៀតថា ៖ កន្លងមកពួកគាត់ពួកគាត់បានរាយការណ៍ទៅអាជ្ញាធរ និងសមត្ថកិច្ចជំនាញជាច្រើនលើកច្រើនសារមកហើយដែរ ក៏ប៉ុន្តែពុំឃើញមានចំណាត់ការណាមួយសម្រាប់ពួកគាត់ឡើយ ហើយសកម្មភាព ការបាញ់កាំជ្រួច ! កាន់តែកើនឡើង ជាច្រើនគ្រាប់ ក្នុងមួយថ្ងៃៗ ព្រមទាំងមានការនាំចូលនូវគ្រឿងរំសេវ និងសំបក កាំជ្រួច ពីប្រទេសថៃ ឆ្លងកាត់តាមច្រកអន្តរជាតិជាំសាង៉ាំផងដែរ ពុំមានជំនាញណាម្នាក់យកចិត្តទុកដាក់ពី បញ្ហាការប៉ះពាល់ដល់ស្ថានភាពរស់នៅដល់ប្រជាពលរដ្ឋនោះឡើយ ។
ប្រជាពលរដ្ឋស្នើរសុំដល់ ឯកឧត្តម គន់ គីម ប្រធានក្រុមការងារថ្នាក់ជាតិជុះជួយខេត្តឧត្តរមានជ័យ និងឯកឧត្តម ស ថាវី អភិបាលខេត្តឧត្តរមានជ័យ មេត្តាជួយអន្តរាគមន៍ ចំពោះក្រុមហ៊ុនខាងលើកំពុងតែយកយីហោក្រុមហ៊ុនអភិវឌ្ឍន៍ ប្រទេសជាតិ ! មកបើកល្បែងភ្នាល់ចាក់លុយ មិនតែប៉ុណ្ណោះធ្វើឱ្យប៉ះពាល់ដល់សុវត្តិភាពប្រជាពលរដ្ឋពួកគាត់ទៀតផង ៕ប៊ុនធឿន (សៀមរាប)
