ប៉ោយប៉ែត៖ អស់រយះពេលជាង១សប្តាហ៍កន្លងមកនេះគេសង្កេតឃើញមានពលករចំណាកស្រុកខ្មែរ ប្រុសស្រី ក្មេងចាស់ រាប់រយនាក់បាននាំគ្នាធ្វើដំណើរ មកពីតាមបណ្តាខេត្តនានា នៃព្រះរា ជាណាចក្រកម្ពុជា សម្រុកកមកាន់ជាយដែនកម្ពុជា ថៃ ក្នុងតំបន់ប៉ោយប៉ែតវិញ និងបានឆ្លងដែនចេញតាម ច្រកទ្វារអន្តរជាតិប៉ោយប៉ែត ចូលទៅក្នុងប្រទេសថៃ ស្វែងរកការងារធ្វើដើម្បីផ្គត់ផ្គង់ ជីវភាពគ្រួសារ។
ជាក់ស្តែងនៅព្រឹកថ្ងៃទី02ខែកក្កដ ឆ្នាំ២០១៤នេះ គេឃើញមានក្រុមពលករចំណាកស្រុកខ្មែរប្រមា ណជិត១០០០នាក់ប្រដាប់ដោយកាបូបស្ពាយរយីងរយ៉ូង មើលទៅគួរឱ្យអាណិតអាសូរ ខ្លាំងណាស់ បាននាំគ្នា សម្រុកឆ្លងដែនតាមច្រកទ្វារអន្តរជាតិប៉ោយប៉ែត ចូលទៅក្នុងទឹកដីថៃដើម្បីរក ការងារធ្វើ ។
តាមការបំភ្លឺពីក្រុមពលករទាំងនោះបានឱ្យដឹងថា ពួកគាត់ឆ្លងដែនទៅរកការងារធ្វើ នៅក្នុងប្រទេសថៃ នាពេលនេះ គឺមានមួយចំនួនធំ តាមរយះក្រុមហ៊ុនស្របច្បាប់ ជាអ្នកនាំទៅរកការងារធ្វើ ! រីឯមួយចំនួនទៀតបានឱ្យដឹងថា ពួកគេឆ្លងដែនទៅក្នុងទឹកដីថៃ គឺទៅរកការងារធ្វើដោយខ្លួនឯង ដោយ មួយរយះកាលកន្លងមកពួកគាត់ ធ្លាប់ទៅធ្វើការនៅក្នុងទឹកដីថៃ រួចមកហើយ ។
តែក្រោយពេលរដ្ឋប្រ ហារ របបយោធាថៃ បានចាប់បញ្ជូនពួកគាត់ មកមាតុភូមិវិញអស់មួយរយះ ហើយពួកគាត់បានទៅសម្ងំ នៅស្រុកកំណើតមួយរយះពេលផងដែរ ។
ក្រុមពលករបានបន្តថា មួយរយះពេលថ្មីៗនេះ ពួកគាត់បានលេចឮដំណឹងថា ខាងអាជ្ញាធរ មានសមត្ថ កិច្ចនៃភាគីថៃ បានសម្របសម្រួលឱ្យពលករស្របច្បាប់ អាចស្នាក់នៅធ្វើការងារ នៅក្នុងប្រទេសគេ បានតទៅទៀតហើយនោះ ទើបពួកគាត់នាំគ្នាសម្រេចចិត្តចូលទៅរកការងារធ្វើផងដែរ ។
គួរមានការកត់សម្កាល់ថា ក្រុមពលករខ្មែរខុសច្បាប់ ដែលអាជ្ញាធរ មានសមត្ថកិច្ចនៃ ភាគីថៃ បានចាប់ បញ្ជូនមកមាតុភូមិវិញ តាមច្រកទ្វារអន្តរជាតិប៉ោយប៉ែត រហូតមកដល់រសៀលថ្ងៃទី02 ខែកក្កដា នេះ គេនៅតែ សង្កេតឃើញមានមិនទាន់អស់នៅឡើយទេ ! ដោយពួកគេបានយកមកប្រគល់ឱ្យក្រុមការ ងារមន្ត្រីនៃ ភាគីកម្ពុជា នៅចំណុចរង្វង់មូលមាត់ច្រកប៉ោយប៉ែត ចាំទទួលជាប្រចាំផងដែរ ។
សូមបញ្ជាក់ថា ចំពោះក្រុមពលករខ្មែរ ខុសច្បាប់ដែលអាជ្ញាធរ មានសមត្ថកិច្ចនៃភាគីថៃ ចាប់បញ្ជូនមក វិញតាមច្រកប៉ោយប៉ែត ចាប់គិតពីថ្ងៃទី០៦ រហូតដល់ថ្ងៃទី30 ខែមិថុនា ឆ្នាំ២០១៤នេះមាន ចំនួនសរុប208122នាក់ ។
ប្រភពព័ត៌មានចុងក្រោយឲ្យដឹងថា ដោយមានការអាក់រអួលមិនអាចធ្វើបណ្ណឆ្លងដែនដោយអាជ្ញាធរខ្មែរ ទើបក្រុមពលករមួយចំនួននាំគ្នាសំរុកឆ្លងដែនតាមច្រករបៀងខុសច្បាប់ ដោយមានមេខ្យល់ជាអ្នកនាំផ្លូវ ក្នុងតម្លៃ ២៥០០ បាត ។ បញ្ហានេះ រដ្ឋាភិបាលត្រូវតែទប់ស្កាត់ជាបន្ទាន់ ៕
