បើកកិច្ចប្រជុំ គណកម្មាធិការអចិន្រ្តៃយ៍ នៃ សភានិយាយភាសាបារាំង

ខេត្តសៀមរាប = កិច្ចប្រជុំរបស់គណកម្មាធិការអចិន្រ្តៃយ៍ នៃសភានិយាភាសាបារាំងបានចាប់ ផ្តើមបើកដំណើរការរបស់ខ្លួននាព្រឹកថ្ងៃទី២៨ ខែមករានេះ ក្រោមវត្តមានរបស់សម្តេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា និងមានវត្តមានផងដែរ ឯកឧត្តម Aubin Minaku NDJALANDJOKO ប្រធានសភានិយាយភាសាបារាំង និងជាប្រធានរដ្ឋសភា នៃសាធារណរដ្ឋ ប្រជាធិបតេយ្យ កុងហ្គោ ។
សម្រាប់កិច្ចប្រជុំនេះគ្រោងនឹងបើកការពិភាក្សាគ្នារហូតដល់ល្ងាច ថ្ងៃទី២៩ ខែមករា ដែលមាន សមាជិកចូលរួមចំនួន៨០ស្ថាប័ន នៃសភានិយាយភាសាបារាំង មកពី១៦ប្រទេស ។

សក្ខីកម្មនៃកិច្ចប្រជុំនេះ គឺជាការបង្ហាញពីសុឆន្ទៈ និងការប្តេជ្ញាចិត្តរបស់មាជិកចូលរួមទាំងអស់ ដើម្បីសម្រេចឲ្យបាន ចក្ខុវិស័យរបស់មហាសន្និបាតនៃសភានិយាយភាសាបារាំង ហើយក៏ជាការ បង្ហាញនូវការគាំទ្រយ៉ាងពេញលេញ ដល់សភាកម្ពុជា ដែលបានទទួលកិត្តិយសរៀបចំ កិច្ចប្រជុំ គណកម្មាធិការអចិន្រ្តៃយ៍នៃសភានិយាយភាសាបារាំងលើកទី១នេះ ។

គេសង្ឃឹមថា លទ្ធផលនៃកិច្ចប្រជុំនេះ នឹងបានបំពេញនូវប្រតិទិនការងារដែលបានគ្រោងទុក ហើយនឹងអាចទទួលបាននូវការឯកភាព លើសេចក្តីព្រាងរបៀបវារៈនានា ផងដែរ ។ បើទោះជាយ៉ាងណា នៅក្នុងសេចក្តីថ្លែងសន្ទរកថាបើកកិច្ចប្រជុំនេះ ក្នុងនាមជាម្ចាស់ផ្ទះ( សម្តេចអគ្គមហាពញាចក្រី ហេង សំរិន ) បានបង្ហាញនូវការចែករំលែកបទពិសោធន៍ជាក់ ស្តែងនៃបណ្តាប្រទេស អាស៊ានទាំង១០ ជូនដល់សមាជិកសភានិយាយភាសាបារាំងផងដែរ ក្នុងនោះគឺត្រូវបាននិយាយអំពី សមិទ្ធផលនិងជោគជ័យទាំងឡាយ ដែលប្រទេសអាស៊ានសម្រេចបាន ដោយបានឆ្លងកាត់បញ្ហា ប្រឈម និងឧបស័គ្គនានា ដូចជាបញ្ហាសន្តិសុខស្បៀង ឋាមពល ការប្រែប្រួលអាកាសធាតុ គ្រោះ មហន្តរាយធម្មជាតិ ភេវរកម្ម ឧក្រិដ្ឋកម្មឆ្លងដែន ការជួញដូរផ្លូវភេទ ជម្ងឺឆ្លងរាតត្បាត សុវត្ថិភាព ផ្លូវសមុទ្រនិងការឈានទៅសម្រេចគោលដៅទាំងឡាយ នៃការអភិវឌ្ឍន៍ប្រកបដោយចិរភាព ។

ជាមួយគ្នានោះសម្តេច ហេង សំរិន បានបង្ហាញអំពីការព្រួយបារម្ភចំពោះការពង្រឹងសន្តិភាព សន្តិសុខ និងស្ថិរភាពនយោបាយនៅក្នុងតំបន់ ដើម្បីឈានទៅទទួលបានកំណើនសេដ្ឋកិច្ច ប្រកប ដោយនិរន្តរភាព សម្រាប់វិបុលភាពរបស់ប្រជាពលរដ្ឋ និងមានភាពសុខដុមរមនា ទាំងផ្នែកនយោបាយ សន្តិសុខ សេដ្ឋកិច្ច និងសង្គមវប្បធម៌ក្នុងតំបន់ ។

សម្តេចបានសង្កត់ធ្ងន់ថា ៖ វិបត្តិនយោបាយនិងសង្គម ដែលកំពុងកើតមាននៅតំបន់មជ្ឈឹមបូព៌ា នៅអាហ្វ្រិកខាងជើង និងប្រទេសមួយចំនួនទៀតក្នុងតំបន់អ៊ឺរ៉ុប នៅបន្តគំរាមដល់សន្តិសុខក្នុងតំបន់ និងពិភពលោក ហើយបញ្ហានេះ មិនអាចដោះស្រាយបានក្នុងកម្រឹតជាតិណាមួយបាននោះទេ គឺត្រូវ ទាមទារនូវអភិក្រមនៃកិច្ចសហប្រតិបត្តិការ តាមរយៈនៃកិច្ចសហប្រតិបត្តិក្នុងតំបន់ ក៏ដូចជាក្នុងក្រប ខ័ណ្ឌសភានិយាយភាសាបារាំង ( ហ្រ្វង់កូហ្វូនី ) ។ ដូច្នេះ សភានិយាយភាសាបារាំង ( ហ្វ្រង់កូហ្វូនី ) គឺជាតួអង្គមួយដ៏សំខាន់ ក្នុងការរួមចំណែកនាំមកនូវការឯកភាពក្នុងតំបន់ តាមរយៈ
នៃការងារនីតិកម្មដែលជាឧបករណ៍ ដ៏មានប្រសិទ្ធិភាព ៕
ប៊ុនធឿន (សៀមរាប)