តាមប្រភពរាយការណ៍ថានាពេលថ្មីនេះ គំនរឈើរាប់រយម៉ែត្រគូប និងច្រើនកន្លែងត្រូវបានគេដុតបំផ្លាញចោល ក្នុងនោះក៏មានស្ពានមួយកន្លែងដែលជាច្រកចូលក្រុមហ៊ុនផងដែរ។ប្រភពបានបញ្ជាក់ថាឈើដែលគេដុតចោលនោះ ជាប្រភេទឈើធ្នង់និងសុក្រំ ហើយសុទ្ធសឹងជាឈើអត់ច្បាប់និងត្រូវលោតឆត្រ័ទៅប្រទេសវៀតណាម។
ឈើទាំងអស់នោះត្រូវបានគេដុតភ្លាម បន្ទាប់ពីសម្តេច ហ៊ុន សែន នាយករដ្ឋមន្ត្រី ចេញបញ្ជាឲ្យបង្កើតគណៈកម្មការបង្ក្រាជំនួញឈើទ្រង់ទ្រាយធំនាំចេញទៅវៀតណាមខុសច្បាប់ក្នុងនោះសម្តេចបញ្ជាឲ្យបង្ក្រាបមុនគេជំនួញឈើខុសច្បាប់របស់ក្រុមហ៊ុន លោកឧកញ៉ា លឺម ប៊ុណ្ណា ហៅ ខ្នា និង ក្រុមហ៊ុន ឧកញ៉ា សឺង្ហ សំអុល ។
ក្រុមហ៊ុន ប៊ិញ ហ្វ៊ឿក បានដុតកម្ទេចឈើប្រណិតរាប់រយម៉ែត្រគូបដែលស្ថិតនៅក្នុងក្រុមហ៊ុនរបស់ខ្លួន ក្នុងភូមិសាស្រ្ត ភូមិចកចារ ឃុំស្រែឈូក ស្រុកកែវសីមា ខេត្តមណ្ឌលគីរី ដើម្បីបំបិទភស្តុតាំង និងរារាំងមិនឲ្យកម្លាំងសមត្ថកិច្ច បង្ក្រាបព្រៃឈើចុះទៅពិនិត្យឈើដែលកំពុងស្តុកទុកក្នុងក្រុមហ៊ុន ប៊ិញ ហ្វ៊ឿក ។
ប្រភពពីប្រជាពលរដ្ឋដដែលបាឲ្យដឹងថា ឈើដែលជនខិលខូចលួចដុតគីមានចំនួន៦ទៅ៧កន្លែងផ្សេងគ្នា ដោយមួយកន្លែងមានចំនួនមិនតិចជាង១០០កំណាត់ទេនោះ ហើយជាប្រភេទឈើឡាំងសុទ្ធ គ្រាដែលឈើសុក្រំ នៅក្នុងបរិវេណក្រុមហ៊ុនប៊ិញហ្វ៊ៀក១មានឈើរាប់ពាន់កំណាត់ត្រូវបានសមត្ថកិច្ចចំរុះចុះទៅធ្វើការវាស់វែងផងដែរកាលពីថ្ងៃទី១៩ ខែមករា ឆ្នាំ២០១៦នេះ ។ ប៉ុន្តែ រហូតមកដល់ពេលនេះមានរយះពេល៣ថ្ងៃហើយ ឈើរាប់ពាន់កំណាត់ដែលត្រូវគេលួចដុតនោះគឺនៅពុំទាន់បានពន្លត់នៅឡើយ។
ដោយឡែកក្នុងបេសកកម្មបង្រ្កាបជំនួញឈើក្តៅគគុក លោកឧត្ដមសេនីយ៍ត្រី សាន ប៊ុនថាន មេបញ្ជាការអាវុធហត្តខេត្តក្រចេះ នៅព្រឹកថ្ងៃទី២៣ខែមករាឆ្នាំ២០១៦បានដឹកនាំកំលាំងទៅឡោមព័ទ្ធទីតាំងស្តុកឈើប្រភេទធ្នង់និងសុក្រុំរាប់រយម៉ែត្រគូប នៅក្នុងព្រៃក្នុងដីក្រុមហ៊ុន ស៊ី អែន វី ស្ថិតនៅឃុំរលួសមានជយ័ស្រុកសំបូរខេត្តក្រចេះ។
លោកឧត្ដមសេនីយ៍ត្រី សាន ប៊ុនថាន បានឲ្យដឹងថាលោកដឹកនាំកំលាំងឈរជើងនៅទីតាំងស្តុកឈើហើយលោកបានរាយការណ៍គណកម្មការជាតិបង្គ្រាបបទល្មើសព្រៃឈើហើយជំនាញរដ្ឋបាលព្រៃឈើកំពុងធ្វើការវាសវែងរកតួលេខចំនួនឈើទាំងនោះ។
លោកបន្តទៀតថាកំលាំងលោកឈរជើងនៅទីនោះដើម្បីការពារមន្ត្រីជំនាញចុះវាស់វែងឈើទាំងនោះ លទ្ធផលយ៉ាងនោះគណកម្មការជាតិបង្គ្រាបបទល្មើសព្រៃឈើជាអ្នកសំរេច។
មជ្ឃដ្ឋានទូទៅបានប្រកាសថ្កោលទោសសកម្មភាពដុតបំផ្លាញឈើរបស់ក្រុមហ៊ុន ប៊ិញ ហ្វ៊ឿកដែលជាក្រុមហ៊ុនរបស់លោកឧកញ៉ា សឹង្ហ សំអុល ដោយចាតទុកថាសកម្មភាពនោះជាឧក្រិដ្ឋកម្មបន្ថែមទៀតរបស់លោកឧកញ៉ា សឺង្ហ សំអុល ជាមួយនិងឧក្រិដ្ឋកម្មបំផ្លាញព្រៃឈើ។តាមរយបទល្មើសទាំងនេះ រាជរដ្ឋាភិបាលកម្ពុជា ត្រូវនាំ ឧកញ៉ា សឹង្ហ សំអុល នឹងឈ្មួញជំនួញឈើទាំងអស់យកមកកាត់ទោសតាមច្បាប់ដោយពុំមានករណីលើកលែងបានឡើយ ហើយប្រជាពលរដ្ឋកំពុងរង់ចាំការវែកមុខឧក្រិដ្ឋជនពីសំណាក់សមត្ថកិច្ច៕
